რევაზ ჩელებაძე მწვრთნელზე, ჩაკვეტაძესა და პრობლემებზე: გუცაევი გამახსენდა, ლატვიასთან ისეთი პენალტი მოიპოვა...

ლეგენდარული თბილისის "დინამოს" თავდამსხმელ რევაზ ჩელებაძეს ჩვენი ნაკრების თამაშების შეფასება და ანალიზი ვთხოვეთ. ის საინტერესოდ ლაპარაკობს განვლილ მატჩებზე, ჩვენი გუნდის დადებით და უარყოფით მხარეებზე, პერსპექტივაზე...

- საინტერესო იქნება განვლილ შეხვედრებზე თქვენი აზრის მოსმენა. საქართველოს ნაკრების თამაშებს როგორ შეაფასებდით?

- ბედნიერი ვარ და სიგიჟემდე მიხარია, ეს შესარჩევი ციკლი წარმატებით რომ დავიწყეთ. ადრე სულ გულდაწყვეტილები და ნირწამხდრები ვიყავით, რადგან ვერასოდეს მნიშვნელოვანი ვერაფერი მოვიგეთ. არადა, საფეხბურთო ქვეყანა ვართ, დიდი წარმატებები გვქონდა... ახლა ყველას ხასიათი გამოგვიკეთდა, ფეხბურთს მართლა დიდი ძალა აქვს - ორი მოგებით ხალხი ფეხბურთისკენ შემოტრიალდა. ყველაზე ზუსტი შეფასებაც სწორედ ეს არის - ხალხის რეაქცია.

- თუმცა გადამწყვეტი მატჩები ჯერ კიდევ წინ არის...

- მთავარია, ნაკრებს მწვრთნელის ხელი ეტყობა და ბიჭების დამოკიდებულებაც მომეწონა, გუნდი ბოლომდე იბრძვის. გიორგი ჩაკვეტაძეზე კი ცალკე ვიტყვი - მიხარია, რომ ეს ბიჭი ნაკრებში გამოჩნდა. გუნდს ახალი სისხლი შემატა, შეტევა უფრო მწვავე და აგრესიული გახადა... იმედია, მომავალშიც ასეთივე თავმდაბალი და შრომისმოყვარე იქნება. მიმაჩნია, რომ ევროპაშიც დროულად წავიდა და თუ ასე გააგრძელებს, დიდ ფეხბურთს ითამაშებს. რაც მთავარია, შეუძლია, ქართული ფეხბურთის ისტორიაში ერთ-ერთი გამორჩეული მოთამაშე გახდეს.

- ცალკეულ თამაშებზეც ვილაპარაკოთ...

- ყაზახეთში უფრო მეტი დადებითი ემოცია იყო და უფრო დამაჯერებლადაც ვაჯობეთ. ლატვიასთან კი გაგვიჭირდა და ბევრიც ვინერვიულე. ბოლო წუთებზე იმდენი კუთხური ჩამოგვიწოდეს... ამის უფლება არ უნდა მიგვეცა. ისიც გამიკვირდა, ამ დროს ბურთს კუთხურზე რომ ვაგდებდით - ხომ შეიძლებოდა, აუტზე მოგვეგერიებინა?.. რეალურად, ეს ორივე შეხვედრა რომ მოვიგეთ, ამაში დიდი როლი ჩაკვეტაძის ინდივიდუალურმა ქმედებებმა შეიტანა. გუცაევი გამახსენა, ლატვიასთან ისეთი პენალტი მოიპოვა...

- და მაინც, რატომ გაგვიჭირდა ლატვიასთან ბოლო წუთებზე ბურთის გაკონტროლება?

- უცებ რომ შემოგვიტიეს, ეტყობა, ასეთი შემოტრიალება მოულოდნელი იყო. ჩემი აზრით, ამ შეხვედრას სერიოზული შეფასება სჭირდება, რომ მომდევნო მატჩები უკეთ ჩავატაროთ. რამდენიმე ეპიზოდში გიორგი ლორიამ გადაგვარჩინა, რამდენჯერმე - ცენტრალურმა მცველებმა - კვირკველიამ და კაშიამ. ჩემდა გასაოცრად პრობლემები ფლანგებზე შეიქმნა, სადაც პოზიციური შეცდომებიც მოგვდიოდა. არადა, კაკაბაძეს და ნავალოვსკის ბევრად მეტი შეუძლიათ და მჯერა, შემდეგ შეხვედრებს ბევრად უკეთაც ჩაატარებენ.

- ნახევარდაცვის თამაშზე რას იტყვით?

- ბიჭებმა ბოლო წამამდე იშრომეს და თავი დადეს. შეტევაშიც აქტიურები ვიყავით და მთლიანობაშიც, ვხედავ, მწვრთნელმა ძალიან დიდი სამუშაო გასწია და გუნდს ხელი დაატყო. დარწმუნებული ვარ, ამ ეტაპს მოვიგებთ. ამ დივიზიონში ერთი-ერთი გამორჩეული ნაკრები საქართველოა. უკეთესს ვერ ვხედავ.

- მომატების პოტენციალს თუ ხედავთ?

- რა თქმა უნდა, ვხედავ. ჯერ ერთი, რამდენიმე წამყვანი ფეხბურთელი გვაკლდა, რომლებიც ფორმას აღიდგენენ და გუნდს კიდევ უფრო გააძლიერებენ. საერთოდ, იცით, რა მგონია? ევროპის ჩემპიონატზე რომ გავიდეთ, ხელწამოსაკრავი გუნდი იქაც არ ვიქნებით. ქართულ ფეხბურთს ამის პოტენციალი ნამდვილად აქვს.

ერთა ლიგაზე უკეთესი შანსი ჩვენ არასოდეს გვქონია და ეს შესაძლებლობა აუცილებლად უნდა გამოვიყენოთ. სირცხვილია, ლატვიასა და ყაზახეთს კონკურენტებად ვთვლიდეთ. პირადად მე მათ რეალურ მეტოქეებად ვერც აღვიქვამ და არც განვიხილავ. სად იყვნენ მაშინ ლატვიელები და ყაზახები, როცა თბილისის "დინამო" საბჭოთა კავშირის ისტორიაში შედეგებით მეოთხე გუნდი იყო, უმაღლეს ლიგაში ორი გუნდიც გვყოლია...

ამას გარდა, საქართველო საბჭოთა კავშირის ჩემპიონატებში შედეგებით მესამე ქვეყანაა რუსეთისა და უკრაინის გუნდების შემდეგ. ამას წარსულის მონატრების გამო არ ვამბობ, უბრალოდ, ფაქტია, რომელიც ქართული ფეხბურთის პოტენციალზე მეტყველებს. ჩვენ ეს უნდა ვიცოდეთ და გვჯეროდეს.

ყოველდღიური სპორტული გაზეთი "ლელო"
3883
მკითხველის კომენტარები / 0 /
მსგავსი ამბები
რუბრიკის სხვა სიახლეები