რისი გარანტია მიიღო ინძაგიმ? - 'ჩვენ მზად ვართ დიდი გამარჯვებებისთვის'

სიმონე ინძაგიმ ხელი ჰკრა “მილანის” მიერ შეთავაზებულ გამზადებულ კონტრაქტს და “ლაციოში” დარჩენა გადაწყვიტა. ამ ფაქტს რომაული კლუბის გულშემატკივრებს შორის გრანდიოზული გამოხმაურება მოჰყვა. “ლაციალეს” ფანები ინძაგის “ნამდვილ გმირს” უწოდებენ...

რეალურად სიმონე ინძაგიმ კიდევ ერთხელ დაადასტურა, რომ “ლაციოს” ძალიან დიდი პატრიოტია. მას ადრეც არაერთხელ შეეძლო წასვლა სხვა კლუბში, მაგრამ, როგორც ჩანს, მანამდე ვერ მოისვენებს, სანამ “ბიანკოჩელესტეს” ძველ დიდებას არ დაუბრუნებს.

იტალიელი მიმომხილველები ვარაუდობენ, რომ ინძაგი ასე მხოლოდ “ლაციოს” სიყვარულის გამო არ მოქცეულა. მან გუნდის ყველა ლიდერის შენარჩუნებისა და ახალი ფეხბურთელების მიყვანის პირობა მიიღო.

“ლაციო” ამ ბოლო დროს გააფთრებით იბრძვის ჩემპიონთა ლიგის საგზურის მოსაპოვებლად, მაგრამ გადამწყვეტ მომენტში სულ რაღაც აკლდება. ადვილი გამოსაცნობია, რომ ეს “რაღაც” არის რესურსი. გუნდს სჭირდება გაცილებით მეტი ფეხბურთელი იმისთვის, რომ ლიგის საგზური მოიგოს.

ამ დროისთვის ერთადერთი ფეხბურთელი, რომელიც, ალბათ, 100 პროცენტით დატოვებს “ლაციოს”, სერბეთის ეროვნული ნაკრების ლიდერი სერგეი მილინკოვიჩ-სავიჩია. ცენტრალური ნახევარმცველის პოზიციაზე ის ერთ-ერთი საუკეთესოა . მისი გადაბირება, პრაქტიკულად, ყველა გრანდს უნდა. 24 წლის სერბის მიზანი ისეთ კლუბში თამაშია, რომელიც ყველა ტიტულის მოსაპოვებლად ბოლომდე იბრძოლებს. ამ ეტაპზე “ლაციოს” ეს ნამდვილად არ შეუძლია.

სამაგიეროდ, გუნდში დარჩებიან ჩირო იმობილე, ხოაკინ კორეა, ნენად ლულიჩი, ლუის ალბერტო და სხვები. ეს კი ნიშნავს, რომ შესაბამისი გაძლიერების შემთხვევაში, “ლაციო” უსათუოდ იქნება ჩემპიონთა ლიგის საგზურის მოპოვების ერთ-ერთი მთავარი პრეტენდენტი.

მომავალ სეზონში სიმონეს ყველა ვარიანტში მოუწევს გუნდის სტაბილურობის ამაღლება, რადგან სწორედ ეს არ ეყო მიმდინარე სეზონში ჩემპიონთა ლიგის სანატრელი საგზურის მოსაპოვებლად.

არადა, კლუბის გულშემატკივრები უკვე კარგა ხანია, ელიან იმ დღეს, როცა მათი საყვარელი გუნდი ჩემპიონთა ლიგის ჯგუფურ ეტაპზე იასპარეზებს. წესით, ეს დრო შორს არ უნდა იყოს. ინძაგის დარჩენა სწორედ ამას ნიშნავს.

“ჩვენ მზად ვართ დიდი გამარჯვებებისთვის. ინძაგი ზუსტად ის მწვრთნელია, ვინც “ლაციოს” წარმატებას მოუტანს. რა თქმა უნდა, მერვე ადგილი არ არის ის პოზიცია, რომელსაც იმსახურებენ ჩვენი გულშემატკივრები. ახლა ლაპარაკია იმის თაობაზე, რომ ჩვენ არ გვეყო სტაბილურობა, მაგრამ ესეც ფეხბურთის ნაწილია.

ყველაფერს გავაკეთებთ იმისთვის, რომ “ლაციო” მომავალ სეზონში იყოს იმაზე უკეთესი, ვიდრე იყო წლეულს. სიმონე ინძაგის დარჩენა ყველასთვის დიდი სტიმულია. გვაქვს დიდი მიზნები და გეგმები, რომელსაც ჩვენს მწვრთნელთან ერთად მივაღწევთ. ეს არის ჩვენი გუნდი, რომლის უკეთესი მომავლისთვის ყველამ ყველაფერი უნდა გავიღოთ”, - განაცხადა “ლაციოს” პრეზიდენტმა კლაუდიო ლოტიტომ.

იტალიური ფეხბურთის ექსპერტები თვლიან, რომ ამ ზაფხულს “ლაციოს” ხელმძღვანელობა აქტიური იქნება სატრანსფერო ბაზარზე და ხმაურიანი შენაძენებიც არ უნდა გამოვრიცხოთ.

ყოველდღიური სპორტული გაზეთი "ლელო"
956
მკითხველის კომენტარები / 0 /
მსგავსი ამბები
რუბრიკის სხვა სიახლეები
;