როგორ ვერ გაიყვეს გიგზებმა ქალი

რაიან გიგზი

საერთოდ ასეა – კაცი, რომ საკუთარ ძმას ეტყვის ცოლის მოყვანას ვაპირებო, პასუხად პოზიტიური რეაქცია და კეთილი სურვილები უნდა მიიღოს. ასეა მაგალითად საქართველოში და ასეა უელსში, თუ ინგლისშიც.

მაგრამ როდესაც რაიან გიგზს მისმა ძმამ როდრიმ დაოჯახების თაობაზე თავისი სურვილი გაუმხილა და საცოლეს ვინაობაც უთხრა ,,მანჩესტერ იუნაიტედის" ლეგენდარულ ფეხბურთელს არ გახარებია, თუმცა შეეცადა არც წყენა შეემჩნია.
მიზეზი ის არ ყოფილა, რომ როდრის ,,იუნაიტედის" მოსისხლე მტრის ,,მანჩესტერ სიტის" ფანი უნდა მოეყვანა ცოლად, ან მის სარძლოსთან რელიგიური, თუ პოლიტიკური შეუთავსებლობა ჰქონდა.

შეუთავსებლობა კი არა, ეს გოგო რაინთან კარგად, ან სულაც ზედმეტად კარგად იყო ,,შეთავსებული".

მეტიც, ის მისი საყვარელი გახლდათ.

მსოფლიოში აღიარებულ ფეხბურთელს რაიან გიგზს პუბლიკა ყოველთვის დიდ პატივს სცემდა. ის ცნობილია თავისი დისციპლინირებულობითაც. ხანგრძლივი (1990 წლიდან 2014 წლამდე) საფეხბურთო კარიერა ისე დაასრულა უელსელმა რომ წითელი ბარათი არ ჰქონდა მიღებული. ერთადერთხელ სანაკრებო მატჩში გააძევეს მოედნიდან.

რაიანის მამა რაგბს თამაშობდა და ძირძველი უელსური კლუბის ,,კარდიფის" ღირსებას იცავდა. ოჯახის მანჩესტერში გადასვლისას ფეხბურთის მომავალი ვარსკვლავი 6 წლის იყო. ის კარდიფიდან თუ არ წავიდოდა, ალბათ ნამდვილად ოვალურ ბურთს შეიყვარებდა, მაგრამ საკმაოდ დიდი საფეხბურთო ტრადიციების მქონე ქალაქში ჩასვლამ მისი ფეხბურთელობის შანსი ერთიორად გაზარდა და საბოლოოდ ხორციც შეასხა.

ოჯახი რაიან გიგზმა 2007 წელს შექმნა. მან ცოლად მოიყვანა სტეისი ქუქი.

აი ნატაშას კი, რომელიც შემდეგ მისი ძმის მეუღლე გახდა რაიანი 2003 წლიდან ხვდებოდა.

მომავალი შეყვარეულები პირველად ერთმანეთს მანჩესტერის ერთ-ერთ ღამის კლუბში შეხვდნენ. 20 წლის ნატაშა მაშინ თავისი პირველი შვილის მამასთან დაშორებული, გიგზი კი თავის პირველ ცოლთან დაუბრებული გახლდათ. შეყვარებულები აქტიურ ურთიერთობაში გადავიდნენ. მოგვიანებით ნატაშას მეგობარი იხსენებს, რომ ის არწმუნებდა დაქალს, გაეწყვიტა ურთიერთობა რაიანთან, მაგრამ უელსელი ვარსკვლავი მისთვის ნარკოტიკივით იყო.

,,ნატაშა ყველაფერს აკეთებდა, რასაც რაიანი ეუბნებოდა, უარის თქმის უნარი არ ჰქონდა. რაიანს არასოდეს ჰყვარებია ნატაშა, მათ შორის მხოლოდ სექსი იყო და არანაირი სიყვარული" - ამტკიცებდა შემდეგ ეს გოგონა. მაგრამ გიგზის საყვარელთან ურთიერთობა წყვეტილი პერიოდებით გაგრძელდა და ამასობაში რაიანის ძმამ როდრიმ მოასწრო ამ ქალის შეყვარება, მერე კი მისი ცოლად მოყვანაც.

,,მანჩესტერის" ვარსკვლავმა მოგვიანებით სტეისიზე კი იქორწინა, მაგრამ ნატაშასაც ვერ უგანა და ვერც როდრის გაუმხილა მის საცოლესთან აქტიური სასიყვარულო ურთიერთობის თაობაზე.

ცნობილი ფეხბურთელის ძმა სიჯიუტითაც ცნობილი იყო და რადგან მტკიცედ ჰქონდა გადაწყვეტილი დაოჯახება, ვინძლო ერთი ქართული ფილმის პერსონაჟივით, უარის არგუმენტს თუ მოისმენდა რაიანისთვის მიეხალა:
- მაიტა მაშინ შენი ცოლი!
ამიტომ რაიანმა როდრის არ გაუმხილა, რომ ქალი, რომლის ცოლად მოყვანასაც აპირებდა მისი საყვარელი იყო.

ჩანს როდრი გაგებაში, როგორც პირდაპირ, ისე ირიბად ერთობ მოიკოჭლებდა, რადგან მან ისიც ვერ გაიგო, რომ ძმა და უკვე თავისი ცოლი ნატაშა ისევ ხვდებოდნენ ერთმანეთს.

უკიდურესად ჩახლართული, რბილად რომ ვთქვათ არაეთიკური და მიუღებელი სასიყვარულო ისტორია 2011 წლის გაზაფხულზე გასკდა და ნაღმის აფეთქების ხმა შორს გავარდა.

ნატაშამ მისი და გიგზის ,,ლავ სთორი" მედიას ჩაუკაკლა, რქებდადგმულ როდრის ღამით გაეპარა, წერილი დაუტოვა, რომ დილით გაზეთები ენახა და უკანმოუხედავად ესპანეთისკენ გასწია.

ძმებს შორის ცხადია მყისვე უთანხმოება ჩამოვარდა, შემდეგ რაიან გიგზს ცოლიც გაშორდა და ყველა ამ ამბავმა ძველი მორაგბე მამამისი, ოჯახი ცუდად შეკრული მოლივით რომ ჩაექცა, ლამის გადაიყოლა.
ფეხბურთის უელსელ ვარსკვლავს საზოგადოებისგან დიდი დოზით კრიტიკაც ერგო, ზოგიერთმა კომპანიამ მასთან სულაც კონტრაქტი გაწყვიტა.

რაიანი წლების მანძილზე ცდილობდა ძმის თვალში თავისი რეპუტაციის რეაბილიტაცია მოეხდინა, თუმცა უშედეგოდ. ცოტა ხნის წინ როდრიმ კიდევ ერთხელ განუცხადა ბრიტანულ მედიას, რომ უელსელ ვარსკვლავს და ამ ქვეყნის საფეხბურთო ნაკრების თავკაცს რაიან გიგზს ის არ აპატიებს ჩადენილს.

1856
მკითხველის კომენტარები / 0 /
მსგავსი ამბები
რუბრიკის სხვა სიახლეები
;