რეკორდცვენა ქუთაისში კახი კახიაშვილის სახელობის საერთაშორისო ტურნირზე

ქუთაისში სამ დღეს გრძელდებოდა ძალოსნობაში სამგზის ოლიმპიური ჩემპიონის, საქართველოს ძალოსნობის ეროვნული ფედერაციის პრეზიდენტ კახი კახიაშვილის სახელობის საერთაშორისო ტურნირი, რომელშიც ქართველებთან ერთად რუსეთისა და აზერბაიჯანის წარმომადგენლებმაც იასპარეზეს.

უძლიერეს ათლეტთაგან  მხოლოდ სამი სპორტსმენი არ მონაწილეობდა - რიოს თამაშების გამარჯვებული, სამ-სამგზის მსოფლიოს და ევროპის ჩემპიონი ლაშა ტალახაძე, 2016 წლის ოლიმპიადის ბრინჯაოს პრიზიორი და ევროპის ჩემპიონი ირაკლი თურმანიძე და ანტონი პლესნოი.

- შეჯიბრება, ტრადიციისამებრ, შესანიშნავად იყო ორგანიზებული, - გვითხრა საქართველოს ახალგაზრდა ძალოსანთა ნაკრების მთავარმა მწვრთნელმა ზურაბ ანთაურმა. - სპორტსმენებს ასპარეზობისა და აქტიური დასვენებისთვის ყველა პირობა ჰქონდათ შექმნილი. ამიტომაც იყო ტურნირზე, ასევე ვთქვათ, ევროპული რეკორდების ცვენა 17 და 15-წლამდელებში.

მოგეხსენებათ, წლეულს პირველი ნოემბრიდან ძალოსნობის საერთაშორისო ფედერაციამ ახალი წონები შემოიღო, ამიტომ უწინდელი მიღწევები ისტორიის კუთვნილება გახდა. ახლა  ახალი მიღწევების აღნუსხვა დაიწყო. კახი კახიაშვილის თასზე განსაკუთრებით 17-წლამდელებმა გამოიჩინეს თავი. საგულისხმო ის არის, რომ მოზარდთა ევროპის სარეკორდო სტანდარტებს ჩვენი სპორტსმენების უმრავლესობამ საგრძნობლად გადაამეტა.

ეს შედეგები, სამწუხაროდ, მხოლოდ საქართველოს რეკორდებად დარჩება, რადგან ჩვენი შეჯიბრება ჯერჯერობით მსოფლიოს ფედერაციის კალენდარში არ შედის და უცხოელი არბიტრებიც არ გვესწრებოდნენ. არადა, წლევანდელი მსოფლიოს ახალგაზრდობის მესამე ოლიმპიური თამაშების ვერცხლის პრიზიორმა არჩილ მალაყმაძემ, ევროპული სტანდარტები შვიდჯერ გააუმჯობესა და ერთხელ მსოფლიოს სტანდარტსაც გადასწვდა.

73 კილოგრამ წონით კატეგორიაში არჩილმა 139 კილო აიტაცა, 165 აკრა და ორჭიდში 304 კილოს მოუყარა თავი, რაც ევროპულ სტანდარტზე 17 (!) კილოგრამით მეტია. 81 კილოში ლომია თებიძემ ევროპულ მაჩვენებლებს ხუთჯერ გადააჭარბა. 61 კილოში ხაშურელმა გიორგი ხარაზიშვილმა, რომელიც თბილისის ოლიმპიური მზადების ცენტრში ვარჯიშობს და ჯერ 15 წლისაც არ არის, 118 კილო აიტაცა და ევროპულ მაჩვენებელს გადაამეტა. გიორგის თანაქალაქელმა და თანატოლმა ბონდო კილაძემ 131 კილოგრამით აკვრაში ევროპული მაჩვენებელი კილოგრამით გააუჯობესა. 67 კილოში გურამ გიორბელიძემ 150 კილო აკრა, რაც ევროპულ მაჩვენებელზე 2 კილოგრამით მეტია. 

ქართველ ძალოსნებთან ერთად ფიცარნაგზე აზერბაიჯანისა და სომხეთის წარმომადგენლებიც გამოვიდნენ, მაგრამ ვაჟებში მათ მასპინძლებს სათანადო მეტოქეობა ვერ გაუწიეს და პრიზიორებში ვერ მოხვდნენ. 

კვარცხლბეკი

55 კგ: 1. ბაჩო შამილიშვილი (ქობულეთი, ოლიმპიური მზადების ცენტრი) - 175 (75+100), 2. ვასო ადეიშვილი (ქუთაისი) - 158 (72+86), 3. გიგა ნადიბაიძე (თბილისი) - 136 (61+75).

61 კგ: 1. რამინ შამილიშვილი (ქობულეთი) - 259 (116+143), 2. გოდერძი ბერდელიძე (საჩხერე) - 252 (117+135), 3. გიორგი დოკვაძე (საჩხერე) - 252 (114+138). 

67 კგ: 1.გოგა ჩხეიძე (ზუგდიდი) - 293 (133+160), 2. გურამ გიორბელიძე (ქუთაისი) - 268 (118+150), 3. ბაჩანა ბეკურაული (თბილისი) - 186 (81+105); 

73 კგ. 1. არჩილ მალაყმაძე (ხელვაჩაური. ომც) - 304 (139+165), 2. ბეგლარ სოლომონიძე (ქობულეთი) - 278 (125+153), 3. კახი ასანიძე (თბილისი) - 269 (121, 148)

81 კგ: 1.ლომია თებიძე (ხელვაჩაური, ომც) - 321 (142+179), 2. ირაკლი გაბრიჭიძე (საჩხერე) - 288 (138+150), 3. მანუჩარ გოგოხია (ზუგდიდი) - 271 (126+145), 

96 კგ: 1.ზაზა ლომთაძე (ქუთაისი) - 326 (145+181), 2. ირაკლი გაბაძე (საჩხერე) - 263 (115+148), 3. გიორგი კირვალიძე (საჩხერე) - 230 (103+127).

89 კგ: 1. რევაზ დავითაძე (თბილისი) - 348 (161+187), ედუარდ კაკაბაძე (ქუთაისი) - 295 (134+161), ალკაზარ გოგიტიძე (ხელვაჩაური, ომც) - 288 (133, 155).

102 კგ: 1. ირაკლი ჩხეიძე (ზუგდიდი) - 345 (155+190),  2.ირაკლი გობეჯიშვილი (ქუთაისი) - 310 (140+170), 3.ლაშა თაქთაქიშვილი (თბილისი) - 287 (127+160).

109 კგ: 1.აკაკი ტალახაძე (საჩხერე) - 325 (142+183), 2.ჯემალ კოპალიანი (ქუთაისი) 234 (108+126),  3.ოთო ზაბახიძე (საჩხერე) 225 (100+125).

+109 კგ: 1. ბაქარ თურმანიძე (ქობულეთი) - 350 (160+190),  2.თორნიკე ტაბატაძე (ხაშური) - 348 (163,185),  3.მიშო ადამია (თბილისი) - 260 (120+140).

საერთაშორისო ტურნირში ქალებიც მონაწილეობდნენ. მათ შორის საპრიზო სამეული სინკლერის მიხედვით გაირკვა: 1. ხათუნა ჯიმშელეიშვილი (წყალტუბო) - 124 (56+ 68, სინკლერი 215.8), 2. ვალერია ტერ-გროგოროვა  (რუსეთი) - 147 (67+80, ს.- 204,95), 3. მარიამ მაისურაძე (წყალტუბო) - 105 (50+55, ს. - 178,6).

ყოველდღიური სპორტული გაზეთი "ლელო"
1140
მკითხველის კომენტარები / 0 /
მსგავსი ამბები
რუბრიკის სხვა სიახლეები
;