როგორი იქნება ახალი რეალი? 300 000 000 უკვე დახარჯულია...

როგორი იქნება ახალი რეალი? 

ამ ზაფხულს სატრანსფერო ბაზრის ყველაზე საინტერესო მოთამაშე მადრიდის “რეალია”. “სამეფო კლუბმა” ტრიუმფალურად ჩაატარა ჩემპიონთა ლიგის ზედიზედ სამი გათამაშება და ბოლო აშკარად ჩაუვარდა. ამის გათვალისწინებით, მადრიდული გრანდის ხელმძღვანელობა ყველაფერს გააკეთებს იმისთვის, რომ “რეალი” მწვერვალებს დაუბრუნდეს. 

გავრცელებული ინფორმაციით, კლუბის ხელმძღვანელობამ 600 მილიონი ევრო გამოუყო ზინედინ ზიდანს ახალი გუნდის შესაქმნელად. “რეალმა” გვარიანად იაქტიურა სატრანსფერო ბაზარზე და უკვე დახარჯა ამ თანხის ზუსტად ნახევარი. 

მაშ ასე, რომელ ფეხბურთელებში გადაიხადა “ლოს ბლანკოსმა” ერთობ სოლიდური თანხა - 300 მილიონი ევრო. ეს წერილი სწორედ ამ საინტერესო თემას ეხება...

როდრიგო გოეში, 45 მილიონი

ამ ფეხბურთელის ტრანსფერის თაობაზე “რეალი” ბრაზილიურ “სანტოსს” ჯერ კიდევ 2018 წლის ზაფხულში მოელაპარაკა, მაგრამ მაშინ კლუბები შეთანხმდნენ, რომ როდრიგო გოეში კიდევ ერთ სეზონს გაატარებდა პელესა და ნეიმარის მშობლიურ კლუბში.

როგორც წესი, ბრაზილიელი მარცხენაფლანგელის პოზიციაზე თამაშობს. მისი ერთ-ერთი კონკურენტი თანამემამულე ვინისიუშ ჟუნიორი იქნება. 18 წლის “ბრილიანტმა” ბრაზილიის ჩემპიონატში უკვე ჩაატარა 41 მატჩი, გაიტანა 9 გოლი და გააკეთა 5 საგოლე გადაცემა. 

“მე ვარ სწრაფი ფორვარდი. მიყვარს ბურთის ფლობა, გაქცევა და გატანა. ჩემს სათამაშო სტილს ნეიმარისას და რობინიოსას შევადარებდი”, - ასე დაახასიათა როდრიგომ საკუთარი თავი.

ფერლან მენდი,  48 მილიონი

ზინედინ ზიდანს ძალიან უნდოდა, გუნდში ეხილა ეს თანამემამულე მცველი. “რეალის” პრეზიდენტმა ფლორენტინო პერესმა მწვრთნელს სურვილი შეუსრულა. ფერლან მენდის დიდი ალბათობით ძირითად შემადგენლობაში მოუწევს თამაში. საქმე ისაა, რომ მარსელო “რეალიდან” წასვლას აპირებს და მენდი მისი პირდაპირი ალტერნატივაა...

ამბობენ, რომ ამ ძალიან ტექნიკურ და ამტან უკანახაზელს ართრიტი აწუხებს. გასულ სეზონში მენდისთვის ავადმყოფობას თავი არ შეუხსენებია. ერთადერთი, მან 4 კვირა გამოტოვა კუნთების ტრავმის გამო. “რეალის” გარდა, ამ ფეხბურთელის გადაბირება კიდევ რამდენიმე კლუბს სურდა, მაგრამ “სამეფო კლუბის” შეფებმა ყველას დაასწრეს.

ედერ მილიტაო,  50 მილიონი

როდრიგო გოესისა არ იყოს, ედერ მილიტაოც სეზონის დაწყებამდე გახდა “რეალის” ფეხბურთელი. ჯერ კიდევ მარტში “სამეფო კლუბმა” “პორტუს” 21 წლის მცველი დიდი იმედებით შეიძინა. 

მილიტაომ ევროპაში ჯერ მხოლოდ ერთი სეზონი ითამაშა. ის “პორტუში” “სან პაულუდან” გადავიდა. ამ ტრანსფერში პორტუგალიურმა გრანდმა მხოლოდ 7 მილიონი ევრო გადაიხადა. მილიტაომ “პორტუში” 47 შეხვედრა ჩაატარა, გაიტანა 5 გოლი და გააკეთა 4 საგოლე გადაცემა. 

ის “დრაკონებთან” ერთად ჩემპიონთა ლიგის მეოთხედფინალამდე მივიდა. ამასთან, ის ჯერ ვერ ხვდება ბრაზილიის ნაკრების ძირითად შემადგენლობაში - “კოპა ამერიკაზე” მხოლოდ 15 წუთი ითამაშა.

ლუკა იოვიჩი,  60 მილიონი

“რეალმა” მიიღო ცენტრალური თავდამსხმელი, რომელიც თავისი სათამაშო სტილით არ ჰგავს ქარიმ ბენზემას. ის არის “ბოლო დარტყმის” თავდამსხმელი, როგორც იტყვიან - ნამდვილი “ქილერი”. 

შესაძლოა, ზიდანი სპეციალურად ეძებდა ასეთ ფეხბურთელს. ფაქტია, კრიშტიანო რონალდოს არყოფნის მიუხედავად, “სამეფო კლუბი” მეტოქის კართან არაერთ საგოლე მომენტს ქმნიდა, მაგრამ მათი გამოყენების პროცენტი აშკარად უკეთესის სურვილს ტოვებდა...

21 წლის ლუკა იოვიჩმა გასული სეზონის განმავლობაში “აინტრახტის” შემადგენლობაში 48 შეხვედრა ჩაატარა, 27 გოლი შეაგდო და 7 საგოლე პასი გააკეთა. ერთი მომენტი, სერბის ტრანსფერი ჩაშლის პირასაც დადგა. 

ამის მიზეზი იყო ის, რომ “აინტრახტმა” ფეხბურთელის ფასი 100 მილიონ ევრომდე ასწია. “რეალი” არ დანებდა და ბოლოს კლუბებმა შეთანხმებას მიაღწიეს. ამას დაემატა ბონუსები 5 მილიონი ევროს ოდენობით...

ედენ აზარი,  100 მილიონი

მიმდინარე სატრანსფერო პერიოდის, ალბათ, საუკეთესო გარიგება. “ჩელსი” დიდი ხნის განმავლობაში ვერ ელეოდა თავის ლიდერს. არადა, ბელგიელი სუპერვარსკვლავი ასევე კარგა ხნის განმავლობაში არ მალავდა, რომ მას თავისი კერპის, ზინედინ ზიდანის ხელმძღვანელობით სურდა თამაში... 

მიუხედავად იმისა, რომ ედენ აზარის კონტრაქტს “ჩელსისთან” სულ რაღაც ერთ წელიწადში გასდიოდა ვადა, “არისტოკრატებმა” ბელგიელის სანაცვლოს მართლაც რომ კოლოსალური თანხა მიიღეს. აზარი ძალიან ლამაზად გამოემშვიდობა “ჩელსის”, მოიგო რა გუნდთან ერთად ევროპალიგა. 

ბელგიელმა გასულ სეზონში “ჩელსის” შემადგენლობაში 52 შეხვედრა ჩაატარა, 21 გოლი გაიტანა და 17 “ასისტი” ჩაიწერა აქტივში. ფლორენტინო პერესი გუნდის ახალწვეულს ძალიან დიდი იმედით უყურებს. კლუბის პრეზიდენტს სურს, რომ ბელგიელმა მე-7 ნომრით ითამაშოს. შეგახსენებთ, რომ სწორედ ამ ნომრიანი მაისურით თამაშობდა წლების განმავლობაში კრიშტიანო რონალდო... 

ამ ეტაპზე აზარს ნომერთან დაკავშირებული არჩევანი არ გაუკეთებია. პერესი არ მალავს, რომ სურს, აზარმა დაახლოებით ის როლი შეასრულოს კლუბში, რასაც რონალდო ასრულებდა.

კიდევ ვინ  შეიძლება მოვიდეს?

ამბობენ, რომ “ტოტენჰემოს” ლიდერ კრისტიან ერიქსენს უკვე გაკეთებული აქვს არჩევანი “რეალის” სასარგებლოდ. აქ შეიძლება გარკვეული პრობლემა წარმოიშვას, რადგან აზარი და ერიქსენი დაახლოებით ერთი პოზიციის ფეხბურთელები არიან. რა თქმა უნდა, “რეალი” ბელგიელის ცენტრფორვარდად გამოყენებას არ აპირებს. ვნახოთ... შეიძლება, ზიდანს უნდა, რომ აზარი ფლანგზე ათამაშოს...

ასევე არ ცხრება სპეკულაციები პოლ პოგბას ტრანსფერის თაობაზე. საფრანგეთის ნაკრების ერთ-ერთ ლიდერს აღარ უნდა “მანჩესტერ იუნაიტედში” დარჩენა. ცნობილია მისი სიმპათიები ზიდანის მიმართ. ეგ არის, რომ ჯერაც “რეალშია” ლუკა მოდრიჩი. პრინციპში, არც მათი მინდორზე ერთად ყოფნაა ფანტასტიკის სფეროდან. 

ასევე ლაპარაკობენ იმის თაობაზე, რომ “სამეფო კლუბი” დაინტერესებულია “აიაქსის” ახალგაზრდა შუახაზელის, დონი ვან დე ბეეკის ტრანსფერით, მაგრამ ეს საკითხი ამ დროისთვის მაინცდამაინც აქტუალური არ არის.

წამსვლელები

“რეალს” აღარ სჭირდება ხამეს როდრიგესი. თავის მხრივ ის აღარ დასჭირდა არც “ბაიერნს”. დიდი ალბათობით, კოლუმბიელი ვარსკვლავი კარლო ანჩელოტისთან “ნაპოლიში” წავა. 

კლუბის ხელმძღვანელობა არ მალავს, რომ განშორება სურს ორ მაღალანაზღაურებად ფეხბურთელთან - გარეთ ბეილსა და ისკო ალარკონთან. აღარავინ მალავს, რომ ახალი ნავსაყუდელის ძიება მოუწევთ დანი სებალიოსს, მარიანო დიასსა და ალვარო ოდრიოსოლას. მარტინ ედეგორისა და რეგილონისთვის მადრიდელებმა უკვე იპოვნეს კლუბები...

ამ დროისთვის, “რეალისთვის” პრიორიტეტს წარმოადგენს ისკოსა და ბეილის გაყიდვა. ეს საშუალებას მისცემს კლუბის ხელმძღვანელობას, გარკვეულწილად აანაზღაუროს ის ხარჯები, რომლებიც უკვე გასწიეს, ან მომავალში უნდა გასწიონ. 

სხვა საქმეა, რომ არცერთი მათგანი არ იწვის “რეალის” დატოვების სურვილით. ალბათ, საქმე იმ კოლოსალურ ხელფასებშია, რომელსაც მათ უხდიან. მეორე მხრივ, ალბათ ნებისმიერი ევროპული გრანდი კარგად დაიხარჯება ამ მოთამაშეებისთვის...

ყოველდღიური სპორტული გაზეთი "ლელო"
1085
მკითხველის კომენტარები / 0 /
მსგავსი ამბები
რუბრიკის სხვა სიახლეები
;