როგორ გამოიყენებენ ვიდეორეფერის ევროტურნირებში?

დღეს ჩემპიონთა ლიგა პლეი ოფებით განახლდება და პირველად, უპრესტიჟულესი ევროტურნირის არსებობის ისტორიაში, გამოიყენებენ ვიდეორეფერის, თუ, რა თქმა უნდა, ამის აუცილებლობა დადგა. ყოველ შემთხვევაში, მწვანე შუქი ანთებულია - ტექნოლოგია მზადაა.

მაგრამ საკითხვია, როგორ მოხდება მისი გამოყენება, ან უფრო სწორად - რომელ კონკრეტულ ეპიზოდში მიმართავს არბიტრი ვიდეორეფერის დახმარებას.

უეფას უფროსი ოფიცერი სამსაჯო საკითხებში, ყოფილი იტალიელი არბიტრი რობერტო როზეტი განმარტავს:

"დარწმუნებულები ვართ, ეს სასარგებლო იქნება ჩვენი ტურნირებისთვის. ვიდეორეფერი მაქსიმალურად შეამცირებს არასწორ გადაწყვეტილებებს. მსაჯების რეაქცია დადებითი იყო. ბოლო თვეების ტესტებმა ცხადყო, რომ მზად ვართ ჩემპიონთა ლიგაში ტექნოლოგიის გამოსაყენებლად...

ოქმი, რომელიც არის სახელმძღვანელო იმისთვის, თუ რა შემთხვევებში უნდა გამოვიყენოთ ვიდეორეფერი, შეადგინა საფეხბურთო ასოციაციების საბჭომ, რომელიც საფეხბურთო წესებს არეგულირებს. ის მაქსიმალურად მარტივია. ვიდეოდამხმარე ერევა თამაშში მაშინ, როცა ამჩნევს აშკარა შეცდომას ოთხ ისეთ სიტუაციაში, როცა ეს გავლენას ახდენს თამაშის შედეგზე...

ეს არის გოლი და წესების დარღვევა საგოლე სიტუაციაში; პენალტი და წინასაპენალტო სიტუაცია; პირდაპირი წითელი ბარათი და შეცდომა ფეხბურთელების იდენტიფიკაციაში, როცა მსაჯმა შეიძლება არასწორად დასაჯოს ესა თუ ის მოთამაშე...

ეს ეხება ასევე გოლებს, რომელიც წესების დარღვევის შედეგად გადის ან - თამაშგარე მდგომარეობის დროს. ახალი 3D-ტექნოლოგია კარგად არკვევს, იყო თუ არა ოფსაიდი. ვიდეორეფერი ერევა თამაშში, როცა აშკარაა უხეშობა - როცა ეს უხეშობა აუცილებლად წითელი ბარათით უნდა დაისაჯოს. აუცილებელი იქნება ჩარევა იმ ეპიზოდებშიც, როცა საჯარიმოში აშკარაა ჯარიმა და ამას უნდა მოჰყვეს პენალტი. ან იმ სიტუაციებში, როცა პენალტი არ უნდა დაინიშნოს...

მაგალითად, ვიდეორეფერი უნდა ჩაერიოს მაშინ, როცა შესამჩნევი იქნება, როგორ ითამაშა ფეხბურთელმა შეგნებულად ხელით ან ხელის გულით საჯარიმოში. ბრიგადამ უნდა მიიღოს მხედველობაში მოძრაობა, დისტანცია და ხელის ან ხელის გულის მდგომარეობა, რათა გადაწყვიტოს - დასაჯოს თუ არა ესა თუ ის გუნდი პენალტით. ასეთ დროს მოედანზე მყოფმა არბიტრმა ამ ეპიზოდის გამეორება აუცილებლად უნდა ნახოს", - თქვა როზეტიმ.

372
მკითხველის კომენტარები / 0 /
მსგავსი ამბები
რუბრიკის სხვა სიახლეები
;