[7 დღის 5 ჰიტი] როდესაც მონსტრების ჭიდილში საქართველო იჭყლიტება

მეტად დატვირთული შვიდდღეული გამოვიდა, საქართველოს კალათბურთელთა ნაკრებმა ორი ისტორიული მატჩი გამართა; ითამაშა მორაგბეთა ნაკრებმა; გენო პეტრიაშვილმა იშვიათი ოქრო მოიპოვა; ხოლო ძალოსანმა შოთა მიშველიძემ დაგვანახა, რომ მსუბუქ წონით კატეგორიაშიც შეგვიძლია ზემძიმე შტანგების ატაცება.

1. ახალი ნაკრები

ბედი არ გინდა? ჯერ იყო და, საქართველო ბიზანტიისა და ირანის დავაში ორად იყო გაყოფილი, შემდეგ მას რუსეთი და თურქეთი ვერ იყოფდნენ... გველეშაპთა დაპირისპირების მსხვერპლი საქართველო კიდევ ერთხელ აღმოჩნდა. საკალათბურთო მონსტრები იგულისხმება - ერთი მხრივ ევროლიგა, მეორე მხრივ ფიბა. საქართველო ფიბას წევრია, მაგრამ ეს სულაც არ ნიშნავს იმას, რომ მის უთავობაზე თამამად ვერ დაწეროთ.

ორიოდე წლის წინათ ფიბამ გადაწყვიტა ევროპის ჩემპიონატისა და მსოფლიოს თასის საკვალიფიკაციო ეტაპები წელიწადის განმავლობაში ოთხ თვეზე გაენაწილებინა. გაანაწილა კიდეც, ოღონდ ევროლიგას მოურიგდა - სანაკრებო მატჩებისას კალენდარში ფანჯრები გაგვიკეთეო. ევროლიგაც დაჰპირდა, გაგიკეთებთ, როგორ არაო.

მაგრამ პირობა არ შეასრულა, მას მერე, რაც ფიბამ სანაკრებო მატჩები ნოემბერში, თებერვალსა და ივნისში დანიშნა, ევროლიგამ შორს დაიჭირა - ჩემი კალათბურთელები არსადაც არ წავლენო და სწორედ სანაკრებო ფანჯრებში დანიშნა ევროლიგის მატჩები.

ფიბა ბავშვის სიტუაციაში აღმოჩნდა, რომელსაც უფროსმა თავში გემრიელად წაუთაქა... ევროლიგას ვერაფერი უპასუხა.

შედეგად, მსოფლიოს ჩემპიონატის საკვალიფიკაციო მატჩებში ევროლიგის კალათბურთელებმა მონაწილეობა ვერ მიიღეს. სერბეთს ამოუწურავი რესურსი აქვს და მაინც ორივე თამაში მოიგო, მაგრამ საქართველოს დარი გუნდები ფიბამ საბოლოოდ გასწირა.

ჯგუფიდან ვერგასვლაზე არ ვლაპარაკობთ, საქმე ის არის, რომ ევროლიგელები, თორნიკე შენგელია და გიორგი შერმადინი რომ გამოეშვათ, სულ სხვა ნაკრები გვეყოლებოდა და ნოემბრიდანვე შევუდგებოდით მსოფლიოს თასზე მოხვედრისთვის საჭირო ქულების მოგროვებას. თუნდაც ევროლიგელებით გაძლიერებული გერმანიის ძლევაც რეალური იყო და სერბეთთან კიდევ უფრო თანაბრად თამაში...

ორი ლიდერის არყოფნაში მთავარ მწვრთნელ ილიას ზუროსს ჯადოსნური ჯოხის მომარჯვებამ მოუწია, მოიქნია და სულ სხვა კუთხით დაგვანახა მიხეილ ბერიშვილი, მერაბ ბოქოლიშვილი, სრული კარტ ბლანში მისცა მაიკლ დიქსონსა და მანუჩარ მარკოიშვილს, გუნდში დააბრუნა ნიკა ცქიტიშვილი, ლევან ფაცაცია, სასტარტო ხუთეულში დააყენა დებიუტანტი აკაკი დვალიშვილი, მეტად დატვირთა ანატოლი ბოისა...

და საქართველოს ნაკრების სათამაშო სტილიც შეცვალა - გერმანიაში, პირველ ტაიმში 12 სამქულიანი ჩავაგდეთ. სულ 16 სამიანი გამოვიყენეთ, რაც საქართველოს ნაკრების აბსოლუტური რეკორდია. სერბეთში მაიკლ დიქსონმა ისროლა - 36 ქულამდე ავიდა და 2006 წელს ზაზა ფაჩულიას მიერ დამყარებული რეკორდი გაიმეორა.

გერმანიაში 70:79 დავმარცხდით, სერბეთში - 87:105. მომდევნო მატჩი 23 თებერვალს ავსტრიაში გველის და სწორედ ეს გუნდია, რომელიც ოთხგუნდიან ჯგუფში ბოლო ადგილზე უნდა დავტოვოთ...

2. ძველი სურათი

აშშ-ისთან მატჩით საქართველოს მორაგბეთა ნაკრებმა ნოემბრის ტესტები დაასრულა. მთლად კალათბურთელებივით არა, მაგრამ მორაგბეთა მწვრთნელმა მილტონ ჰეიგმა ბევრი ახალბედა მოსინჯა. კმაყოფილიც დარჩა:

- საერთო ჯამში, კმაყოფილი ვარ. ამ ტესტების შედეგად აღმოვაჩინეთ რამდენიმე ახალგაზრდა, რომლებსაც შეგვიძლია მსოფლიოს თასზე დავეყრდნოთ. ნოემბრის ტესტების წინ სამი მოგება გვქონდა დაგეგმილი, ორში გავიმარჯვეთ, ხოლო უელსთან ბოლომდე ვინარჩუნებდით წარმატების მიღწევის შანსს.

თუმცა უნდა გავითვალისწინოთ, რომ ეს რაგბია, შენს წინააღმდეგ შენნაირი 15 მორაგბე დგას და მათაც შენნაირად სურთ გამარჯვება.
უელსთანაც რომ მოგებას დაგეგმავ, იმას ნიშნავს, ძლიერი ნაკრები გყავს და მწვრთნელს მისი სჯერა.

აშშ-თან 21:20 გავიმარჯვეთ.

3. მწვანე ჩემპიონი

საქართველოს ჩემპიონი ქუთაისის "ტორპედოა". იმერულმა გუნდმა ოქროს მატჩში "დინამოს" 1:0 მოუგო.
გოლი 74-ე წუთზე კაპანაძემ თავური დარტყმით გაიტანა.

მსაჯის მიერ დამატებულ მეოთხე წუთზე მსაჯმა ძალიან საეჭვო ვითარებაში ქუთაისის კარის მიმართულებით პენალტი დანიშნა, რითაც სტუმარი გულშემატკივრები გააცხარა და მოედანზე სკამების ნამტვრევების წვიმა წამოვიდა.

ქუთაისელთა მეკარე კვასხვაძემ კიტეიშვილის დარტყმული ბურთი ფეხით მოიგერია და ტორპედოელებმა 15-წლიანი შესვენების შემდეგ ჩემპიონის ტიტული პირველად მოიპოვეს.

4. ოქროს გენო

25 ნოემბერს, საქართველოს თავისუფალი სტილით მოჭიდავე 23-წლამდელთა ნაკრებმა პოლონეთის ქალაქ ბუდგოშჩში მიმდინარე მსოფლიოს ჩემპიონატზე ორი მედალი მოიპოვა - ოქრო და ბრინჯაო.

როგორც მოსალოდნელი იყო, ჩემპიონატზე პირველობა არავის დაუთმო უფროსებს შორის მსოფლიოს მოქმედმა ჩემპიონმა და რიოს ოლიმპიური თამაშების პრიზიორმა გენო პეტრიაშვილმა. ქართველმა მძიმეწონოსანმა ფინალში რუსების დაღესტნელი ფალავანი მაგომედამინ დიბიროვი 3:42 წუთში დაამარცხა – 11:0. იქამდე გენომ სამივე მეტოქეს ძირითად დროში აშკარა უპირატესობით სძლია.

5. ბრინჯაოს სტარტი
აშშ-ის ქალაქ ანაჰაიმში დაწყებულ ძალოსანთან მსოფლიოს ჩემპიონატზე საქართველოს ნაკრებმა პირველი მედალი მოიპოვა. თბილისის დროით 30 ნოემბერს, დილით, 62 კგ წონით კატეგორიაში ბრინჯაოს მედლის მფლობელი შოთა მიშველიძე გახდა.

მიშველიძემ ორჭიდის ჯამში 298 კილოგრამი დაძლია. აკვრაში მან სამივე ცდა წარმატებით გამოიყენა (148.157.163.). ატაცში პირველი მისვლა (130 კგ.) ვერ გამოიყენა, თუმცა დარჩენილ ორს (130.135) თავი იოლად გაართვა. საბოლოოდ მიშველიძე ატაცში მე-4 ადგილს დასჯერდა.

ყოველდღიური სპორტული გაზეთი "ლელო"
3111
მკითხველის კომენტარები / 0 /
მსგავსი ამბები
რუბრიკის სხვა სიახლეები
;