რეალის მწვრთნელად გუტის ამზადებენ? ფანები კი კონტეს ითხოვენ

ესპანური მედიის ინფორმაციით, "რეალის" მწვრთნელმა ხულიენ ლოპეტეგიმ "მარკას" მხარდაჭერა დაკარგა. ცნობილია, რომ პოპულარული მადრიდული გამოცემა, ასე ვთქვათ, "რეალის" გაზეთად ითვლება და მის პოზიციას ხშირად მნიშვნელოვანი როლი აკისრია ამა თუ იმ საკითხის გადაწყვეტაში, მით უმეტეს, როცა ეს ეხება მთავარ მწვრთნელს.

ეს ბოლო ინფორმაცია კი, თითქოს ლოპეტეგიმ "მარკას" მხარდაჭერა დაკარგა, შეიძლება განაჩენის ტოლფასიც აღმოჩნდეს. რა თქმა უნდა, საბოლოო გადაწყვეტილებას ფლორენტინო პერესი მიიღებს, მაგრამ ის აუცილებლად წაიკითხავს ბოლო პუბლიკაციებს.

და რას ამბობენ ამ პუბლიკაციებში? რა თქმა უნდა კარგს არაფერს - გუნდიც და მწვრთნელიც მიწასთან არის გასწორებული. თუმცა მწვრთნელი ყველა დროსა და ეპოქაში მთავარი პასუხისმგებელია და ლოპეტეგიც ვერ იქნება გამონაკლისი. 

"მარკაში" უკვე მრავლად შეხვდებით კარიკატურებსა და ფოტომონტაჟებს, რომლებშიც მწვრთნელს დასცინიან, ხოლო როცა კრიტიკას დაცინვა ცვლის, იქ მთავრდება ყველაფერი. ამას გვასწავლის ცხოვრება.

კიდევ ერთი ინფორმაცია და ესეც "მარკას" ეკუთვნის - ლოპეტეგის ერთ-ერთ სავარაუდო შემცვლელად სახელდება გუტიც - იგივე ხოსე მარია გუტიერესი, ვისაც დიდი წარდგენა არ სჭირდება. გუტი 15 წლის განმავლობაში იცავდა "რეალის" ღირსებას. ის არაერთი დიდი გამარჯვებისა თუ მარცხის თანამოწილეა. რაც მთავარია, მასში "რეალის" სული და ფილოსოფია ტრიალებს. ამგვარ ფაქტორებს ახალი მწვრთნელის დანიშვნის დროს ხშირად ითვალისწინებენ. თუნდაც ჯენარო გატუზოსა და "მილანის" მაგალითი ავიღოთ...

გუტი (ხოსე მარია გუტიერესი)

მაგრამ დავუბრუნდეთ გუტის. მისი საწინააღმდეგო არგუმენტებიც არსებობს. გუტის არ აქვს გრანდებში მუშაობის გამოცდილება. 5 წლის (2013-18) განმავლობაში ის "რეალის" ახალგაზრდულ გუნდს წვრთნიდა, ამ ზაფხულს კი "ბეშიქთაშში" (სადაც 2011 წელს კარიერა დაასრულა) შენორ გიუნეშის თანაშემწედ მუშაობს.

ამავე დროს, საინტერესოა გამოკითხვა, რომელიც "ფუტბოლ ესპანიამ" ჩაატარა. 1070 გამოკითხულიდან 73%-მა მხარი ანტონიო კონტეს დანიშვნას დაუჭირა, რაც საყურადღებო ციფრია. პერესი ამას აუცილებლად გაითვალისწინებს გადაწყვეტილების მიღების მომენტში.

ფანებისგან მხარდაჭერა არ აწყენდა არც პრეზიდენტს, რომელიც თავის დროზე, ლოპეტეგის დანიშვნის გამო, მკაცრად გააკრიტიკეს. თუ პერესს მაშინ რაღაც არგუმენტები ჰქონდა, ახლა მას სათქმელი არაფერი აქვს. 

829
მკითხველის კომენტარები / 0 /
მსგავსი ამბები
რუბრიკის სხვა სიახლეები
;