რევაზ ჩელებაძე: გამოჩნდა ეს გიჟი ბავშვი და გუნდმა მოგებები დაიწყო...

ლეგენდარული ფეხბურთელი, ქობულეთის "შუქურას" დირექტორი რევაზ ჩელებაძე ერთა ლიგაში საქართველოს ნაკრების გამოსვლაზე, გიორგი ჩაკვეტაძესა და ქართული ფეხბურთის წინსვლის რესურსზე გველაპარაკა...

ჩელებაძეს ნაკრების წარმატება აიმედებს: ეს ბიზნესს ფეხბურთისკენ გამოახედებს

- რა თქმა უნდა, ერთა ლიგაში საქართველოს ნაკრების გამოსვლაა დღეს მთავარი თემა და ჩვენც ამით უნდა დავიწყოთ...

- მე რაღა უნდა ვთქვა - ბრწყინვალე თამაში და ბრწყინვალე შედეგია! ტაბლომ ყველაფერი მშვენივრად თქვა. უეფამ საჩვენოდ მშვენიერი ტურნირი მოიგონა, ევროპის ჩემპიონატზე გამოსვლის შანსი გაგვიჩნდა... ნეტავ, იმ დღეს მომასწრო! ისიც გამოჩნდა, რომ ამ დონეზე ყველა მეტოქეს აშკარად ვჯობნით - ლატვიასაც, ყაზახეთსაც... ანდორაზე აღარაფერს ვამბობ. ყველაზე მნიშვნელოვანი მაინც ის იყო, რომ ჩვენი მოთამაშეები ძალიან ნიჭიერები არიან. აი, ეს დავინახეთ ყველამ.

- ფაქტია, გუნდი უცებ ათამაშდა. თქვენი აზრით, რა გახდა ამის მიზეზი?

- ჩვენი გუნდი ისედაც საკმაოდ კარგად თამაშობდა. დააკვირდით, სკამიდან ვინც შედის, ისინიც ძირითადების დონეზე თამაშობენ. ანუ საკმაოდ თანაბრად დაკომპლექტებული გუნდი გვყავს. მაგრამ გუნდს აქამდე "რაღაც" აკლდა, უფრო სწორედ - "ვიღაც". ეს "ვიღაც" ჩაკვეტაძეა. გამოჩნდა ეს გიჟი ბავშვი და გუნდმა მოგებები დაიწყო!

შრომას ასევე თავდახრილი თუ გააგრძელებს, დიდ ფეხბურთს ითამაშებს და თავის გვარს ჩვენი და მსოფლიო ფეხბურთის ისტორიაში ოქროს ასოებით ჩაწერს. ოთხიდან 3 მატჩის ბედი მან ინდივიდუალურად გადაწყვიტა. რეალურად რომ ავიღოთ, ყაზახები ერთ მომენტში მაგრად მოგვაწვნენ და სწორედ ამ დროს გაიტანა გიორგიმ ის ისტორიული გოლი. მერე მეორე საგოლე შეტევაშიც ჰქონდა წვლილი. თბილისში ლატვიასთან იყო და, პენალტი აიკიდა, რიგაში ისევ გოლი და საგოლე პასი!

- თქვენი თაობის ფეხბურთელები ასე ახალგაზრდებს თითქმის არ აქებთ...

- იმიტომ, რომ ჩვენ ვიცით რეალურად კარგი მოთამაშის ფასი და ტყუილად არავის შევაქებთ. ამ ბავშვს რომ ვუყურებ, მიხარია და მინდა, სულ ვუყურო და მისი თამაშით ვისიამოვნო. "ბარსელონაში" მესი რომ არ თამაშობს, ტელევიზორს სხვა არხზე ვრთავ. ჩაკვეტაძე ისეთი მოთამაშეა, რომელიც საქართველოს ნაკრებს გულშემატკივარს შემატებს. ძლივს არ გამოჩნდა?!.

- თქვენი აზრით, ნაკრების პროგრესი მხოლოდ ჩაკვეტაძის ინდივიდუალიზმის შედეგია?

- არა, რა თქმა უნდა, ეს არ მიგულისხმია. ვაისმა გუნდს ხელი დაატყო. ნაკრებს ორგანიზაცია და დისციპლინა აქვს, გამოცდილი და ახალგაზრდა მოთამაშეების კარგი სინთეზია, გუნდი თანამედროვე ფეხბურთს თამაშობს... მაგრამ ჩაკვეტაძე ამ გუნდის, როგორც იტყვიან ხოლმე, მარილია. გუნდს ასეთი შემსრულებლები სჭირდება. უბრალოდ, ერთი თხოვნა მექნება გიორგისთან - თავში არ აუვარდეს და პროგრესი გააგრძელოს. ასე ჩვენც გაგვახარებს და საკუთარ კარიერასაც მაღალ დონეზე აიწყობს.

- ერთა ლიგის ჯგუფში გამარჯვებას "ქართული სპორტის ქომაგების" ლიდერი სახალისო და სარკასტული ფრაზით გამოეხმაურა - ფეხბურთს როდის ვაუქმებთო?! დამეთანხმებით, პერმანენტული წარუმატებლობების გამო მსგავსი იდეები ბევრს აწუხებდა...

- მე კი ყველა მათგანს ვეტყვი - ქართული ფეხბურთი არასოდეს დაიმარხება! ამაზე ტყუილად ოცნებობდნენ. ახლა მაინც გამოჩნდა, რომ ფეხბურთია ჩვენი თამაში და ყველაზე დიდი სიხარულის მომტანი. ხომ ამბობდნენ, ადრე სტადიონები საქართველოს ნაკრების გამო კი არ ივსებოდა, ხალხი გრანდების სანახავად მოდიოდაო. ლატვიასა და ანდორასთან თითქმის გაივსო სტადიონი და მაინტერესებს, ამათგან რომელია გრანდი? საქართველოში ფეხბურთი უზომოდ უყვართ და ხალხი პატარა ბიძგს ელოდა, სტადიონისკენ რომ შემობრუნებულიყო. ანდორის დონის ნაკრები სხვა სახეობაში რომ გვესტუმროს, 5000 კაცი მაინც თუ დაინტერესდება?

- ...მაგრამ სასურველი დონისგან ჯერ ძალიან შორს ვართ, განსაკუთრებით - საკლუბო დონეზე...

- ამისთვის გვინდა სწორედ ისეთი კაცები, რომლებიც ფეხბურთში ფულს დააბანდებენ. მანამდე ჩვენი კლუბები წამებაში იქნებიან და ყველა ფეხბურთელს თვალი გაქცევაზე ექნება. ასე გუნდების შენება შეუძლებელია.

- გამოჩნდა, რომ ყაზახეთის ფეხბურთი, ლეგიონერების გარეშე, სანაკრებო დონით იმაზე ბევრად უკეთესი არ არის, რაც 10-20 წლის წინ იყო. ეს დამაიმედებელია საკლუბო დონეზეც. შედარებით მცირე ინვესტიციით მათი დონის კლუბების ჩამოყალიბება შესაძლებელი იქნება...

- ყაზახური და აზერბაიჯანული კლუბების ბიუჯეტების 20-25 პროცენტიც რომ გვქონდეს, მათზე ბევრად უკეთესი შედეგები გვექნება და ყოველ წელს ჩვენი გუნდები ევროპისა და ჩემპიონთა ლიგის ჯგუფებში ითამაშებენ.

- დარწმუნებული ბრძანდებით?

- აბსოლუტურად! ჩვენს უმაღლეს ლიგაში მინიმალური ბიუჯეტი 5 მილიონი ლარი გახდეს, პირველში კი - 3 მილიონი, დონე მკვეთრად გაიზრდება. ამაში პირადად დარწმუნებული ვარ. ახლა სტადიონები არაა და ფეხბურთის ფედერაცია წვალობს, მწირი შემოსავლებით რეგიონებში მოედნები რომ დააგოს.

- თქვენი აზრით, სანაკრებო წარმატება ბიზნესს ფეხბურთისკენ გამოახედებს?

- ძნელი სათქმელია. ამბობდნენ, ჩვენი ნაკრები ისეთი სამარცხვინოა, მაქეთ გახედვა არ გვინდაო. ახლა ხომ აღარაა სამარცხვინო?! გამოიხედონ, ქართულ ფეხბურთს ფეხზე დასაყენებლად საფუძვლის შექმნა უნდა, ეს კი ბავშვთა ფეხბურთიდან და კლუბებიდან იწყება. ჩვენ ფეხბურთის ნიჭი გვაქვს და ამას ფულიც თუ დაემატება, მკვეთრი წინსვლა აუცილებლად იქნება.

ყოველდღიური სპორტული გაზეთი "ლელო"
5734
მკითხველის კომენტარები / 0 /
მსგავსი ამბები
რუბრიკის სხვა სიახლეები