რევაზ ძოძუაშვილი: ნაკრები გემრიელი ქართული სუფრაა, ვაისი - კარგი თამადა! [VIDEO]

საქართველოს ნაკრების წარმატებების შეფასება ლეგენდარულ ფეხბურთელს, რევაზ ძოძუაშვილს ვთხოვეთ. მისი თქმით, ქართული ფეხბურთის პროგრესი თვალსაჩინოა და ეს პროცესი კიდევ გაგრძელდება...

"მინდა, ეს დიდი წარმატება მთელ ქვეყანას მივულოცო! ეს არის საერთო ძალისხმევის შედეგი, ყველამ ფრიადზე გააკეთა თავისი საქმე! აქ ვგულისხმობ როგორც ფეხბურთელებს, ისე ფეხბურთის ფედერაციას და სახელმწიფოს. კარგია, რომ ქვეყნის სათავეში არის ხალხი, ვისაც ესმის და სტკივა ფეხბურთი, მაგალითად, კახა კალაძე. ის თბილისსაც კარგად უვლის და ფეხბურთის განვითარებისთვისაც ძალიან ბევრს აკეთებს...

ქართული სუფრა მაშინაა ლამაზი, პურმარილი მაშინაა გემრიელი, როცა მას კარგი თამადა ჰყავს. გადატანითი მნიშვნელობით ჩვენ თამამად შეგვიძლია ვთქვათ, რომ ვლადიმირ ვაისის სახით ძალიან კარგი თამადა გვყავს. მან უაღრესად დიდი სამუშაო გასწია ნაკრების მთავარი მწვრთნელის პოსტზე და ამის დაუნახავობა არ შეიძლება!..

/ექსკლუზივი/ რევაზ ძოძუაშვილი: შევადაროთ ერთმანეთს ქინქლაძე და ჩაკვეტაძე...

თუნდაც ლატვიასთან მატჩი რომ ავიღოთ, მან რამდენიმე ცვლილება განახორციელა ძირითად შემადგენლობაში. ეს ყოველთვის სარისკოა, მაგრამ, ჩემი აზრით, მწვრთნელი სწორად მოიქცა. ჩვენ ყველამ ერთად დავინახეთ, რომ საქართველოს ნაკრებში არის კონკურენცია. ვაისის სასარგებლოდ მეტყველებს ის, რომ ძალიან თამამად ენდობა ახალგაზრდა ფეხბურთელებს და ვხედავთ, რომ ისინი ამართლებენ. აგერ, რა დონეზე ითამაშა ლატვიასთან მატჩში გიორგი ჩაკვეტაძემ!..

მოკლედ, მისი სახით საქართველოს ნაკრებს შესანიშნავი მწვრთნელი ჰყავს. გუნდი შეკრული, ორგანიზებული, ერთიანია და ამას შედეგი მოაქვს!..

კარგად თუ დავაკვირდებით, საქართველოს ჩემპიონატის დონეც მატულობს. დაძაბულობის ხარისხი მაღალია, თითქმის ყველა მატჩში უშეღავათო ბრძოლა მიდის. ჩემი აზრით, ქართული ფეხბურთის პროგრესი სამომავლოდაც გაგრძელდება. ფეხბურთი ჩვენი თამაშია და გვაქვს იმის პოტენციალი, რომ თვით გერმანიისა და ჰოლანდიის დონის გუნდებს ვეთამაშოთ ტოლ-სწორად.

ველოდი თუ არა ლატვიასთან ასეთ იოლ მოგებას? სიმართლე გითხრათ, გამარჯვებას კი ველოდი, მაგრამ ასეთს - ნამდვილად არა. ჩემი აზრით, აქ გადამწყვეტი როლი ითამაშა ვაისის მიერ შერჩეულმა გონივრულმა ტაქტიკამ. მსოფლიოს ჩემპიონატის შემდეგ ბევრი გუნდი და ნაკრები თამაშობს გამოკვეთილი ფორვარდის გარეშე. ვაისმაც მიმართა ამ სქემას და ამან გაამართლა. 6 ნახევარმცველი შეტევის დროს იყო ფორვარდი და დაცვის დროს - მცველი.

ბოლო დროს ჩვენ მაინც უფრო დაცვიდან ვთამაშობდით. ვაისი ანგარიშს უწევს თანამედროვე დინებას და გუნდს შემტევ ფეხბურთს ათამაშებს. ეს ძალიან კარგია - ქართველები ბედს სულ შეტევაში ვეძებდით, თუმცა სათქმელია ისიც, რომ ამ დროისთვის საქართველოს ნაკრებში დაცვის ხაზი შესანიშნავადაა დაბალანსებული...

საქმე ბოლომდეა მისაყვანი. მთავარი ბრძოლები ჯერ კიდევ წინაა. მე მინდა ვუთხრა საქართველოს ნაკრების ფეხბურთელებს: ბრავო, ბიჭებო! ასე იარეთ!

 

4034
მკითხველის კომენტარები / 0 /
მსგავსი ამბები
რუბრიკის სხვა სიახლეები