ალექსანდრ მოსტოვოი: რუსეთში საუკეთესოები ქართველები არიან! ხურცილავა, ჩივაძე... ჯიქია

"რკინის კაცი დაშავდა, რუსეთის ნაკრები და "სპარტაკი" ჯიქიას გარეშე დარჩნენ", - ასე გამოეხმაურა ცნობილი რუსი ჟურნალისტი იგორ რაბინერი წარმოშობით ქართველი მცველის, გიორგი ჯიქიას ამბავს.

ჯიქია მსოფლიოს  ჩემპიონატის მიღმა

შეგახსენებთ, რომ მოსკოვის "სპარტაკმა" სეზონისთვის მზადება უმძიმესი დანაკლისით დაიწყო - ჯიქიამ "შანხაი შანგანთან" დუბაიში გამართულ საწვრთნელ შეხვედრაში გადაცემა გააკეთა და... მოულოდნელად ჩაიკეცა. 23 წლის მცველი იმდენად მძიმედ დაშავდა, ტკივილისგან დიდხანს ყვიროდა...

სამწუხარო დიაგნოზი დადასტურდა - ჯიქიას ჯვარედინი იოგები დაუწყდა. მას ოპერაცია და ხანგრძლივი რეაბილიტაცია დასჭირდება - მინიმუმ 6 თვე მაინც. გამომდინარე აქედან, ის გამოტოვებს 2018 წლის მსოფლიო ჩემპიონატს, რომელიც ივნისში რუსეთში დაიწყება.

"ეს დიაგნოზი საშინელი ამბავია "სპარტაკისა" და რუსეთის ნაკრებისთვის. ორივეს მთავარი ბრძოლები წინ ელის. მოსკოვურ კლუბს ნომერი პირველი მცველი დააკლდება, ხოლო რუსეთის საფეხბურთო ნაკრებს - 2018 წლის მსოფლიოს ჩემპიონატზე ერთ-ერთი საინტერესო მოთამაშე", - წერს პოპულარული გამოცემა "სპორტ-ექსპრესი".

მოსტოვოის რჩეულები

გიორგი ჯიქიას სამწუხარო ამბავზე რუსეთის ნაკრებისა და ესპანური გუნდის, ვიგოს "სელტას" ყოფილმა კაპიტანმა, ალექსანდრ მოსტოვოიმ საინტერესო შეფასება გააკეთა.

"მე ადრეც მკითხეს, თუ ვის მოვიაზრებ რუსეთის პრემიერლიგის პირველი ნახევრის საუკეთესო ცენტრალურ მცველებად. მიმაჩნია, რომ დღეს ამ პოზიციაზე ორი საუკეთესოა და ორივე ქართველია - გიორგი ჯიქია და საბა კვირკველია", - ამბობს მოსტოვოი.

სწორედ ამ ფრაზას მოჰყვა წერილი ყაზახურ ინტერნეტგამოცემა "პროსპორტში", რომელიც ქართველ მცველებს და, ზოგადად, ფეხბურთს ეხება...

ბიჭები საქართველოდან, დავიწყებული არავინაა

"რუსეთის საუკეთესო მცველი გიორგი ჯიქია სერიოზულად დაშავდა, რაც მას მსოფლიო თასის მიღმა ტოვებს. ყველა ექსპერტმა და მწვრთნელმა ერთსულოვნად უწოდა "კატასტროფა" ამ საშინელ ამბავს მოსკოვის "სპარტაკისა" და რუსეთის ნაკრებისთვის.

წლის საუკეთესო 5 ფეხბურთელის განსაზღვრისას, თეთრ-წითლების მწვრთნელმა მასიმო კარერამ პირველ ადგილზე ჯიქია დააყენა. არადა, მასთან თამაშობენ პრომესი, ადრიანო, გლუშაკოვი... იური სიომინმა კი საუკეთესოდ საბა კვირკველია აღიარა.

გასაგებია, რომ ყველა საკუთარს ადიდებს, მაგრამ ალექსანდრ მოსტოვოიმ ბოლო ემოციურ ინტერვიუში ცალსახად თქვა, რომ სეზონის პირველი ნახევრის საუკეთესო ცენტრალური მცველები ჯიქია და კვირკველია არიან.

რატომ ვამბობ ამ ყოველივეს? მარტივი კითხვა ჩნდება - როგორ ახერხებს პატარა საქართველო ასეთი დიდი ფეხბურთელების აღზრდას? და რატომ იყვნენ სწორედ ქართველი მცველები ყველა დროში თავიანთი გუნდების კაპიტნები და ლიდერები, მათ შორის, საბჭოთა კავშირის ნაკრებში ან რუსეთის ჩემპიონატშიც აშკარად რატომ გამოირჩევიან?

მაგალითისთვის შორს წასვლა არ დაგვჭირდება: ლეგენდარული საბჭოთა ფეხბურთელი მურთაზ ხურცილავა 1966 და 1970 წლების მსოფლიოს ჩემპიონატების მონაწილეა.

ის ბოლო 50 წლის განმავლობაში საქართველოს საუკეთესო ფეხბურთელად აღიარეს. და ეს როგორ კომპანიაში - სად არიან დიდი მიხეილ მესხი და სლავა მეტრეველი, ვლადიმერ გუცაევი და ვიტალი დარასელია, გივი ნოდია და რამაზ შენგელია?

ამ გამოკითხვაში მისი კონკურენცია ვერ შეძლეს შედარებით ახალგაზრდა თაობის ფეხბურთელებმა, რომლებმაც ევროპაში გაიბრწყინეს - შოთა არველაძემ, გიორგი ქინქლაძემ, თემურ ქეცბაიამ...

ხურცილავასთან ერთად, გამოირჩეოდა თბილისის "დინამოსა" და სსრკ-ის ნაკრებში მისი პარტნიორი რევაზ ძოძუაშვილი. 1970 წლის მსოფლიოს ჩემპიონატის შესარჩევი ციკლის მატჩში მან პირწმინდად "ჩაკეტა" თვით ჯორჯ ბესტი, რომელმაც ერთი წლით ადრე ევროპის საუკეთესო ფეხბურთელისთვის დაწესებული პრიზი, "ოქროს ბურთი" მიიღო. ოთხჯერ ითამაშა რევაზის წინააღმდეგ დიდმა იუგოსლავმა დრაგან ჯაიჩმა და მოგვიანებით აღიარა, რომ საბჭოთა კავშირის მცველმა ოთხივეჯერ აჯობა...

თაობების ცვლასთან ერთად, თბილისში "დინამოში" ახალი მოთამაშეები მივიდნენ, რომლებიც ქვეყნის ჩემპიონები და საბჭოთა კავშირის თასის ორგზის გამარჯვებულები გახდნენ.

1981 წელს მათ ევროპა დაიპყრეს - თასების მფლობელთა თასის გათამაშებაში გაიმარჯვეს. გუნდს წინ უძღოდა საბჭოთა ნაკრების ახალი კაპიტანი ალექსანდრე ჩივაძე - ცენტრალური მცველის ეტალონი. საბჭოთა ნაკრებში მის მარჯვნივ მუდმივად იდგა თენგიზ სულაქველიძე, რომელსაც გულშემატკივარმა "რკინის კედელი" შეარქვა...

მოვიდა 90-იანი წლები. დიდი საფეხბურთო "დერჟავა" რამდენიმე ქვეყნად დაიშალა და თითოეულმა მათგანმა საკუთარი გზა აირჩია. ქართულ ფეხბურთში ისევ იყვნენ მკაფიო ვარსკვლავები, მაგრამ საქართველოს ნაკრებმა დიდ წარმატებებს ვერ მიაღწია.

არადა, ამ თაობას ჰყავდა ფენომენალური დაცვის ხაზი, რომელსაც "მილანის" ფეხბურთელი კახა კალაძე "აბეტონებდა". ეროვნულ ნაკრებში თამაშობდნენ კახა ცხადაძე, ზურაბ ხიზანიშვილი, ლევან კობიაშვილი, რომელიც ასევე ქართული ფეხბურთის ლეგენდა გახდა...

მოგვიანებით, მათ შეუერთდა ამ საუკუნის დასაწყისის მოსკოვის "ლოკომოტივის" ერთ-ერთი საუკეთესო ფეხბურთელი მალხაზ ასათიანი...
ერთხელ, "ლოკომოტივის" მწვრთნელმა იური სიომინმა თქვა: "ჩვენთან ქართველები ყოველთვის კარგად თამაშობდნენ. როგორც კი ისინი მოდიან, ჩვენ ვიმარჯვებთ".

ყველას ახსოვს "რკინიგზაში" მიხელ აშვეთია, ზაზა ჯანაშია, დავით მუჯირი-უმცროსი... დღევანდელი გუნდის ლიდერი, საქართველოს 2017 წლის საუკეთესო ფეხბურთელი საბა კვირკველია კი, ალბათ, ის თილისმაა, რომელიც მოსკოვის "ლოკომოტივს" ნანატრ ჩემპიონობას მოუტანს.

როგორც ამბობენ - თამაშს იგებს თავდასხმა, ტიტულებს კი - დაცვა. ქართველი მცველებით რომ ვერ გაიმარჯვო, ამისთვის ძალიან უნდა მოინდომო".

სკანდალი შოკოლადზე

ამ ამბავს წინ უძღოდა სკანდალი, რომელზეც კომენტარი რუსეთში მოთამაშე კიდევ ერთმა ქართველმა, გია გრიგალავამ გააკეთა. ტულის "არსენალის" მცველს "სპორტ-ექსპრესმა" ინტერვიუ ჩამოართვა. გრიგალავას თქმით, რუსეთის პრემიერლიგაში მოთამაშე ქართველებთან ხშირად ურთიერთობს.

"კვირკველიასთან ყოველთვის კავშირზე ვარ. ასევე, ჯიქიასთანაც ხშირად ვსაუბრობ. ვფიქრობ, "ლოკომოტივს" ჩემპიონობის მოგების ყველაზე კარგი შანსი აქვს. პირველი წრის შემდეგ ისინი კონკურენტებს 8 ქულით უსწრებენ და ეს დიდი სხვაობაა", - ამბობს გრიგალავა.

28 წლის ფეხბურთელი ჯიქიას თაობაზე აგორებულ სკანდალსაც გამოეხმაურა, რომლის გამოც მოსკოვის "სპარტაკი" საერთაშორისო სკანდალში გაეხვია.

კლუბის ოფიციალურ "ტვიტერზე" ჯიქიას მიკრობლოგის წაყვანა დაევალა, სადაც მან იხუმრა ბრაზილიელ ლუის ადრიანოს, პედრო როშასა და ფერნანდოზე: "ნახეთ, შოკოლადები მზეზე როგორ დნებიან".

ამის გამო, დასავლურმა მედიამ "სპარტაკი" რასიზმში დაადანაშაულა. მალე მოსკოვურმა კლუბმა ეს პოსტი წაშალა და ბოდიში მოიხადა: "სპორსტმენს არავის გაბრაზება არ სურდა, უბრალოდ, ცუდად იხუმრა".

გრიგალავა ამ ფაქტსაც გამოეხმაურა: "ეს სრული აბსურდია. პატარა რაღაცაზე უმალ რასიზმს ახსენებენ და არაფრისგან სკანდალს ქმნიან. ფერადკანიან ფეხბურთელებს არავინ არაფერს უშავებს. ჯიქიას ძალიან კარგად ვიცნობ.

ის მხიარული ბიჭია და ბრაზილიელებს მისი ხუმრობა ესმით. ეს ყველაფერი თითიდანაა გამოწოვილი... ალბათ, სპეციალურად ზის ხალხი, ვინც ყველაფერს იძიებს. ეს, უბრალოდ, სისულელეა.

არ მეგულება ფეხბურთელი, რომელიც მსგავს ხუმრობას რასისტულ შეურაცხყოფად იღებს. ისინი კარგი მეგობრები არიან, რომელთაც 24 საათის განმავლობაში მუდმივი კონტაქტი აქვთ".

ყოველდღიური სპორტული გაზეთი "ლელო"
10079
მკითხველის კომენტარები / 0 /
მსგავსი ამბები
რუბრიკის სხვა სიახლეები