რევაზ თევდორაძე: ჯერ ბრძოლა დამთავრებული არ არის...

რევაზ თევდორაძე ყველა ასაკობრივი ნაკრების წევრი და ეროვნული გუნდის წევრობის კანდიდატი იყო.

ის თბილისის "ლოკომოტივში" 2015 წლიდან თამაშობს და ოთხი სეზონის განმავლობაში კლუბის მაისურით 70-ზე მეტი მატჩი ჩაატარა.

"რკინიგზელთა" ვებგვერდთან ვრცელ ინტერვიუში 30 წლის გამოცდილი მეკარე ბევრ საინტერესო თემაზე ლაპარაკობს - გუნდზე, კარიერაზე, კერპზე... იმაზე, თუ რა შეიცვალა ეროვნულ ლიგაში და სად გვაქვს პრობლემები?..

"წლევანდელი სეზონი "ლოკომოტივმა" ახალი გუნდით, ახალგაზრდული შემადგენლობით დაიწყო. თავიდან არასტაბილურად ვთამაშობდით, მაგრამ მერე ვითარება გამოსწორდა. დარჩენილია 7 ტური და, ჩემი აზრით, სეზონს კარგად დავასრულებთ", - ამბობს რევაზ თევდორაძე.

გამოცდილი მეკარის თქმით, გუნდმა ბოლოადგილოსნებთან გაუმართლებლად ბევრი ქულა დაკარგა: "რა თქმა უნდა, სამწუხაროა, აუტსაიდერებთან ქულები რომ დავკარგეთ. მაგრამ ეს ფეხბურთია, წლევანდელ სეზონში ბევრი მოულოდნელობა მოხდა. ვერ გაიგებ, ვინ ვის მოუგებს... ფეხბურთისთვის ჩვეულებრივი ამბავია, ზედა სამეულის გუნდს რომ მოუგებ და გასავარდნებთან ქულებს დაკარგავ. არადა, ასეთ გუნდებთან 18 ქულა დავკარგეთ".

თევდორაძემ "ლოკომოტივში" გამოსვლაზეც ილაპარაკა: "მეოთხე სეზონია, რაც "ლოკომოტივში" ვარ და ამ გუნდმა საკმაოდ ბევრი მომცა. ეს პატარა პერიოდი არ არის, რომ გაიზარდო.

მეკარეების მწვრთნელ კოტე გუგუნავასთან ერთად საკმაოდ ნაყოფიერი პერიოდი გავიარე. მან ბევრი რამ მასწავლა და მიმაჩნია, რომ თავის კოლეგებში შორის ერთ-ერთი საუკეთესო სპეციალისტია. დარწმუნებული ვარ, შემდეგი სეზონი "ლოკომოტივისთვის" ბევრად უფრო წარმატებული იქნება და დიდი იმედი მაქვს, ევროთასებზე გამოსვლის უფლებასაც მოვიპოვებთ".

რაც შეეხება გუნდში ჩატარებულ 70 მატჩს: "უპირველესად, მადლობა მინდა გადავუხადო იმ მწვრთნელებს, რომლებიც მენდობოდნენ და მათამაშებდნენ. ბევრი კარგი თამაში იყო ამ 70-დან, თუმცა არ მინდა, რომელიმე გამოვყო. შედეგს გუნდი უფრო აღწევს, ვიდრე ერთი კონკრეტული ფეხბურთელი ან თუნდაც მეკარე, თუმცა, ბევრი კარგი თამაში მახსენდება და ბედნიერი ვარ, რომ ეს თამაშები "ლოკომოტივის" მაისურით ჩავატარე".

თევდორაძეს გუნდის მთავარ მწვრთნელ ლაშა ჭაღიაშვილზეც ჰკითხეს: "დიდი ხანია, რაც ლაშას ვიცნობ. გუნდში რომ მოვედი, სამწვრთნელო შტაბში იყო. ახალგაზრდა, ენერგიული და, რაც მთავარია, მიზანდასახული სპეციალისტია. მისი ერთ-ერთი დიდი პლუსი ისაა, რომ ფეხბურთელებთან ხშირი ურთიერთობა აქვს".

გამოცდილმა კიპერმა ეროვნულ ლიგაზეც ილაპარაკა: "ორი წელია, რაც ეროვნული ლიგა იმართება. ყველაზე მთავარი და კარგი თავად ჩემპიონატის შეფუთვა, სატელევიზიო გაშუქებაა. პირდაპირი ტრანსლაციებით მაყურებლისთვის ლიგის თამაშები უფრო ხელმისაწვდომი გახდა. რა თქმა უნდა, ძალიან ცუდია, რომ რეგიონებში სტადიონები მოწესრიგებული არ არის და იქ თამაშები არ ტარდება. თუმცა, ჩემი აზრით, ძალიან კარგი ახალი წესია, რომ თამაშები ხელოვნურ საფარზე აღარ იმართება.

წინა სეზონებთან შედარებით ბევრი რამ გამოსწორდა და დალაგდა. გახსოვთ, როგორი დაძაბული იყო წინა სეზონი... წელსაც ასეა... დარჩენილ მატჩებში მაქსიმუმს გავაკეთებთ იმისთვის, რომ რაც შეიძლება მაღალი ადგილი დავიკავოთ. ასევეა ყველა დანარჩენი გუნდი, ჯერ ბრძოლა დამთავრებული არ არის".

თევდორაძემ საკუთარ კოლეგებსა და კერპზეც ილაპარაკა: "მეკარეობა ბავშობიდან მომწონდა, კარში კი 10 წლიდან ჩავდექი. ჩემზე ძალიან დიდი შთაბეჭდილება პიტერ შმეიხელმა მოახდინა.

მართალია, დიდი ხანია, რაც კარიერა დაამთავრა, მაგრამ ის დღემდე ჩემი კერპია. დღეს ევროპაში მეკარეთა კლასმა საკმაოდ აიწია. ახლა სხვა მოთხოვნებია და განსაკუთრებული აქცენტი ფეხით თამაშზე კეთდება. დიდი პლუსია, როცა მეკარეს ფეხით კარგად თამაში შეუძლია.

ეროვნულ ლიგასა და საქართველოს ნაკრებშიც საკმაოდ კარგი მეკარეები გვყავს და მიხარია, ჩვენს ეროვნულ გუნდში მეკარეების პრობლემა რომ არ არის".

ყოველდღიური სპორტული გაზეთი "ლელო"
863
მკითხველის კომენტარები / 1 /
giviko
0
magari mekarea tevdoradze
მსგავსი ამბები
რუბრიკის სხვა სიახლეები
;