როგორ არის ქართველი უკრაინულ კარანტინში? ზაურ მახარაძე: სამედიცინო შტაბი ყურადღებით გვაკვირდება, საფრთხის დონე კარგად გვესმის...

გამოცემა "ფუტბუმმა" ინტერვიუ ჩამოართვა ზაურ მახარაძეს, რომელიც უკრაინის მოქალაქე და ამ ქვეყნის ასაკობრივი ნაკრებების წევრი იყო, 2018 წელს კი საქართველოს მოქალაქეობა მიიღო და ეროვნული ნაკრების კანდიდატებში ითვლება.

საინტერესოა, რომ მიმდინარე სეზონში მახარაძემ საუკეთესო მატჩი ყოფილის კლუბის, დონეცკის "ოლიმპიკის" წინააღმდეგ ჩაატარა და "ინსტატ ინდექსის" პროგრამით მაღალი შეფასება - 329 ქულა დაიმსახურა, რაც მეკარისთვის უჩვეულოდ მაღალი მაჩვენებელია.

"ლუგანსკის "ზორიას" მეკარემ ჩემპიონატის საგაზაფხულო ეტაპზე რამდენიმე შთამბეჭდავი მატჩი ჩაატარა და გუნდს დაეხმარა, რათა სატურნირო ცხრილში მეორე ადგილზე დაწინაურებულიყო. ახლა ზაური, ისევე, როგორც ლუგანსკელთა ყველა მოთამაშე, ჩემპიონატის განახლებას ელოდება. ის იცავს კარანტინს, ვარჯიშობს და ჩემპიონთა ლიგაში თამაშზე ოცნებობს. მახარაძემ "ფუტბუმთან" ამ და ბევრ საინტერესო თემაზე ილაპარაკა", - წერს გამოცემა.

 "ჩვენ, ისევე როგორც ყველა, კარანტინში ვართ, მაგრამ ფორმის შენარჩუნებას მაინც მაქსიმალურად ვცდილობთ. სახლში არავინ წასულა, ყველანი ზაპოროჟიეში ვართ. გასაგებია, რომ ახლა სრულყოფილად ვერ ვივარჯიშებთ, მაგრამ აუცილებელია  ფორმა შევინარჩუნოთ. სამწვრთნელო შტაბმა სავარჯიშო პროგრამა შეგვიდგინა. ყოველდღე ბაზაზე, სპეციალური გრაფიკის მიხედვით, ექვს-ექვსკაციანი ჯგუფებით ფიტნესდარბაზსა და მოედანზე ვვარჯიშობთ. კლუბის ექიმი ფეხბურთელებთან მუდმივ კავშირშია. სამედიცინო შტაბი ყურადღებით გვაკვირდება და საბედნიეროდ, ყველა ჯანმრთელი ვართ.

საფრთხის დონე კარგად გვესმის. ვითარებაში, რომელშიც მთელი ქვეყანა და მთელი მსოფლიო აღმოჩნდა, თამაში სისულელე იქნებოდა. ახლა თითოეული ადამიანის ცხოვრება შეიცვალა - სხვებთან ურთიერთობას ყველამ მინიმუმამდე შევამცირეთ. ოთხ კედელში ვზივარ, ზოგჯერ პროდუქტების შესაძენად გავდივარ. მაგრამ ქალაქში ცოტა რამ შეიცვალა - უამრავი მანქანაა, როგორც ადრე", - ამბობს ზაურ მახარაძე.

რადგან ლუგანსკის "ზორია" ჩემპიონატში მეორე ადგილზეა, შესაბამისად, ჩემპიონთა ლიგაში მოხვედრის შანსიც აქვს. მახარაძეს ამაზეც ჰკითხეს: "ყველა ჩვენგანი ოცნებობს ჩემპიონთა ლიგაში მოხვედრაზე. მაგრამ მზად ვართ თუ არა, ამას თამაშები გვიჩვენებს".

25 წლის ქართველ მეკარეს შანსი კონკურენტის, ნიკიტა შევჩენკოს ტრავმის გამო მისცეს და, ჯერჯერობით, ამ შანსს კარგად  იყენებს. თუმცა ის არ მალავს, რომ შემოდგომაზე ნაკლები სათამაშო პრაქტიკა რომ ჰქონდა, კლუბის დატოვებაზე ფიქრობდა:

"წასვლაზე ვფიქრობდი, რადგან თამაში ყველას სურს. მაგრამ ვესაუბრე მწვრთნელს და "ზორიაში"დარჩენა გადავწყვიტე. ჩემს კონკურენტ ნიკიტა შევჩენკოს გულწრფელად ვუსურვებ სწრაფ გამოჯანმრთელებას! მოტივაცია მისი ტრავმის შემდეგ არ გამჩნია, მე ყოველთვის მოტივირებული ვიყავი, მაქსიმუმს ვაკეთებდი და კონკურენტებს ვეჯიბრობდი. მაგრამ ესაა ფეხბურთი - მოედანზე მხოლოდ ერთი მეკარეა".

ზაური მახარაძემ მოქალაქეობა 2018 წლის მაისში შეიცვალა, საქართველოს პასპორტი მიიღო და "ჯვაროსნებშიც" მიიწვიეს. ვლადიმირ ვაისმა ის ორი ამხანაგური მატჩისთვის გამოიძახა - მალტისა (1 ივნისი) და ლუქსემბურგის (5 ივნისი) წინააღმდეგ.

მას ჰკითხეს - ელოდები ეროვნული ნაკრებში კიდევ ერთ გამოძახებას? მახარაძე იმედიანადაა განწყობილი: "რა თქმა უნდა. ახლა ჩემი ამოცანაა, ბევრი ვიშრომო, სტაბილურად ვითამაშო და კარგი დონე ვაჩვენო. სამწვრთნელო შტაბი ყურადღებას მხოლოდ ამის შემდეგ მომაქცევს. ყველაფერი ჩემს ხელშია, მთავარია, ვარჯიშსა და თამაშებზე ბოლომდე დავიხარჯო".

233
მკითხველის კომენტარები / 0 /
მსგავსი ამბები
რუბრიკის სხვა სიახლეები
;