რა ღირს სტადიონის მშენებლობა ევროპაში?

აჭარის ფინანსთა და ეკონომიკის სამინისტრომ, ბათუმის საფეხბურთო სტადიონის მშენებლობის დაწყებასთან დაკავშირებით, პრესრელიზი გამოქვეყნა. იქ რამდენიმე ცნობილი და უცნობი დეტალიც იყო მოყვანილი...

არენამ უეფას IV კატეგორიის სტანდარტები უნდა დააკმაყოფილოს და 20 000 მაყურებელზე იქნება გათვლილი.

რაც შეეხება სტადიონის კონცეფციას: შენობის ფასადი ქართული ეროვნული ცეკვა "ხორუმის" კონცეფციაზეა აგებული. შენობის მწყობრად ჩალაგებული კონსტრუქციები ჰარმონიულად მოძრავ მოცეკვავეებს იმეორებს.

ტრიბუნები არქიტექტურული მემბრანით იქნება გადახურული. მაყურებელთა გადაადგილება დამცავი ბარიერებისა და მიმმართველი გამყოფი ლითონის მოაჯირების საშუალებით მოხდება.

იმის გათვალისწინებით, თუ რა ტიპის მატჩი ჩატარდება, სტადიონის შენობა ღამით საქართველოს, აჭარისა და ბათუმის "დინამოს" დროშის, ასევე საქართველოსა და აჭარის გერბის ფერების მიხედვით განათდება.

საინტერესო სიახლე ის არის, რომ სტადიონს რამდენიმე შესასვლელი ექნება: მედიისთვის, ავტობუსებისთვის, სპორტსმენებისთვის და VIP-ის. ამავე დროს, ტერიტორიაზე დაახლოებით 1200 მანქანაზე გათვლილი პარკინგი მოეწყობა, რაც უეფას სტანდარტებს უახლოვდება.

სტადიონი აჭარის ფინანსთა და ეკონომიკის სამინისტროს დაკვეთით შენდება. მშენებლობის ღირებულება 99 448 408,56 ლარია და ტენდერში გამარჯვებული სამშენებლო კომპანია "ანაგი" ვალდებულია, რომ ხელშეკრულების მიხედვით, სამუშაოები 34 თვეში, 2020 წლის სექტემბერში დაასრულოს, ხოლო მშენებლობის პროცესში 500 ადამიანი დაასაქმოს.

ერთი სიტყვით, სტადიონის მშენებლობაზე ლამის 100 მილიონი ლარი დაიხარჯება. არ დავმალავთ, თავიდან ეს ჩვენც გაზრდილ თანხად მოგვეჩვენა. ამიტომ დავინტერესდით და საინტერესო მასალები მოვიძიეთ, თუ რა ჯდება საერთაშორისო სტანდარტების საფეხბურთო სტადიონის მშენებლობა...

ცხადია, ევროპაში ბევრი სტადიონი აუშენებიათ თანამედროვე ტექნოლოგიებით დამზადებული იაფფასიანი მასალებით და ეს ჩვენს რეალობაში სამაგალითო მოდელად გამოდგება.

პროექტის დაბალი ფასი გამოწვეულია არა დაბალი ხარისხის მასალებით, არამედ, კონსტრუქციის სიმარტივით და ეკონომიური მასალის გამოყენებით. ევროპაში ბევრია 5-დან 8 ათასამდე ტევადობის სტადიონი, რომლებიც მოედნის საფარის გარეშე 900 ათას ევრომდე ჯდება. ამ ტექნოლოგიით აშენებული არენები უეფას სტანდარტებს გარკვეულ დონემდე სრულად აკმაყოფილებს.

ამ ტექნოლოგით ბევრი ცნობილი სტადიონი აშენდა - ჰოლანდიაში "დენ ჰააგის", "ზვოლეს", "გრონინგენის", როტერდამის "სპარტას", "როდას", "როზენდაალის", "ბრედას", ხოლო შოტლანდიაში "სენტ მირენის" არენა.

მაგრამ ბათუმის შემთხვევაში სანაკრებო დონის სტადიონზეა ლაპარაკი: სტადიონების მშენებლობა ერთ ინდივიდუალურ სკამზე დახარჯული თანხის მიხედვით ითვლება.

არსებობს ევროპული აუდიტორული კომპანიების დასკვნა, რომ ბებერ კონტინენტზე ეს მონაცემები 4-დან 6 ათასამდე მერყეობს. რა თქმა უნდა, იაფი სტადიონებიც არის, რომლებიც მსუბუქი სამშენებლო კონსტრუქციებით შენდება. მაგრამ უეფას IV კატეგორიის სტადიონზე ეს სტანდარტი მიუღებელია.

ანუ საშუალოდ, 5 ათასი რომ ავიღოთ, გამოდის, რომ 20-ათასიან სტადიონს 100 მილიონი დოლარი სჭირდება. გამოდის, რომ ბათუმის სტადიონი უფრო იაფადაც აშენდებოდა. ალბათ, ერთ-ერთი მიზეზი ის არის, რომ საქართველოში მუშახელი უფრო იაფია, ვიდრე ევროპაში.

ყოველდღიური სპორტული გაზეთი "ლელო"
3232
მკითხველის კომენტარები / 0 /
მსგავსი ამბები
რუბრიკის სხვა სიახლეები
;