თავდასხმა?! რა იყო რევაზ ჩელებაძის აზრით ყველაზე პრობლემური საქართველოს ნაკრებში?

საქართველოს ნაკრებს თავში ხელს ვეღარავინ წამოარტყამს

რევაზ ჩელებაძემ ევროპის 2020 წლის ჩემპიონატის საკვალიფიკაციო ეტაპის წილისყრის შედეგები დადებითად შეაფასა. დუბლინური ამბების შემდეგ "ლელომ" თბილისის "დინამოს" ლეგენდარულ ფორვარდ რევაზ ჩელებაძეს კომენტარი სთხოვა:

შეგახსენებთ, რომ საქართველოს ნაკრები D ჯგუფში მოხვდა, სადაც ჩვენი მეტოქეები არიან შვეიცარია, დანია, ირლანდია და გიბრალტარი. ჩელებაძე იმედოვნებს, რომ შესარჩევის სტარტის წინ ეროვნულ გუნდს ყველა სასურველი მოთამაშე დაუბრუნდება.

- როგორ შეაფასებთ საქართველოს ნაკრების ჯგუფს?

- გიბრალტარს თუ არ ჩავთვლით, ყველა რთული მეტოქეა. მაგრამ ბევრად უარესებიც შეიძლებოდა შეგვხვედროდა.

- მაგალითად?

- მაგალითად ის, რომ ჩვენი მეტოქე არ არის არცერთი მსოფლიოს ჩემპიონი და თუნდაც ბოლო მუნდიალის არცერთი გამორჩეული გუნდი. ავცდით საფრანგეთს, გერმანიას, ინგლისს, იტალიას, ხორვატიას, პორტუგალიას, ჰოლანდიას და ესპანეთს. ეს უკვე დიდი პლუსია.

- მეორე კალათიდან დანია გვერგო...

- იმ კალათაში გაცილებით უსიამოვნო მეტოქეებიც მეგულებოდა და ვერ ვიტყვი, რომ დანია იმათგან ყველაზე ცუდი ვარიანტია. მთავარია, გუნდს ყველა ტრავმირებული მოთამაშე დაუბრუნდეს.

- ამის გამო, ფაქტობრივად, ერთა ლიგაში მხოლოდ ერთი თავდამსხმელით ვითამაშეთ...

- სამწუხაროდ, ასეა. ერთა ლიგის შესარჩევი ციკლის თამაშები ისე ჩავატარეთ, ბევრი ლიდერი არ გვყოლია. ქვილითაიამ და ოქრიაშვილმა მხოლოდ ერთი შეხვედრა ჩაატარეს და ისევ დაშავდნენ. საერთოდაც, ბევრი ტრავმირებული ფეხბურთელი გვყავდა - ანანიძე, მჭედლიძე, პაპუნაშვილი, უთამაშებლები იყვნენ გვილია და ლორია. ეს პრობლემები შესარჩევი ეტაპის დაწყებამდე მოგვარებადია და დარწმუნებული ვარ, უფრო ძლიერი ნაკრები გვეყოლება, ვიდრე ერთა ლიგაზე გვყავდა.

- რას ხედავთ დღევანდელ ნაკრებში დამაიმედებელსა და პრობლემურს?

- ჩვენს გუნდს ძალიან კარგი სამი ცენტრალური მცველი ჰყავს და ამ პოზიციაზე არ ვდარდობ. ნახევარდაცვის ზონაზეც იმავეს ვიტყვი, სადაც ჯაბა კანკავასი მეიმედება. მაგრამ, ჩემი აზრით, დაცვის ფლანგებზე მეტი საიმედო თამაშია საჭირო და ამ კუთხით უნდა მოვუმატოთ. თავდასხმა კი ჩვენი მთავარი პრობლემა იყო ამ ერთა ლიგაზე.

დიდი იმედი მაქვს, რომ კაჭარავა მოუმატებს, მას ამის პოტენციალი ნამდვილად აქვს. მჭედლიძისა და ქვილითაიას დაბრუნება კი გუნდს საგრძნობლად დაეტყობა. საერთოდ, ნაკრების ბოლოდროინდელმა თამაშებმა დამაიმედა, რადგან ისეთი მოთამაშე გამოგვიჩნდა გიორგი ჩაკვეტაძის სახით... დარწმუნებული ვარ, საქართველოს ნაკრებს თავში ხელს ვეღარავინ წამოარტყამს. მჯერა, პირველობისთვის თუ ვერ ვიბრძოლებთ, ღირსეულად მაინც ვითამაშებთ.

ყოველდღიური სპორტული გაზეთი "ლელო"
3860
მკითხველის კომენტარები / 0 /
მსგავსი ამბები
რუბრიკის სხვა სიახლეები