კორონავირუსი საქართველოსაც უტევს: უმაყურებლოდ ითამაშეთო - ვსჯით წყალბურთელებსა და კალათბურთელებს?!

"ბოლო დროს მთელს მსოფლიოში და მათ შორის საქართველოში განვითარებული მოვლენებიდან გამომდინარე, რაც დაკავშირებულია კორონავირუსის გავრცელების მაღალ რისკებთან, განათლების, მეცნიერების, კულტურისა და სპორტის სამინისტროდან მიღებული რეკომენდაციის საფუძველზე, მიღებულია ერთობლივი გადაწყვეტილება, რომლის მიხედვით, 3 მარტს გასამართი წყალბურთის ჩემპიონთა ლიგის მორიგი ტურის მატჩი თბილისის "დინამოსა" და ფრანგულ კლუბ "მარსელს" შორის, საცურაო აუზ "ოლიმპიკში" ჩატარდეს მაყურებლების გარეშე," - დაწერა თავის "ფეისბუქზე" ჟურნალისტმა ნინო გაბელიამ.
მხოლოდ წყალბურთი? - საკალათბურთო სუპერლიგაშიც უახლოესი ტურის მატჩებზე ქომაგები არ დაიშვებიან - ესეც კულტურის, სპორტისა და განათლების სამინისტროს რეკომენდაციით, ხოლო ახალგაზდულ ლიგებში მატჩები სულაც გადაიდო.

თამაშის გადადება ნებისმიერი სპორტსმენისთვის არასასიამოვნო მომენტია, ის ხომ მთელი კვირის განმავლობაში ემზადება ამა თუ იმ შეხვედრისთვის. თუმცა გადადება კიდევ უკეთესი ფორმაა ცარიელი ტრიბუნების წინაშე თამაშთან შედარებით.

ვფიქრობ, პანიკა იმაზე დიდია, ვიდრე რეალური საფრთხე კორონავირუსისა. ამის ფონზე კი საქართველოს მთავრობა იღებს გადაწყვეტილებას საზოგადოებრივი თავშეყრის ადგილებში მაქსიმალურად შემცირდეს ხალხის რაოდენობა. თუმცა აუცილებელია განვასხვავოთ სპორტული ღონისძიებები სასწავლო პროცესისგან.
თუ სწავლის დროებით შეწყვეტა მოსწავლისთვისაც მისაღებია, მშობლისთვისაც (რომელიც მეტად შეშინებულია, მიუხედავად იმისა, რომ ითქვა - კორონავირუსი ბავშვებს "არ ერჩისო") და მასწავლებლებისთვისაც. სპორტში სხვა სპეციფიკაა: ვერ დამისახელებთ სპორტსმენს, თუნდაც წყალბურთელს, რომლისთვისაც მისაღები იქნება "მარსელთან" მატჩის გულშემატკივრის გარეშე ჩატარება, ცხადია, არც ის ქომაგი დარჩებოდა კმაყოფილი, რომელიც თამაშზე დასწრებას გეგმავდა და ეუბნებიან არ მოხვიდეო...

როგორ ფიქრობთ, ფეხბურთში საქართველო ბელარუსს ხვალ რომ ხვდებოდეს და მთავრობამ 75 ათას ქომაგს (რომლებსაც ბილეთი უკვე შეძენილი აქვთ) გამოუცხადოს - ბილეთის ფულს უკან დაგიბრუნებთ, თამაში ცარიელი ტრიბუნების წინაშე უნდა გაიმართოსო, რა პასუხს მიიღებს?

ეს არ მოხდება! დარწმუნებული ბრძანდებოდეთ, ასეთ შემთხვევაში მატჩი არ ჩატარდება! განა იმიტომ იბრძოლა და იწვალა საქართველოს ფეხბურთელთა ნაკრებმა, იმიტომ დაიკავა ლიგაში პირველი ადგილი, რომ თბილისში 75 ათასიან "დინამო არენაზე" უმაყურებლოდ ეთამაშა?

მოვიყვანეთ ფეხბურთელების მაგალითი, რომლებსაც 26 მარტს ისტორიული მატჩი ელით. რა დააშავეს წყალბურთელებმა, რომლებსაც 75000 თუ არა, თუნდაც 1000 გულშემატკივარი უქომაგებს? პინციპი ხომ იგივეა - სპორტი გულშემატკივრისთვისაა. როცა ამა თუ იმ გუნდის დასჯა უნდათ, ქომაგის გარეშე ათამაშებენ შინაურ არენაზე.

ვფიქრობ, სერიოზული დაფიქრებაა საჭირო. და თუ საქმე უმაყურებლოდ თამაშზე მიდგება, უმჯობესია მატჩი საერთოდ გადაიდოს!

2732
მკითხველის კომენტარები / 1 /
ზურა333
1
მე მგონია რომ ჯობია ბელორუსთან თამაში და ფინალიც უნდა გადადონ 1 თვით და მანამდე კორონაც გაქრება !
მსგავსი ამბები
რუბრიკის სხვა სიახლეები
;