როგორი იქნება განახლებული სამტრედია?

დღეს, ეროვნული ლიგის მესამეადგილოსანი "სამტრედია" თურქეთში შეკრებაზე გაემგზავრება. მანამდე კი გუნდის ხელმძღვანელები სამწვრთნელო შტაბსა და ფეხბურთელებს შეხვდნენ.

საფეხბურთო კლუბის ადმინისტრაციის წევრებმა მათთან ერთად სამომავლო გეგმები განიხილეს.

"სამტრედიაში" იქამდე კომენტარებს არ აკეთებენ და მედიასთან ურთიერთობას ერიდებიან, სანამ კლუბი არ დაკომპლექტდება. ამიტომ თავად კლუბის გავრცელებულ მოკლე პრესრელიზს ვჯერდებით, სადაც გუშინ შემდეგი ცნობა ამოვიკითხეთ: "2018 წლისთვის გუნდის მთავარი მიზანი წარმატებული ასპარეზობა იქნება, როგორც ევროპის ლიგაზე, ასევე ეროვნული ლიგის ახალ სეზონში".

რაც შეეხება სამტრედიელთა მოსამზადებელ გეგმებს: გუნდი თურქეთში 24 იანვარს გაემგზავრება, სადაც 7 ამხანაგურ მატჩს ჩაატარებს. რაც შეეხება ამხანაგურ მატჩებს, მოწინააღმდეგე გუნდების ვინაობა სულ მალე გახდება ცნობილი და ინფორმაციას "სამტრედიას" ოფიციალური ვებგვერდი გაავრცელებს. 22 თებერვალს კი კლუბი ეროვნული ლიგისთვის მზადებას საქართველოში განაგრძობს.

ოფიციალური ცნობით, "სამტრედია" ეროვნული ლიგის სეზონის დაწყებამდე 7 ამხანაგურ მატჩს გამართავს. არცერთი მეტოქე დასახელებული არ იყო, მაგრამ მედიაში გავრცელებული ცნობით, სამტრედიელთა ერთ-ერთი მეტოქე შეკრებაზე დანიის პირველი დივიზიონის ლიდერი "ვეილეა", რომელიც საქართველოს წარმომადგენელს 13 თებერვალს ანთალიაში შეხვდება.

მეორე მეტოქე უკრაინული როვნოს "ვერესია", რომელიც პირველი წრის შემდეგ უკრაინის პრემიერლიგაში მე-5 ადგილზეა. საინტერესოა, რომ ამ გუნდში ერთი ლეგიონერია და ისიც ქართველი - 19 წლის მცველი ლუკა მახარაშვილი, რომელიც საქართველოში რეგიონული ლიგის გულრიფშის "კოლხში" გამოდიოდა.

ჯერჯერობით, "სამტრედია" დასაკომპლექტებელია, რადგან გუნდიდან ბევრი მოთამაშე წავიდა: რამდენიმე მათგანი უცხოეთის გუნდში გადავიდა - ნიკა სანდოხაძე - ლვოვის "კარპატში", გია მანჯგალაძე - აზერბაიჯანულ "ქიაფაზში",

ნიკა საბანაძე - ირანის "სიაჰჯამეგან ხორასანში", გიორგი მჭედლიშვილი - ხორვატულ "გორიცაში", ბაკარი ბალდე უგუნდოდაა. ასევე ახალ კლუბებში არიან გიორგი დათუნაიშვილი,

დავით ჯიქია, დავით მთივლიშვილი, ჯემალ გოგიაშვილი, დავით რაჟამაშვილი, გურამ სამუშია და თემურ მარკოზაშვილი, უგუნდოდ ჯერ მხოლოდ ლაშა კასრაძეა.

გუნდში დარჩნენ კაპიტანი ომარ მიგინეიშვილი, მაიკლ ოლაიტანი, ანტე გიი, ანრი ნდონგი, გიორგი ახალაძე, ვალერ ოლხოვი, ილია სტურუა და ოთარ სტურუა.

რაც შეეხება ახალწვეულებს, ესენი არიან გიორგი ერისთავი, შოთა კერძევაძე, რომანი ჩაჩუა, გიორგი განუგრავა, საბა აღდგომელაშვილი, ვაკო ბაჩიაშვილი, დავით კირკიტაძე და გივი ქარქუზაშვილი.

ბოლო სამ დღეში კი გუნდს შეემატა მონტენეგროელი ცენტრალური მცველი, "ინტერის" ყოფილი წევრი ივან ფატიჩი და ჰოლანდიელი ნახევარმცველი ვინსენტ ლუკას ვეილი, რომელიც ერთი ხანობა "ლივერპულში" ირიცხებოდა. ევროპულ გრანდებში ნათამაშები ფეხბურთელის სახელი უდავოდ ყვირის, მაგრამ სეზონი აჩვენებს, ეს მოთამაშეები გუნდს გამოდგებიან თუ არა.

ფაქტია, რომ "სამტრედიამ" შარშანდელი გუნდის შენარჩუნება ვერ მოახერხა და ახლების მიწვევა გადაწყვიტა - რატომ, ეს უცნობია. უჩა სოსიაშვილი ახალი შემადგენლობიდან რა გუნდს ჩამოაყალიბებს, ამას დრო გვაჩვენებს.

როგორც ჩანს, ერთ შეკრებაზე უჩვეულოდ ბევრი, 7 საკონტროლო შეხვედრის გამართვა "სამტრედიამ" სწორედ ახალი შემადგენლობის შესათამაშებლად გადაწყვიტა.

კლუბს კიდევ რამდენიმე ლეგიონერი და სხვა ქართველი ფეხბურთელები შეუერთდებიან, რომელთა ვინაობაც სულ მალე გახდება ცნობილი.

ყოველდღიური სპორტული გაზეთი "ლელო"
1453
მკითხველის კომენტარები / 0 /
მსგავსი ამბები
რუბრიკის სხვა სიახლეები
;