რევაზ ძოძუაშვილი: ეს სულ სხვა ეტაპია ჩვენი ნაკრების ცხოვრებაში...10 წინ და 10 უკან! ასე უნდა ვეთამაშოთ შვეიცარიას! [მინი-რუბრიკა]

23 მარტს საქართველოს ეროვნული ნაკრები ევროპის ჩემპიონატის ახალ შესარჩევ ციკლს იწყებს. სულ ცოტაც და, ისევე, როგორც ჩვენს ბანაკში, მეტოქეთა შორისაც ატყდება საქმიანი ფაციფუცი, დასახელდება შემადგენლობები, გაკეთდება კომენტარები და ასე შემდეგ...

მანამდე კი “ლელო” მინი-რუბრიკას იწყებს, რომლის მიზანია, უფრო ახლოს გავიცნოთ საქართველოს ნაკრების თითოეული მეტოქე. მოგეხსენებათ, ჩვენი პირველი ოპონენტი შვეიცარიაა. რესპონდენტი კი ისეთი ავარჩიეთ, ვერავინ დაგვიწუნებს - შვეიცარიას ლეგენდარული ფეხბურთელი, საქართველოს ნაკრების ყოფილი მწვრთნელი რევაზ ძოძუაშვილი გაგვიშიფრავს...

სხვა ეტაპი იწყება!

- შესანიშნავი რუბრიკაა და სიამოვნებით გავხსნი მას. იქნებ, შევძლოთ და ერთი “საგოლე პასი” ჩვენც მივაწოდოთ ნაკრებს, სამწვრთნელო შტაბს... საქართველოს ნაკრებმა ერთა ლიგა დამაჯერებლად მოიგო. ჩვენ ვნახეთ ეროვნული გუნდის მიერ ნათამაშები ტაქტიკურად სწორი ფეხბურთი. პირველი ადგილი ძალიან რთული მისაღწევია, იოლად არასოდეს მოდის. ამდენად, კიდევ ერთხელ დავაფასოთ ის, რასაც მივაღწიეთ...

ახლა კი იწყება ევროპის ჩემპიონატის შესარჩევი ციკლი და სრული პასუხისმგებლობით შემიძლია ვთქვა, რომ ეს სულ სხვა ეტაპია ჩვენი ნაკრების ცხოვრებაში. მიუხედავად ამისა, მჯერა, ჩვენს გუნდს შეუძლია, ამ შესარჩევში წარმატებით ითამაშოს...

რა თქმა უნდა, მე მჯერა, რომ სამწვრთნელო შტაბი ამ გამართულ და კარგ ტაქტიკას კიდევ შემატებს რაღაც ნიუანსებს - რაღაც სიახლეებს, რომელიც გამოგვადგება.

ჩვენ ვხედავთ, როგორ თამაშობენ დღეს ევროპული ტოპკლუბები. ესაა თანამედროვე ფეხბურთი! “რეალი”, “პარი სენ-ჟერმენი”, “ტოტენჰემი” - ეს გუნდები პრესინგზე აგებენ თამაშს, მეტოქის ნახევარზევე “ახრჩობენ” მოწინააღმდეგეს... მიხარია, რომ საქართველოს ნაკრებმაც დაიწყო პრესინგის თამაში და ძალიან გამიხარდება, თუ ეს პრესინგი კიდევ უფრო “ზემოთ”, მეტოქის საჯარიმოსთან აიწევს.

საქართველოს გუნდების თამაშები ვნახე მოსამზადებელ ეტაპზე და მართალი გითხრათ, კმაყოფილი დავრჩი. “ზემოთ” ცდილობენ ფეხბურთის თამაშს და მეტოქის “მოხრჩობას”. ამის გარეშე დღეს არაფერი გამოდის.

საქართველოს ჩემპიონატი იწყება სულ მალე და შანსი არ არის, იქაც არ გამოჩნდეს ისეთი ფეხბურთელი, რომელიც ეროვნულ გუნდს გამოადგება. პრინციპში, საქართველოს ჩემპიონატიდან არ გამოჩნდა გიორგი ჩაკვეტაძე? ახლაც უნდა “შემოვარდეს” ვიღაც, კიდევ უნდა გააძლიეროს ნაკრები - ასეთი შეგრძნება მაქვს მე პირადად...

ევროპულად აწყობილი, ანუ კითხვები დაცვის ხაზთან

- შვეიცარიის ნაკრები შეიძლება სტატუსით არ არის გრანდი, მაგრამ სათამაშო ორგანიზაციით ახლოს დგას მათთან. ძალიან ბევრი თამაში მინახავს მათი ამ ბოლო დროს და უნდა გითხრათ, ასე გუნდურად მოთამაშე ნაკრები დღეს ბევრი არ არის - იმ პირობებშიც კი, როცა ევროპაში გუნდური ფეხბურთის ზეიმია.
ისეთი ნაკრებია, თავს აბსოლუტურად არავის დააჩაგვრინებს. ერთა ლიგის ბოლო ტურში რა დამართა ბელგიას, ყველამ ერთად ვნახეთ. შანსი არ არის, ეს სუსტ ნაკრებს მოეხერხებინა - ვერავითარ შემთხვევაში ვერ იზამდა ამას!

ყველა სათამაშო რგოლში ძლიერები არიან, განსაკუთრებით - ნახევარდაცვასა და თავდასხმაში. სწორედ აქ არიან თავმოყრილნი გუნდის საუკეთესო შემსრულებლები, რომლებზეც მერე ვიტყვი...

მანამდე კი ეს მინდა ვთქვა - შვეიცარიის ნაკრების თამაშის გაანალიზებისას, შედარებით მეტი კითხვა ჩნდება დაცვის ხაზთან. ესეც პირობითად, თორემ აქაც ძალიან მაღალი კლასის ფეხბურთელები არიან - ლიხტშტაინერი, როდრიგესი, შერი...

ჩავწვდეთ მეტოქის საიდუმლოს...

- საქართველოს ნაკრების წევრები, ოთარ კაკაბაძე და ლევან ხარაბაძე, შვეიცარიის ჩემპიონატში თამაშობენ. ეს არის ძალიან მნიშვნელოვანი მომენტი და ღრმად ვარ დარწმუნებული, საქართველოს ნაკრების სამწვრთნელო შტაბი ამას გამოიყენებს.

როცა ფეხბურთელი ადგილზე იცნობს ვითარებას, სულ სხვა საქმეა. მათ შეიძლება გვითხრან ისეთი საიდუმლოებები, რაც სხვამ საერთოდ არ იცის. დარწმუნებული ვარ, ყაზახეთი ორჯერ რომ დავამარცხეთ, ამაში ძალიან მნიშვნელოვანი იყო ამ ქვეყნის ჩემპიონატში მოასპარეზე ლეგიონერების წვლილი. მათ ყველაფერი იცოდნენ ამ გუნდის თაობაზე...

როგორ ვეთამაშოთ?

- ჯერ ერთი, შვეიცარიის ნაკრები ისედაც ძლიერი გუნდია და ის კიდევ უფრო ძლიერი ხდება, როცა თავისუფლად თამაშისა და იერიშების დაწყების საშუალებას აძლევ. ჩემი აზრით, თბილისურ შეხვედრაში საქართველოს ნაკრებმა რაც შეიძლება “მაღალი” პრესინგი უნდა ითამაშოს.

ჩემპიონთა ლიგაზე სულ ცოტა ხნის წინ იყო “აიაქსისა” და “რეალის” მატჩი. ამ შეხვედრაში “აიაქსმა” გვაჩვენა, თუ როგორ უნდა ითამაშო იდეალური პრესინგი. მათ ტოტალური ფეხბურთი გააცოცხლეს და ეს ძალიან კარგი იყო.

სხვა საქმეა, რომ მეორე ტაიმში “რეალის” სამწვრთნელო შტაბმა კარგი ცვლილებებითა და გონივრულად არჩეული ტაქტიკით შემოატრიალა თამაში და ყველაფრის თავიდა თავი ამ შემთხვევაში ის იყო, რომ... თვითონ “რეალმა” დაიწყო “მაღალი” პრესინგის თამაში.

10 წინ და 10 უკან - ჩემი აზრით, ასე უნდა ვეთამაშოთ შვეიცარიას! ასე თამაშობენ ისინი. ყველა უტევს და ყველა თავს იცავს. მარტო ფლანგელი მცველები როგორ ერთვებიან შეტევაში, თუმცა საქართველოს ნაკრების ფლანგელ მცველებზე კარგის მეტს ვერაფერს ვიტყვით.

ჩვენ თბილისში ვთამაშობთ და მე ასე ვიტყვი - შანსები 50/50-ზეა. ჩვენი ერთობლივი მუშაობით ეს შანსები თამაშამდე საჩვენოდ უნდა გაიზარდოს. სამწვრთნელო შტაბს ყველანაირად უნდა დავუდგეთ გვერდში.

ლიდერების ფაქტორი

- შვეიცარიის ნაკრებში მე ორ ლიდერს გამოვარჩევდი - გრანიტ ჯაკას და ჯერდან შაჩირის. ორივე მათგანი უმაღლესი კლასის მოთამაშეა. ჯაკა გუნდის ხერხემალია და ასევეა ის “არსენალში”, სადაც პრაქტიკულად არ ცვლიან.

შეტევაში კი მთავარი კაცი შაჩირია. ის ისეთი ფეხბურთელია, თამაშის ბედის გადაწყვეტა რომ შეუძლია. ჯერ ვერ იქცა “ლივერპულის” ძირითადი შემადგენლობის ფეხბურთელად, მაგრამ ეს ბევრს არაფერს ნიშნავს. ჩემი აზრით, შეიძლება იმაზე ფიქრიც კი, რომ ამ ფეხბურთელების წინააღმდეგ დაწესდეს პერსონალური მეურვეობა. ვნახოთ, მწვრთნელის გადასაწყვეტია, ჩვენ შეგვიძლია მხოლოდ ვურჩიოთ...

ყოველდღიური სპორტული გაზეთი "ლელო"
2601
მკითხველის კომენტარები / 2 /
0
მეც მჯერა, რომ აუცილებლად შემოვარდება ვიღაც ტალანტი, ეროვნულიდან იქნება ეს თუ ლეგიონერებიდან არ ვიცი იმიტომ, რომ ბევრმა მოუმატა ჩვენდა სასიხარულოდ ევროპაში, მაგრამ აუცილებლად მოვა სრულფასოვანი შემოვარდნა
სოსო
0
ძალიან სწორად აფასებს ბატონი რეზო,მაგრამ შეზლებენ ჩვენი ბიჭები 90 წუთი მაღალი პრესინგის თამაშს?მეტოქე ჩვენზე ფიზიკურადაც უფრო კარგად არის მომზადებული,ტაქტიკურადაც და ტექნიკურადაც.თავგანწირვაში ალბათ დავაჭარბებთ,მაგრამ გვეყოფა ძალები?თუმცა სხვა გზა მაინც არ სჩანს.უნდა ვცადოთ.
მსგავსი ამბები
რუბრიკის სხვა სიახლეები
;