რობერტო ფირმინო კოუტინიოზე, კლოპზე, რასიზმზე და სიტიზე

"ლივერპულის" ბრაზილიელი ფორვარდი რობერტო ფირმინო მიიჩნევს, რომ მოჰამედ სალაჰის დიდებული თამაში და ბევრი გოლი მისთვის წნეხი სულაც არ არის.

ფირმინოს თქმით, ნაკლები მნიშვნელობა აქვს, ვინ გაიტანს გოლს, რადგან მთავარია "ლივერპულის" წარმატება...

"ბევრი ლაპარაკობს იმაზე, რომ ჩვენი წარმატება შეტევის დამსახურებაა. მე ასე ვერ ვიტყოდი. თამაშს იგებს მთელი გუნდი. რაც შეეხება ურთიერთობებს, ის, უბრალოდ, შესანიშნავია.

ჩვენ კოლექტიურ ფეხბურთს მივდევთ და გატანა ყველას შეუძლია. ამ შემთხვევაში კი მოგებული ისევ და ისევ "ლივერპული" რჩება", - ამბობს 26 წლის რობერტო ფირმინო.

მოჰამედ სალაჰისა და ფირმინოს გოლები იურგენ კლოპის გუნდს ეხმარება იმაში, რომ ინგლისური პრემიერლიგის სამ საუკეთესო კლუბს შორის დაიმკვიდროს ადგილი. გარდა ამისა, გუნდი ჩემპიონთა ლიგის მეოთხედფინალშია გასული, სადაც "მანჩესტერ სიტისთან" მოუწევს დაპირისპირება.

"ეს ჩემი კარიერის საუკეთესო მომენტია, ბევრი პოზიტიური რამ ხდება. ეს ეხება როგორც ჩემს კარიერას, ასევე პირად ცხოვრებას... რაც შეეხება იურგენ კლოპს, ის დიდი ტაქტიკოსი და დიდი მწვრთნელია", - ასეთია ბრაზილიელი შემტევის შეფასება.

მას შემდეგ, რაც ფირმინოს თანამემამულე ფილიპე კოუტინიო "ბარსელონაში" წავიდა, "ლივერპულის" შეტევაში რაღაც შეიცვალა.

"გეგულებათ ისეთი კლუბი, რომელიც უარს იტყვის კოუტინიოს დონის ფეხბურთელზე? ჩვენ რაღაც შევცვალეთ. ის თავის ცხოვრებას აგრძელებს "ბარსელონაში", "ლივერპული კი ისევ ძლიერ გუნდად რჩება. მადლობა ღმერთს, გამოგვდის გოლების გატანა და მოგება. პრემიერლიგაში იმ ადგილზე ვართ, რომელიც მომავალ სეზონში ჩემპიონთა ლიგაზე ასპარეზობის უფლებას იძლევა".

რას ფიქრობს ფირმინო რასიზმზე? "ეს ძალიან სერიოზული პრობლემაა. მიმაჩნია, რომ ხალხი ამას უფრო გულდასმით უნდა მიუდგეს. მე ვიტანჯები, როცა ასეთი რაღაცები მესმის".

საინტერესოა მისი აზრი "მანჩესტერ სიტისთან" ჩემპიონთა ლიგის მეოთხედფინალში გასამართ დაპირისპირებაზეც: "ეს არის ძალიან შემტევი გუნდი. მისი დამარცხება ყოველთვის ძალიან რთულია.

26 თამაში მოიგეს პრემიერლიგაში და დამაჯერებლად ლიდერობენ. კლოპი და გვარდიოლა ერთმანეთს ძალიან კარგად იცნობენ. მოკლედ, საინტერესო თამაში გველის".

და ვინაა გამორჩეული დღეს პრემიერლიგაში? "გამოვარჩევდი სალაჰს და კეინს. აქ არიან ასევე გაბრიელ ჟეზუში, კევინ დე ბრუინი, ილქაი გიუნდოგანი, პოლ პოგბა, რომელუ ლუკაკუ, მუსა სისოკო, მუსა დემბელე, ედენ აზარი და ვილიანი.

არ უნდა გამოგვრჩეს ასევე მანე, ემრე ჯანი, დეიან ლოვრენი და სხვა ვარსკვლავები. პრემიერლიგაში ძალიან ბევრი ვარსკვლავია და ტურნირის დონეც ამიტომ არის ძალიან მაღალი", - ასე ამთავრებს ფირმინო.

ყოველდღიური სპორტული გაზეთი "ლელო"
1133
მკითხველის კომენტარები / 0 /
მსგავსი ამბები
რუბრიკის სხვა სიახლეები
;