რეალის შეცდომა, ვალვერდეს რისკი, ქარიშხალი ეგვიპტიდან

2017 წელს განხორციელდა არაერთი საინტერესო ტრანსფერი, რომელმაც ყველას მოლოდინი გაამართლა. მკითხველის სამსჯავროზე გამოგვაქვს გასული წლის ყველაზე სასარგებლო გარიგებები.

რა თქმა უნდა, საფეხბურთო გემოვნება მრავალგვარია, ამიტომ, ამაზე ნუ ვიდავებთ და უბრალოდ გადავავლოთ თვალი გასული წლის გამორჩეულ ტრანსფერებს...

ალვარო მორატა: რეალი-ჩელსი, 62 მლნ ევრო

საჩემპიონო სეზონის შემდეგ "ჩელსი" ვეღარ არის ისეთი მიმზიდველი, როგორც მისგან ელოდნენ. ამის მიუხედავად, ანტონიო კონტეს გაწვრთნილი გუნდი მაინც ინარჩუნებს სახეს.

ამაში კი ძალიან დიდია ალვარო მორატას წვლილი. ახლა უკვე თამამად შეიძლება ითქვას, რომ "სამეფო კლუბი" მაგრად შეცდა, როცა მორატა ინგლისში გაუშვა, ახლა კი ქარიმ ბენზემას შემცვლელს ეძებს...

10-ზე მეტი გოლი ახალ წლამდე - 25 წლის მორატამ "არისტოკრატების" შემადგენლობაში ძალიან მალე იპოვა ადგილი. თუ ის მოუმატებს, კიდევ უფრო მეტ სარგებლობას მოუტანს "ჩელსის". ესპანელმა ნისლიან ალბიონზეც დაამტკიცა თავისი მაღალი კლასი.

მოჰამედ სალაჰი: რომა-ლივერპული, 42 მლნ ევრო

იყო დრო, პრემიერლიგამ არ მიიღო მოჰამედ სალაჰი. ახლა სხვა დრო და სხვა რეალობაა. "ლივერპულის" წარმოდგენა მის გარეშე უკვე შეუძლებელია. მას აქვს ყველა მონაცემი იმისთვის, რომ კიდევ უფრო მოუმატოს. "ეგვიპტელი ქარიშხალი" შეუჩერებელია. რაც მთავარია, 25 წლის სალაჰი ისე თამაშობს, თითქოს მინიმუმ 5 წელი ჰქონდეს გატარებული "ლივერპულში".

ედერსონი:  ბენფიკა-სიტი, 40 მლნ ევრო

"ბენფიკამ" ნაღდად იცის სუპერმეკარეების აღზრდის რაღაც განსაკუთრებული მეთოდი. ამ გუნდში ახლახან დაფრთიანდა იან ობლაკი. ახლა კი 24 წლის ედერსონი გამოჩნდა, რომელიც "სიტიმ" პეპ გვარდიოლას დაჟინებული მოთხოვნით გადაიბირა. თავიდან, მწვრთნელის არჩევანმა ბევრი გააკვირვა, მაგრამ დაიწყო პრემიერლიგა და ედერსონმა ყველას ყველაფერი დაუმტკიცა. ის მაღალია, აქვს შესანიშნავი რეაქცია და, რაც გვარდიოლასთვის ყველაზე მთავარია, შესანიშნავად თამაშობს ფეხით.

პაულიონიო: გუანჯოუ-ბარსელონა, 40 მლნ ევრო

ვარაუდობდნენ, რომ ეს ტრანსფერი ყველაზე ცუდ გარიგებებს შორის უნდა მოხვედრილიყო. როგორი საქმეა, როცა 29 წლის ფეხბურთელის სანაცვლოდ 40 მილიონ ევროს იხდი და თან ამ ფეხბურთელს ბოლო ორი სეზონი ჩინეთის ჩემპიონატში აქვს გატარებული.

"ბარსელონას" მთავარმა მწვრთნელმა ერნესტო ვალვერდემ ძალიან გარისკა და ამ რისკმა აშკარად გაამართლა. ახლა "ბარსელონას" საყრდენ ზონაში სერხიო ბუსკეტსი მარტო აღარ არის.

ნემანია მატიჩი: ჩელსი-მანჩესტერი, 44.7 მლნ ევრო

"ჩელსი", ალბათ, ნანობს სერბი საყრდენის გაყიდვას. სხვა საქმეა, რომ ნემანია მატიჩი ერთი თავით მაღლა დგას ტიემუ ბაკაიოკოზე. მეორე მხარეა ის, რომ მატიჩი "არისტოკრატთა" ერთ-ერთმა მთავარმა კონკურენტმა, "მანჩესტერმა" ჩაიგდო ხელში.

ბევრი მიიჩნევს, რომ ჟოზე მოურინიოს გაწვრთნილი გუნდი კიდევ უფრო არასტაბილურად ითამაშებდა, რომ არა 29 წლის მატიჩის შესანიშნავი გარჯა "წითელი ეშმაკების" შუა ხაზში.

სიმონე ძაძა: იუვენტუსი-ვალენსია, 16 მლნ ევრო

"ვალენსია" გაცოცხლა და ამაში ძალიან დიდია 26 წლის სიმონე ძაძას როლი. არადა, "იუვენტუსში" ჩაგდებული პერიოდის შემდეგ ის ძალიან ბევრს მიავიწყდა კიდეც. მხოლოდ ერთ სტატისტიკურ მაჩვენებელს მოვიყვანთ: ამ დროისთვის, ლა ლიგაში მასზე მეტი მხოლოდ ლიონელ მესიმ გაიტანა. არადა, ვინ ელოდა, რომ "ვალენსია" პირველ ოთხეულში იქნებოდა და ერთი ხანობა, თვით "ბარსელონასაც" გაუწევდა კონკურენციას.

გაბრიელ ჟეზუში პალმეირასი-სიტი, 32 მლნ ევრო

20 წლის ასაკში მან ცხოვრება გაუმწარა სერხიო აგეუროს. გარდა ამისა, ის იქცა ერთ-ერთ მთავარ რისხვად "სიტის" მოწინააღმდეგეებისთვის. მუნდიალზე ბრაზილიის ნაკრებში თავისი წონადი სიტყვა უნდა თქვან "ახალი ტალღის" ფეხბურთელებმა და მათ შორის ერთ-ერთი პირველი სწორედ გაბრიელ ჟეზუშია.

ყოველდღიური სპორტული გაზეთი "ლელო"
1233
მკითხველის კომენტარები / 0 /
მსგავსი ამბები
რუბრიკის სხვა სიახლეები
;