[VIDEO] როგორი იქნება ევრობასკეტისთვის ასაგები 15-ათასიანი დარბაზი და სად აშენდება?

ევრობასკეტი 2021-ის მასპინძლობის მიღება რამდენიმე ფაქტორის ერთობლიობამ განაპირობა. ერთ-ერთი მნიშვნელოვანი იყო მთავრობის დაპირება - ახალ, 15-ათასიან არენას ავაგებთო. როდესაც საერთაშორისო ორგანიზაცია ხარ და შენი წევრი ასეთ რამეს გეუბნება, ძნელია არ დათანხმდე. დიდი არენის აგება ხომ ქვეყანაში კალათბურთის განვითარებისთვის ძალიან მნიშვნელოვანი მომენტია.

ჩნდება შეკითხვა: სად აშენდება ახალი არენა და როგორი იქნება? პასუხი კულტურისა და სპორტის მინისტრის მოადგილემ შალვა გოგოლაძემ მოგვცა:

- განაცხადი, რომელიც კალათბურთის ფედერაციამ ფიბა-ში გააკეთა, მთავრობასთან თავიდან ბოლომდე კარგად შეთანხმებული და შეჯერებული იყო. პრემიერმინისტრიც აქტიურადაა ჩართული. ეს ლოგიკურიცაა - როდესაც ასეთი გრანდიოზული ღონისძიების მასპინძლობის სურვილს აფიქსირებ, აუცილებელია სახელმწიფოს მხარდაჭერაც. ყველა საგარანტიო წერილი, რაც ჩვენგან ფიბა-ში წავიდა, პრემიერმინისტრის ხელმოწერითაა. ერთია მასპინძლობის მოპოვება, მეორე ღირსეულად მასპინძლობა. ვინაიდან ევროპის საკალათბურთო ჩემპიონატის სტანდარტი ძალიან მაღალია, სახელმწიფო მზადაა დახარჯოს სოლიდური თანხა, რომ საქართველომ მაღალი დონის, ულტრათანამედროვე, მულტიფუნქციური არენა მიიღოს, რომლის ტევადობა 15 ათასი კაცი იქნება. ეს არენა დიღომში აშენდება.

როდისთვის დასრულდება? მოესწრება 2021 წლის სექტემბრამდე, როცა ევრობასკეტი უნდა გაიმართოს? ამ შეკითხვაზე თავიდანვე გვქონდა პასუხი - თანამედროვე პირობებში ასეთი მშენებლობები ერთ წელიწადში თავისუფლად სრულდება. ჩვენ კი ფიბა-ს მივეცით დაპირება, რომ 2021 წლის გაზაფხულზე ყველაფერი რიგზე იქნება.

და როგორი იქნება დიღმის 15-ათასიანი არენა? - ზოგადი წარმოდგენა პრომო-ვიდეოდან შეგვექმნება, რომელიც ამავე პუბლიკაციას ერთვის თან. უფრო დაწვრილებით ამ დარბაზის შესახებ უახლოეს მომავალში დავწერთ.

ყოველდღიური სპორტული გაზეთი "ლელო"
15915
მკითხველის კომენტარები / 3 /
Harumafuji
3
და თბილისში სამი არენა რაში გვჭირდება? ერთი ქუთაისში ააშენონ ან ბათუმში.
Cybernbob
4
დიღომში რომ არ აშენონ, თანაც ან მოესწრება ან არა. ისევ ჯობია სპორტის სასახლეს მიხედონ, მაღაზიას რომ არის გადაქცეული და ადგილიც დიღომში ჯობია
მსგავსი ამბები
რუბრიკის სხვა სიახლეები
;