რევაზ ჭანტურიამ ყოფილ გუნდს 6 ბურთი შეუგდო

საქართველოს ხელბურთელ ვაჟთა ნაკრები მაკედონიაშია და ამ ქვეყნის ეროვნულ გუნდთან 2 ამხანაგური მატჩისთვის ემზადება. ეს შეხვედრები 25 და 26 ოქტომბრს გაიმართება. პაექრობები ჩვენების მსოფლიოს და ევროპის ჩემპიონატების საკვალიფიკაციო ორთაბრძოლებისთვის მზადების პროგრამითაა გათვალისწინებული.

საგულისხმოა, რომ საქართველოს ნაკრების 3 ხელბურთელი სწორედ მაკედონიის ჩემპიონატში თამაშობს. ისინი ეროვნული გუნდის წევრებს სკოპიეში დახვდნენ. ამ ქვეყნის პირველობაზე 7 ტურია გამართული და ასპარეზობას ქართველთა გუნდები ლიდერობენ: რეზო ჭანტურიას და ირაკლი კბილაშვილის „მეტალურგი“ 19 ქულით (6 მოგება და ფრე) პირველ ადგილზეა, ლექსო წითელიშვილის „ოჰრიდი“ (6 მოგება, 1 წაგება) კი ლიდერს ქულით ჩამორჩება.

 ბოლო ორ ტურში ორივე გუნდმა ყველა შეხვედრა მოიგო. „ოჰრიდმა“ შინ 24:22 დაამარცხა ლიდერთა ჯგუფის წევრი სკოპიეს „ბუტელი“, სტუმრად კი „სტრუგას“ 28:10 აჯობა. წითელიშვილს ბოლო დროს მხრის ტრავმა აწუხებდა და, ძირითადად, დაცვაში თამაშობდა, თუმცა, „ბუტელს“ მაინც გაუტანა 1 ბურთი და პირადი ანგარიში 14 ბურთამდე აიყვანა.

„სტრუგამ“ გაცილებით მეტი წინააღმდეგობა გაუწია „მეტალურგს“, რომელთანაც 25:32 დამარცხდა. კბილაშვილისა და ჭანტურიას გუნდმა ბიტოლაში „პელისტერს“ უფრო მოკრძალებული ანგარიშით სძლია - 27:24. კბილაშვილის ანგარიშზეა 3 გოლი (სეზონში სულ 16), ხოლო ჭანტურიამ ყოფილ კლუბს ექვსი ბურთი შეუგდო (შვიდ მატჩში - 23 გოლი).

რეგულარული პირველობის შემდეგ ფინალურ ეტაპზე 4 გუნდი გავა, რომლებიც „ვარდარსა“ და „ეუროფარმ-რაბოტნიჩკთან“ ერთად მედლებისთვის იბრძოლებენ.

191
მკითხველის კომენტარები / 0 /
რუბრიკის სხვა სიახლეები
;