როდის დააგებენ მოედნებს?

ორიოდე დღის წინ სტადიონების თემა ისევ ამოტივტივდა და ამაზე "ლელო" წერდა. 2017 წელს დაიწყო სპორტისა და ახალგაზრდობის სამინისტროს პროექტის განხორციელება, რომელსაც სახელმწიფომ მხარი დაუჭირა და, რომლის თანახმადაც, თბილისსა და ქუთაისში საერთაშორისო სტანდარტების 10 მოედანი უნდა აშენდეს.

ახალი მოედნები ქუთაისსა და თბილისში

ქუთაისში, ნიკეას ქუჩაზე, "აია არენასთან" ახალი პროექტი უკვე ხორციელდება და სამი მოედანი კეთდება - 2 ბუნებრივი მოედნით, ხოლო 1 - ხელოვნური საფარით.

ერთი ბუნებრივსაფრიანი ფეხბურთელებს გადაეცემათ, სადაც მოეწყობა გასახდელები, განათების სისტემა და 300-მდე მაყურებელზე გათვლილი ტრიბუნები. დანარჩენი ორი მოედანი რაგბის მოემსახურება.

კულტურისა და სპორტის სამინისტროს ცნობით, ქუთაისში მოედნების მშენებელობა უახლოეს მომავალში დასრულდება.

"ქუთაისში მოედნები მოემსახურება ფეხბურთისა და რაგბის ეროვნულ და ასაკობრივ ნაკრებებებს, ასევე სხვადასხვა გუნდებს, როგორც სათამაშო, ასევე სავარჯიშო პროცესების გასავლელად. აღსანიშნავია, რომ უახლოეს მომავალში ახალი სპორტის სასახლეების გახსნა იგეგმება ბათუმში, გორსა და თელავში " - ამბობს მინისტრის მოადგილე შალვა გოგოლაძე.

ფეხბურთის ფედერაციის პრეზიდენტი ლევან კობიაშვილი მშენებლობის ტემპით კმაყოფილია: "ჯერჯერობით, ქუთაისში სამუშაოები იდეალურად მიმდინარეობს და ახალი მოედნების მშენებლობა მალე დასრულდება.

ამ პროექტს დიდი მნიშვნელობა აქვს და დიდი მადლობა მინდა გადავუხადო როგორც ჩვენს მთავრობას, ასევე სპორტის ყოფილ მინისტრს, ტარიელ ხეჩიკაშვილს, რომლის წვლილიც ამ პროექტის განხორციელებაში ძალიან დიდია.

ახალი ინფრასტრუქტურა ქართულ ფეხბურთს ძალიან სჭირდება და დარწმუნებული ვარ, ამ მოედნებზე არაერთი ნიჭიერი და წარმატებული ქართველი ფეხბურთელი გაიზრდება".

აქვე ვიტყვით, რომ 7 მოედნის მშენებლობა გრძელდება დიღომშიც, სადაც 4 ფეხბურთის იქნება, სამიც - რაგბის. შალვა გოგოლაძის თქმით, მოედნები თბილისშიც მალე იქნება მზად.

ოთხი გუნდი მშვიდადაა

დაანონსებული იყო, რომ 2018 წლიდან ეროვნული ლიგის არც ერთი გუნდი ხელოვნურ საფარზე არ ითამაშებდა. ცნობილია, რომ ახალი სპორტული ინფრასტრუქტურული პროგრამის განხორციელება იწყებოდა. დავინტერესდით და რამდენიმე ქალაქში არსებული ვითარება შევიტყვეთ.

ამჟამად, ეროვნულ ლიგაში მხოლოდ 4 გუნდია, რომელსაც მოედნის პრობლემა არ გააჩნია. გორში სტადიონიც განახლებულია და საქართველოში ერთ-ერთი საუკეთესო საფარიც არის, რომელიც 19-წლამდელთა ევროპის ჩემპიონატის მონაწილე ჰოლანდიისა და ინგლისის ნაკრებებს ძალიან მოეწონათ.

ეს პრობლემა თბილისურ გუნდებსაც არ აწუხებთ: "დინამო" თავის 5-ვარსკვლავიან არენაზე ითამაშებს, "ლოკომოტივი" - "მიხეილ მესხზე", ხოლო "საბურთალო" "დავით პეტრიაშვილი არენას" ქირაობს.

მაგრამ მთავარი პრობლემა იყო და დღემდე რჩება რაიონების ინფრასტრუქტურა, სადაც ყოველთვის დედაქალაქზე მეტი მაყურებელია. როგორც ჩანს, ახალ სეზონს მათი უმრავლესობა სხვა ქალაქებში დაიწყებს.

ბოლნისში სტადიონის განახლება გადაწყდა

ბოლნისის "სიონის" დირექტორის, ბუბა ტყავაძის თქმით, მოედნის დაგება მალე უნდა დაიწყოს: "გეგმაში არის ბოლნისის სტადიონის რეკონსტრუქცია და ახალი მოედნის დაგება - მერიას აქვს პროექტი, რომლის მიხედვითაც რეკონსტრუქციას აპირებენ.

ეს ფეხბურთის ფედერაციასთან შეთანხმებული ერთობლივი პროექტია, რომლის თანახმადაც, მოედანს სფფ დააგებს. რაც შეეხება ტრიბუნებს, ვიპ-ლოჟას, გასახდელებსა და ზოგადად, კეთილმოწყობის სამუშაოებს, ამას ადგილობრივი ხელისუფლება მიხედავს.

მაგალითად, იგეგმება, რომ ტერიტორია უკეთ აითვისონ, მეტი მანძილი რომ იყოს ტრიბუნებსა და მოედანს შორის, განათების სისტემა რომ გაუმჯობესდეს და ბევრი სხვა რამ".

ცხადია, სამუშაოების დასრულებამდე "სიონი" ბოლნისის სტადიონზე ვერ ითამაშებს: "სავარაუდოდ, პირველი-მეორე წრე ასე იქნება. მესამე წრიდან კი აუცილებლად "თამაზ სტეფანიაზე" ვითამაშებთ.

სხვა ქალაქში, საკუთარი გულშემატკივრების გარეშე გამოსვლა გუნდისთვის კარგი არაა. მაგრამ იმის გათვალისწინებით, რომ ბოლნისს მე-2 კატეგორიის სტადიონი დარჩება, დროებით ამის მოთმენა მოგვიწევს.

საქმე ისაა, რომ განახლებულ არენაზე შესაძლებელი იქნება ახალგაზრდული ნაკრების და საერთაშორისო საკლუბო მატჩების მასპინძლობა - და თუ "სიონი" ევროგათამაშებაში მოხვდება, საკვალიფიკაციო ეტაპსაც ბოლნისში ვუმასპინძლებთ. ოღონდ, მთავარია, რომ მოედნის დაგების შემდეგ მისი ხარისხიანი მოვლა შევძლოთ. ეს დაგებაზე უფრო რთული და საჭირო საქმეა".

ოთხი მოედანი საჩხერეში

"2 თებერვალს, ივანწმინდაში "გაგრასთან" ამხანაგურ შეხვედრას გავმართავთ, მერე შეკრებაზე მივდივართ და 4 თებერვლიდან სტადიონი სამშენებლო პოლიგონად გადაიქცევა - ფეხბურთის ფედერაცია მოედნის დაგებას დაიწყებს.

როგორც გვითხრეს, სამუშაოები საბოლოოდ ზაფხულში დასრულდება და საჩხერეში მე-3 წრეში დავბრუნდებით. მანამდე კი დახმარებას ფედერაცია გვპირდება და მის კუთვნილ ერთ-ერთ მოედანზე შეგვიშვებს - "მიხეილ მესხზე", სადაც ორი მოედანია, ან "დავით პეტრიაშვილზე", - ამბობს საჩხერის "ჩიხურას" დირექტორი ბერიკა შუკაკიძე.

მისი თქმით, რაიონში სხვა საფეხბურთო მოედნების დაგებაც იგეგმება: "საჩხერის მუნიციპალიტეტი და კლუბი ახალ სავარჯიშო მოედანს ერთად ვაკეთებთ. ეს იქნება მდინარე ჩიხურის პირას სრულიად ახალი მოედანი.

აქვე ვიტყვი, რომ ცენტრალური სტადიონის პროექტირებაც, ფაქტობრივად, დასრულებულია. კორექტირებულ ვარიანტზე ტენდერს მუნიციპალიტეტი გამართავს და როდესაც ყველა დეტალს დააზუსტებენ, მერე არენის მშენებლობაც დაიწყება - შესაძლოა, ეს ივნისის შემდეგ მოხდეს. ყველაფერი ჩანაფიქრის მიხედვით თუ წარიმართა, გაისად ამ დროისთვის საჩხერეში 4 ბუნებრივსაფრიანი მოედანი უნდა გვქონდეს".

რუსთავი მიხეილ მესხზე

ეროვნულ ლიგის დაწინაურებული "რუსთავი" "ფოლადის" სტადიონზე თამაშობდა. სტადიონის ამბავი დადებითად გადაწყდა და "ფოლარის" არენა მეტალურგიულმა კომბინატმა რუსთავის მერიას გადასცა.

მაგრამ ახალი სეზონიდან საკუთარ ქალაქში ვერ ითამაშებს, რადგან იქ ბუნებრივი საფარი არაა. გადაწყვეტილია, რომ პირველ ორ წრეს "რუსთავი" თბილისში, "მიხეილ მესხზე" ჩაატარებს.

სამტრედიაში ტენდერი გამოაცხადეს

ცნობილია, რომ სამტრედიაში ახალი სტადიონის მშენებლობა გადაწყდა. ხელშეკრულება მალე გაფორმდება და პროექტის ტენდერი ჩატარდება. ლაპარაკია სტადიონზე, რომელიც 10 ათას მაყურებელს დაიტევს. თუმცა, როდის იგეგმება მისი მშენებლობის დაწყება და დასრულება, სატენდერო ცნობებში ამაზე არაფერია მითითებული.

შესაძლოა, ეს ახალი სტადიონი იყოს. "ეროსი მანჯგალაძეზე" კი მეორე მხარეს ახალი ადმინისტრაციული შენობის აშენებას აპირებენ, სადაც გასახდელები, საშხაპეები და მსაჯებისა და დელეგატის ოთახები მოეწყობა, შესაძლოა - ტრიბუნებიც.

საფარს ქუთაისშიც დააგებენ

მოედნის დაგებას სამტრედიაშიც აპირებენ და ცხადია, გუნდი ამ პერიოდში საკუთარ ქალაქში არ ითამაშებს. სად ითამაშებს მანამდე "სამტრედია", ჯერ უცნობია. იყო ლაპარაკი ზესტაფონის დავით აბაშიძის სახელობის სტადიონზე, მაგრამ ეს ამბავი არ დადასტურდა.

ლოგიკურად, სამტრედიასთან ახლოს ქუთაისის სტადიონია, მაგრამ მოედნის შეცვლა ქუთაისშიც იგეგმება, ოღონდ როდის, ეს ჯერ გარკვეული არ არის.

კოლხეთი ბათუმში ითამაშებს

"კოლხეთის" დირექტორმა თემურ ბარქაიამ "ლელოსთან" თქვა, რომ ფოთის სტადიონის ამბავი ჯერ კიდევ გაურკვეველია.

"ფოთში ისევ მოედნის პრობლემაა. მოედნის გაკეთება მოესწრება თუ არა, ჯერ ამაზე ზუსტი პასუხი არ მაქვს. მაგრამ გვირჩევნია, გაურკვევლობაში არ ვიყოთ და ყველაფერი წინასწარ თავად დავგეგმოთ, შემდეგ მძიმე მდგომარეობაში რომ არ ჩავცვივდებთ. ამიტომ აჯობებს, სათამაშო და სავარჯიშო მოედანი წინასწარ დავიქირაოთ.

ფაქტია, რომ შეკრების ბათუმში მოწყობა მოედნის არქონამ განაპირობა. ამიტომ ბათუმის რაგბის მოედანზე ვივარჯიშებთ, ხოლო ჩემპიონატის თამაშებს ზუგდიდის ან ბათუმის სტადიონზე ჩაატარებთ. ეს მალე გადაწყდება. თუმცა, იმედია, ფოთში თამაშს მეორე წრეში მაინც შევძლებთ", - ამბობს ბარქაია.

ყოველდღიური სპორტული გაზეთი "ლელო"
3196
მკითხველის კომენტარები / 0 /
მსგავსი ამბები
რუბრიკის სხვა სიახლეები
;