რა ძალა ექნება არგენტინას? შანსი დიბალას, უარი იკარდის... და, ერთად კოპა ამერიკისთვის

14 ივნისიდან 7 ივლისის ჩათვლით ბრაზილიაში “კოპა ამერიკა 2019” გაიმართება. არგენტინის ეროვნული ნაკრების გულშემატკივარი მოუთმენლად ელის ტურნირის დაწყებას.

სწორედ აქ უნდა მოიწმინდოს ლიონელ მესიმ და კომპანიამ ის სირცხვილი, რომელიც მას რუსულ მუნდიალზე ერგო. შეუძლია კი არგენტინის ნაკრებს გულშემატკივრების გახარება? ეს წერილი სწორედ ამ მნიშვნელოვან თემას ეხება.

არგენტინის ნაკრები ჯგუფში კოლუმბიის, პარაგვაისა და ყატარის (მიწვეულია ტურნირზე იაპონიასთან ერთად) ნაკრებებთან ერთად მოხვდა. რა თქმა უნდა, ეს არ არის “სიკვდილის” ჯგუფი, მაგრამ ფაქტია ისიც, რომ “ალბისელესტეს” დიდი ოფლისღვრა მოუწევს ამ ბარიერის დასაძლევად... 

მწვრთნელი

41 წლის ლიონელ სკალონი ჯერ კიდევ სულ ცოტა ხნის წინ მოქმედი ფეხბურთელი გახლდათ და არცთუ ურიგოდ აგორებდა ბურთს. სკალონი კარგი ფეხბურთელი იყო, მაგრამ საკითხავია, რამდენად კარგი მწვრთნელია? 

ამ კითხვას პასუხი სწორედ “კოპა ამერიკაზე” უნდა გაეცეს. ზოგადად არგენტინის ნაკრების მწვრთნელობა ძალიან რთული საქმეა, მით უმეტეს მას შემდეგ, რაც გუნდში ლიონელ მესი თამაშობს. 

მაინც, რა სამწვრთნელო გამოცდილება უდგას უკან სკალონის? ის იყო “სევილიას” მთავარი მწვრთნელის ასისტენტი და იმუშავა არგენტინის ნაკრებში. ვითომ, ეს საკმარისია?..

რატომ იუარა სკალონიმ იკარდი?

მაურო იკარდი მსოფლიოს ერთ-ერთი საუკეთესო თავდამსხმელი რომაა, ამას ბევრი კამათი არ სჭირდება. მაშ, რატომ არ წაიყვანა ის სკალონიმ “კოპა ამერიკაზე”? არგენტინა არ განიცდის კვალიფიციური შემტევების ნაკლებობას, მაგრამ აქ სხვა რამეში უნდა იყოს საქმე - როგორც ჩანს, სკალონიმ ჩათვალა, რომ იკარდის ყოფნა “ალბისელესტეში” არევს სიტუაციას. 

სულაც არ იქნება გასაკვირი, ნაკრებზე რაღაც თქვას მაუროს სკანდალურად ცნობილმა მეუღლემ და ახლა უკვე აგენტმა ვანდა ნარამ და ასე შემდეგ. თანაც, იკარდი ვერ იტანს, როცა მას სათადარიგოთა სკამზე სვამენ. აქედან გამომდინარე, ის მუდმივად ძირითადში უნდა იყოს... 

ექნება შანსი დიბალას?

პაულო დიბალამ “იუვენტუსში” ჩატარებული მძიმე სეზონი “კოპა ამერიკაზე” უნდა გააფერადოს. საკითხავი ისაა, მიეცემა კი მას ამის შანსი? არგენტინის ნაკრების მწვრთნელები აქამდე თვლიდნენ, რომ იმ შემთხვევაში თუ ეროვნულ გუნდში იყო მესი, დიბალას მაქსიმუმი სათადარიგოთა შორის ყოფნა გახლდათ.

მესი ახლაც ნაკრებშია. ვნახოთ, იქნებ სკალონიმ მოახერხოს და ორი ვარსკვლავი ერთად გამოიყენოს. დიბალას თავისი ამბებიც აწუხებს. შესაძლოა, მისი ადგილი აღარ იყოს “იუვენტუსში” და “ახალ კლუბს” კარგი თამაშით უნდა მოაწონოს თავი...

გადაჭარბებულია თუ არა ავანსები?

ბევრი მიიჩნევს, რომ არგენტინის ნაკრების ეს შემადგენლობა მზად არ არის ტიტულის მოსაგებად. გუნდში არ არის უმაღლესი კი არა, საშუალოზე მაღალი კლასის მეკარე მაინც. დაცვასა და ნახევარდაცვაში არიან ნიჭიერი ბიჭები, მაგრამ ასეთები სხვებსაც ჰყავთ. 

ფაქტია, გუნდის მთავარი დამრტყმელი ძალა შეტევაში უნდა ვეძებოთ. აქ თავმოყრილ შემსრულებლებს თავისუფლად შეუძლიათ თამაშის ბედის გადაწყვეტა, მაგრამ, როგორც ბოლო წლებში ხშირად ხდება, არგენტინას ისევ აკლია ბალანსი.

...და მესი

და მაინც, ყველაფერი თუ არა, ძალიან ბევრი რამ იმაზე იქნება დამოკიდებული, თუ როგორ ფორმაში შეხვდება “კოპა ამერიკას” ლიონელ მესი. ამ დროისთვის მისი ფორმა იდეალური არ უნდა იყოს, თუნდაც ჩემპიონთა ლიგის მეორე ნახევარფინალის დაწყებამდე, მაგრამ ეს ბევრს არაფერს ნიშნავს. სხვა საქმეა, რომ ეროვნულ გუნდში მესის ხშირად უჭირს თამაში. 

როგორიც იქნება მესი, ისეთივე იქნება არგენტინა - ასეთია ექსპერტთა ვარაუდი. დანარჩენს მალე ვნახავთ. ბოლოს კი ერთხელაც გადავხედოთ “ალბისელესტეს” შემადგენლობას:

ყოველდღიური სპორტული გაზეთი "ლელო"
955
მკითხველის კომენტარები / 0 /
მსგავსი ამბები
რუბრიკის სხვა სიახლეები
;