როგორ უტევს დიდი ექვსეული

როგორც არ უნდა ვცემდეთ პატივს მეკარეების, მცველებისა და ნახევარმცველების, ან თუნდაც მწვრთნელების მნიშვნელობასა და მათ გარჯას, ფეხბურთში მაინც გოლი და ამ გოლების შემოქმედნი ფასობენ ყველაზე მეტად.

მოთამაშეთა სატრანსფერო ღირებულებებიც რომ შევადაროთ ერთმანეთს, არახალია, რომ თავდამსხმელთა ფასები გაცილებით მაღალია. ამიტომაც, განურჩევლად დიდია მათი როლი თითოეულ გამარჯვებაში.

"დეილი მეილიც" სწორედ შეტევითი პოტენციალის (ოთხ-ოთხი შემტევი ფეხბურთელი ექვსეულის თითოეული გუნდიდან) ანალიზით აფასებს პრემიერლიგის "დიდი ექვსეულის" პერსპექტივას.

ოღონდ, დავაკვირდეთ ერთ მნიშვნელოვან გარემოებას - აქ თამასა დაწეულია ჩემპიონთა ლიგაში გამსვლელ ოთხ ადგილამდე და არ ახსენებენ საჩემპიონო შანსებს, რადგან დღეს ინგლისში ლამის ყველა თანხმდება იმაზე, რომ "მანჩესტერ სიტის" ამ სეზონში პირველი ადგილი უკვე დაჯავშნილი აქვს.

პეპ გვარდიოლას გუნდი, რომელიც უახლოეს მდევარს 11 ქულით უსწრებს, უბრალოდ, განწირულია ჩემპიონობისთვის...

მანჩესტერ სიტი

ლეროი სანე, რაჰიმ სტერლინგი, გაბრიელ ჟეზუში, სერხიო აგუერო

"მანჩესტერ სიტის" შემტევი ოთხეული, რომელსაც უდიდესი მხარდაჭერა აქვს დავიდ სილვასა და კევინ დე ბრუინისგან, ამ სეზონში შეუჩერებელია. 18 ტურის შემდეგ "ქალაქალები" ლიდერობენ არა მხოლოდ ქულებით, არამედ ზღაპრული (56 გოლი!) შედეგიანობითაც. შესაძლოა, ეს უფრო შთამბეჭდავი მაჩვენებელიც იყოს, ვიდრე მოგებათა 16-მატჩიანი სერია...

მას მერე, რაც მარცხენა მცველმა ბენჟამინ მენდიმ სექტემბერში მძიმე ტრავმა მიიღო და კარგა ხნით გამოვიდა მწყობრიდან, პეპ გვარდიოლა სასტარტოში იშვიათად აყენებს ერთად გაბრიელ ჟეზუშსა და სერხიო აგუეროს. ის ასე ხსნის თავის არჩევანს:

"როცა არ გყავს მენდი, რომელსაც შეუძლია იერიშებში მონაწილეობაც, განსხვავებით დელფისგან, მაშინ ფლანგზე აუცილებელი ხდება სანეს გამწესება. ასეთ შემთხვევაში, აგუეროსა და ჟეზუშის ერთად დაყენება დიდი ფუფუნებაა და ამის გაკეთება მხოლოდ განსაკუთრებულ სიტუაციებში შეიძლება".

სწორედ ლეროი სანესა და რაჰიმ სტერლინგის თვალშისაცემი პროგრესია ის დიდი ბონუსი, რამაც ამ სეზონში "სიტის" შეტევა კიდევ უფრო შედეგიანი გახადა.

გოლების ის რაოდენობა, რაც ზემოთ ხსენებულმა დეუტმა გაიტანა მიმდინარე კამპანიაში, უკვე დიდი სიურპრიზია და ზუსტად ხსნის შარშანდელთან შედარებით "ქალაქელთა" პროგრესის საიდუმლოს.

სანეს 6 გოლი აქვს გატანილი (მაშინ, როცა მთელ წინა სეზონში 5-ჯერ აიღო მეტოქეთა კარი), ხოლო სტერლინგის მონაგარი (10) უკვე სამჯერ მეტია 2016/17 წლების მაჩვენებელზე.

გუნდის გოლები: 56
შემტევი ოთხეული : 35 (62.5%)
რეიტინგი: 5/5

ლივერპული

მოჰამედ სალაჰი, რობერტო ფირმინო, ფილიპე კოუტინიო, სადიო მანე

"დეილი მეილის" ექსპერტი, "ბლექბერნისა" და "სელტიკის" ყოფილი ფორვარდი კრის სატონი ფიქრობს, რომ "ლივერპულის" შემტევი პოტენციალი, შეიძლება, უფრო მაღალ დონეზე გავიდეს და თვით "სიტისაც" აჯობოს. საქმე ისაა, რომ "წითლების" წინა ხაზი უფრო არატრადიციულია.

ვთქვათ, რობერტო ფირმინო, რომელიც არ არის სუფთა ფორვარდი, როგორც სერხიო აგუერო, გაბრიელ ჟეზუში, ჰარი კეინი თუ რომელუ ლუკაკუ, არანაკლებ მიდრეკილია გოლებისადმი, ვიდრე ზემოთ ხსენებული კვარტეტი.

არადა, "ლივერპულს" დღეს ჰყავს ფეხბურთელი, რომელიც სათავეში უდგას პრემიერლიგის ბომბარდირთა დავას - მოჰამედ სალაჰი 14 გოლით. ეგვიპტელი არის ბრწყინვალე დანამატი ენფილდელთათვის, რომელთა შეტევითი პოტენციალი შესამჩნევად იკლებდა წინა სეზონში, როცა ტრავმების გამო არ თამაშობდა სადიო მანე.

რაც შეეხება ფილიპე კოუტინიოს, ამ სეზონში მან სულ 18 მატჩი ჩაატარა და 10 გოლი გაიტანა, აქედან 5 - პრემიერლიგაში. თუ "ლივერპულმა" იანვარში მისი შენარჩუნება მოახერხა და დაცვის საიმედოობაც (დღეს ის გაცილებით მაღალია, ვიდრე გასულ სეზონში) არ შეირყა, იურგენ კლოპის გუნდს დიდი წვალება არ მოუწევს ოთხეულში მოსახვედრად.

გუნდის გოლები: 38
შემტევი ოთხეული: 28 (76.3%)
რეიტინგი: 4/5

ტოტენჰემი

დელე ალი, ჰარი კეინი, კრისტიან ერიქსენი, სონ ჰიუნგ-მინი

ჰარი კეინმა ამ წელს თითქმის მიაღწია იმ სიმაღლეს (50 გოლი), სადაც დგანან ლიონელ მესი და კრიშტიან რონალდო 53-53 გოლით.

ამდენად, მის საგოლე მადაზე დიდად არის დამოკიდებული "ტოტენჰემის" კეთილდღეობა, მით უმეტეს, იმ ფონზე, როცა ვერ არის ფორმაში (რაც დროებითი მოვლენა უნდა იყოს) დელე ალი.

მაგრამ მაურისიო პოჩეტინოს ჰყავს ერთი ფეხბურთელი, რომელმაც ამ სეზონში საგრძნობი ნახტომი გააკეთა - სონი, ვინც ერთ-ერთი ყველაზე დაუფასებელი ფეხბურთელია დღევანდელ პრემიერლიგაში და ექსპერტთა აზრით, უფრო მეტ ნდობასაც იმსახურებს.

"ტოტენჰემის" შემტევ ოთხეულში ყველაზე კრეატიული კრისტიან ერიქსენია, რომლის წილი "მამლების" მონაგარში 5 გოლს შეადგენს.

პოჩეტინოს გუნდის მინუსი ის არის, რომ ძალიანაა დამოკიდებული კეინის, ალის, იმავე ერიქსენისა და სონის "მოსავლიანობაზე", ვიდრე ეს "დიდი ექვსეულის" სხვა გუნდებშია და ამაზე მარტივი სტატისტიკაც ("ტოტენჰემის" გოლების 80 პროცენტზე მეტი სწორედ მათზე მოდის) მეტყველებს.

გუნდის გოლები: 31
შემტევი ოთხეული: 25 (80.6%)
რეიტინგი: 3.5/5

მანჩესტერ იუნაიტედი

რომელუ ლუკაკუ, ანტონი მარსიალი, მარკუს რაშფორდი, ჯესი ლინგარდი

თამამად შეიძლება ითქვას, რომ რომელუ ლუკაკუმ უკვე გაუმართლა იმედები "ოლდ ტრაფორდს" თავისი 16 გოლით (თუ ჩათვლაში მივიღებთ ყველა ტურნირს).

მიუხედავად იმისა, რომ ჟოზე მოურინიოს გუნდი განსხვავებული სქემით უტევს, ვიდრე "ლივერპული", ფაქტია - "მანჩესტერ იუნაიტედს" ამ დროისთვის უფრო მეტი გოლი აქვს გატანილი, ვიდრე მერსისაიდელებს.

თუ ჯესი ლინგარდი შეინარჩუნებს დღევანდელ კონდიციებს, ხოლო ანტონი მარსიალი და მარკუს რაშფორდი გაზრდიან საგოლე მარაგს სეზონის მეორე ნახევარში, მაშინ "იუნაიტედს" ყველა საფუძველი ექნება ოპტიმიზმისთვის.

არ დაგვავიწყდეს ზლატან იბრაჰიმოვიჩიც. მას ძალიან ბევრი გაუცდა და ამიტომაც ვერ არის ჯერ საკადრის ფორმაში. თუმცა მისი მომავალი "ოლდ ტრაფორდზე", თუნდაც ასაკიდან (36) გამომდინარე, მაინც ბუნდოვანია.

თან აქ ერთი სირთულეცაა - მოურინიოს ძნელად წარმოუდგენია შეტევაში ზლატანისა და ლუკაკუს ერთდროულად გამწესება.

გუნდის გოლები: 39
შემტევი ოთხეული: 23 (59%)
რეიტინგი: 3.5/5

ჩელსი

ედენ აზარი, ალვარო მორატა, ვილიანი, პედრო

"ჩელსის" შეტევაში მთავარი კაცი მაინც ედენ აზარია. ერთი მხრივ, ის შესანიშნავად თამაშობს, ქმნის საგოლე მომენტებს როგორც თავისთვის, ისე პარტნიორებისთვის, მაგრამ იმდენი ვერ გააქვს, რამდენიც ადეკვატური იქნებოდა მისი თამაშის ხარისხის - 8 გოლი ყველა ტურნირში, ხოლო აქედან 5 - პრემიერლიგაში. დაგვეთანხმებით, აზარის ციფრები თვალს ნამდვილად არ ჭრის.

ამ ფონზე, ძალიან დიდი შეღავათია ალვარო მორატას ფაქტორი. ტანმაღალი, ათლეტური ესპანელი, თავისი 9 გოლით, ბრწყინვალეა "მეორე სართულზე". თან ეს ხდება პირველივე სეზონში და ისეთ რთულ ტურნირში, როგორიც ინგლისური პრემიერლიგაა.

რაც შეეხებათ პედროსა და ვილიანს. მათი მონაგარიც ვერ არის შთამბეჭდავი - ესპანელის ანგარიშზე სულ 3 გოლია, ბრაზილიელმა კი მხოლოდ 2-ჯერ დალაშქრა მეტოქეთა კარი. ანტონიო კონტეს აქაც ესპანელი მოევლინა მშველელად - მცველი მარკოს ალონსო, რომელმაც მიმდინარე პრემიერლიგაში 4 გოლი გაიტანა.

გუნდის გოლები: 32
შემტევი ოთხეული: 19 (59.4%)
რეიტინგი: 3.5/5

არსენალი

ალექსის სანჩესი, მესუთ იოზილი, ალექსანდრ ლაკაზეტი, ალექს ივობი

ალექსის სანჩესმა და მესუთ იოზილმა, ჯერჯერობით, ვერ მიაღწიეს შარშანდელ დონეს. გასულ ზაფხულს ორივე გამზადებული იყო წასასვლელად.

ახლა სიტუაცია ასეა - მათ კონტრაქტები ამ სეზონის ბოლოს უმთავრდებათ და "არსენალი" რომც ვერ მოხვდეს ჩემპიონთა ლიგაში, სანჩესი და იოზილი ისეთ გუნდებში გადავლენ, სადაც ევროპის უპრესტიჟულეს ტურნირში მონაწილეობა გარანტირებული ექნებათ.

როგორც ჩანს, ეს გარკვეულ გავლენას ახდენს მათ მოტივაციაზე...

უცნაურია, რომ ალექსანდრ ლაკაზეტი, რომელიც "არსენალმა" ზაფხულში "ლიონისგან" 50 მილიონ ფუნტად იყიდა და დღეს "მეთოფეთა" ბომბარდირია 8 გოლით, ყოველთვის ვერ ხვდება ძირითად შემადგენლობაში.

არსენ ვენგერის სამყაროში ასეთი პარადოქსები ბოლო პერიოდში არახალია.

და მაინც, ამ პირობებშიც კი, "არსენალი" მხოლოდ ერთი ქულით ჩამორჩება მეოთხეადგილოსან "ლივერპულს".

გუნდის გოლები: 31
შემტევი ოთხეული: 16 (51.6%)
რეიტინგი: 3/5

ყოველდღიური სპორტული გაზეთი "ლელო"
1469
მკითხველის კომენტარები / 0 /
მსგავსი ამბები
რუბრიკის სხვა სიახლეები
;