რინერმა არაო! თუშიშვილის შანსი: ოლიმპიადაზე მსოფლიოს ჩემპიონის რანგში

ევროპის ჩემპიონ გურამ თუშიშვილს (+100) მშვენიერი შანსი ეძლევა, ტოკიოს ოლიმპიადაზე მსოფლიოს ჩემპიონის რანგში ჩავიდეს. ეგ კი არა, საქმეს ზეპრაგმატულად თუ მიუდგება, შეიძლება, ძიუდოს სამშობლოს ორგზის ჩემპიონის რანგშიც კი ესტუმროს.

საქმე ისაა, რომ ამ დღეებში მისმა მთავარმა კონკურენტმა, ორგზის ოლიმპიურმა ჩემპიონმა, მსოფლიოს 10-გზის და ევროპის 5-გზის გამარჯვებულმა ტედი რინერიმ განაცხადა, საგანგებო პროგრამით ემზადება ტოკიოს 2020 წლის ოლიმპიადისთვის და ამიტომ გამოტოვებს როგორც წლევანდელ, ასევე საგაისო მსოფლიოს ჩემპიონატებს.

ეტყობა, ლეგენდას მოსწყინდა ტიტულების კოლექციის მოგროვება. მით უფრო, იქ ანაზღაურებას სპორტსმენები ძირითადად კლუბებიდან, მუნიციპალიტეტებიდან, სპონსორებიდან იღებენ და ნაკრებში მოპოვებულ პრემიებზე აღარ არიან დამოკიდებული.

⇒ჰაილაითები: თუშიშვილის ყველა გდება [VIDEO]

ამიტომ რინერი ახალ სამანს უმიზნებს - ტოკიოში გამარჯვების შემთხვევაში გაუთანაბრდება იაპონელ ტადაჰირო ნომურას (60), ვინც დღემდე მსოფლიოში ერთადერთი სამგზის ოლიმპპიური ჩემპიონია. თუმცა ნომურა ტიტულებით ახლოსაც ვერ მივა რინერისთან - ის მხოლოდ ერთხელ გახდა მსოფლიოს ჩემოიონი და ბედის ირონიით, მაშინაც ჩვენს ხარჯზე მოიპოვა ტიტული: 1997 წელს პარიზში ფინალში გიორგი რევაზიშვილს მოუგო.

ამასთან რინერისთვის ტოკიოში გამარჯვება დამატებითი მოტივაციაც იქნება. საქმე ისაა, რომ 2010 წელს ოსაკაში გამართულ მსოფლიოს ჩემპიონატზე აბსოლუტური წონის ფინალში მსაჯთა გადაწყვეტილებით წააგო მასპინძელ დაიკი კამიკავასთან. მაშინ ეს მთა-კაცი მენეჯერი ძმის მკერდზე მიყრდნობილი პატარა ბავშვივით ტიროდა (ძაც არანაკლება აღვარღვარებდა ცრემლებს). გაბრაზებული რინერი მას შემდეგ იაპონიაში აღარ ჩასულა. სამაგიეროდ, იაპონიიის გარეთ არ გაახარა იაპონელი ძიუდოისტები.

როგორც გითხარით, ეს მშვენიერი შანსია თუშიშვილისთვის, ვისაც კონკურნტები არ აკლია, მაგრამ, ბუნებრივია, რინერის დონის არც ერთი არაა. ალბათ, მისი რეალური კონკურენტები შემდეგ ქვეყნებიდან უნდა განვიხილოთ: ისრაელი, ბრაზილია, ჩეხეთი, ჰოლანდია, იაპონია, ირანი, უკრაინა და ჰა-ჰა - რუსეთი და კორეაც.

ჩვენ თუ გვკითხავთ, დღეისათვის ამათგან ყველაზე ძლიერი მაინც ებრაელი ორ სასონი ჩანს - ძალიან ჭკვიანი, ტექნიკური და ტაქტიკურად ლამის უშეცდომოდ მოჭიდავე. სხვათა შორის, ძალიან საინტერესო იქნება, მათი შეხვედრა თუ შედგება ახლა თელ ავივში, ევროპის ჩემპიონატზე, სადაც სასონს მასპინძლის ფაქტორის გამო გარკვეული უპირატესობა ექნება, მაგრამ თუშიშვილიც ხომ არასტანდარტული, არაორდინალური მოჭიდავეა. ვფიქრობთ, ჩვენებურს შეუძლია, ჯანით მოგუდოს ის.

ერთბაშად ორი ძლიერი ფალავანი ჰყავთ ბრაზილიელებს, მაგრამ თუშიშვილი მათაც და ჰოლანდიელებსაც კენჭებივით ისვრის აქეთ-იქით. იაპონელებს ამ ეტაპზე ვარსკვლავი არა ჰყავთ, თუმცა ერთბაშად ოთხი ფალავანი იბრძვის ლიდერობისთვის, მათგან ერთთან, ახალგაზრდა კოკორო კაგეურასთან კი უარყოფითი ბალანსი აქვს.

საინეტერესო ფალავნები ეზრდებათ უკრაინელებსაც, მაგრამ მთავარია, თვითონ ჩვენებური მოემზადოს კარგად და მოგება ყველასთან შეუძლია. თან, ამ წლებში თვითონაც დასერიოზულდება, ისწავლის ძალების გადანაწილებას, ტაქტიკურ ჭიდაობას, რითაც კიდევ უფრო გაძლიერდება.

დასასრულს, შეგახსენებთ, რომ მსოფლიოს წლევანდელი ჩემპიონატი აგვისტოს ბოლოს ბაქოში ტარდება, საგაისოს მასპინძელი კი იქ გაირკვევა.

3648
მკითხველის კომენტარები / 0 /
მსგავსი ამბები
რუბრიკის სხვა სიახლეები
;