რა ხდება მეტოქის ბანაკში? - ყაზახები ცვლილებების მოლოდინში

10 თებერვალს ყაზახეთის ფეხბურთის ფედერაციის პრეზიდენტის არჩევნები გაიმართა. გასაგებია, რატომაც გვაინტერესებს ეს თემა.

სწორედ ამ არჩევნების შემდეგ უნდა გაირკვეს ამ ქვეყნის ნაკრების ახალი მწვრთნელის ვინაობა, მწვრთნელისა, ვინც ყაზახეთის უპირველესი გუნდი ერთა ლიგის მატჩებისთვის და კონკრეტულად საქართველოს ეროვნულ ნაკრებთან სასტარტო მატჩისთვის უნდა მოამზადოს.

არჩევნებში გაიმარჯვა ყაზახეთის პრეზიდენტის აპარატის უფროსმა ადილბეკ ჯასიბეკოვმა. სხვა საკითხებთან ერთად, მან ნაკრებზეც ილაპარაკა...

"რა თქმა უნდა, არის პრობლემები. ეროვნული ნაკრები ვერ თამაშობს ისე, როგორც ჩვენ გვინდა. ბოლო მწვრთნელს მხარს მეც არ ვუჭერდი. ეს არ ეხება რეპუტაციასა და კვალიფიკაციას.

მისი მომზადება და მუშაობა მეტყველებს იმაზე, რომ ის ღირსეული მწვრთნელია. მინდორზე ფეხბურთელები თამაშობენ და არა მწვრთნელი. თავის დროზე, ჩვენ მოვიწვიეთ ალეგრი, მაგრამ მან მოითხოვა ის ბიუჯეტი, რომელიც აქვს ორ ყაზახურ კლუბს...

ნაკრების ყველა მწვრთნელმა შეიტანა წვლილი ეროვნული გუნდის განვითარებაში - ბოროდიუკმაც, კრასნოჟანმაც, იმავე შტორკმა... ჩვენ ვაგებდით შტორკთან ერთად, მაგრამ მერე მან ევროპის ჩემპიონატზე გაიყვანა უნგრეთის ნაკრები", - თქვა ჯასიბეკოვმა.

ჟურნალისტთა კითხვებს უპასუხა ყაზახეთის ფეხბურთის ფედერაციის გენერალურმა მდივანმა აზამატ აიტჟოხინმაც:

"მარტში ყაზახეთის ეროვნული ნაკრები აუცილებლად გამართავს ორ ამხანაგურ შეხვედრას უნგრეთთან და ბულგარეთთან. მასმედიაში დაიწერა არგენტინის შესახებ, მაგრამ ეს ინფორმაცია სინამდვილეს არ შეეფერება. არგენტინულ მხარესთან ჩვენ არანაირი მოლაპარაკება არ გვქონია.

სამაგიეროდ, გვქონდა კონსილიუმი მწვრთნელის თემაზე. გადავწყვიტეთ, რომ ყველაფერი საფუძვლიანად ავწონ-დავწონოთ და ისე მივიღოთ გადაწყვეტილება. ვფიქრობ, ეს საკითხი ახლო მომავალში გადაწყდება.

ვიმსჯელეთ რამდენიმე კანდიდატზე. მათ შორისაა ჩვენი თანამემამულე ტალგატ ბაისუფინოვი, არის სტანიმირ სტოილოვის კანდიდატურაც. სულ 5-6 კანდიდატია".

ყაზახი ჟურნალისტები მიიჩნევენ, რომ ეროვნული გუნდის თავკაცის პოსტზე მთავარი კანდიდატია ბულგარელი სპეციალისტი სტანიმირ სტოილოვი. ასეთ შემთხვევაში მას ორი თანამდებობის შეთავსება მოუწევს.

ახლა ყველაზე საინტერესო ისაა, შეინარჩუნებს თუ არა სტოილოვი ორ თანამდებობას და დარჩება თუ არა "ასტანას" მთავარ მწვრთნელად.

ყაზახური მედია ამასთან დაკავშირებით ვარაუდობს, რომ საკითხის ფორსირება არ მოხდება, რადგან სექტემბრამდე ნაკრებს ოფიციალური მატჩები არ აქვს.

წესით, ყაზახეთის ფეხბურთის ფედერაციამ არ უნდა იჩქაროს და სტოილოვი მას შემდეგ უნდა დააკავოს მხოლოდ სანაკრებო სამსახურით, როცა "ასტანა" ევროპალიგას დაემშვიდობება. ეს კი, შეიძლება, ძალიან მალე მოხდეს, რადგან ყაზახეთის საუკეთესო კლუბის მეტოქე შოტლანდიური გრანდი "სელტიკია".

ყოველდღიური სპორტული გაზეთი "ლელო"
1245
მკითხველის კომენტარები / 0 /
მსგავსი ამბები
რუბრიკის სხვა სიახლეები
;