როდის დაბრუნდება თორნიკე ოქრიაშვილი?

ყველამ კარგად ვიცით, რამხელა ძალას წარმოადგენს საქართველოს ნაკრებისთვის თორნიკე ოქრიაშვილი. ისიც ვიცით, რომ ტრავმამ ის კარგა ხნით ჩამოაშორა ფეხბურთს.

თქმა რად უნდა, ერთა ლიგის შეხვედრებში ჩვენს უმთავრეს გუნდს ძალიან დასჭირდება მისი ერთ-ერთი ლიდერი. როგორია ამჟამად ოქრიაშვილის ჯანმრთელობის მდგომარეობა? როდის დაუბრუნდება ფეხბურთს? ამ კითხვით ფეხბურთელის მამას, გოჩა ოქრიაშვილს მივმართეთ.

"დაახლოებით ორი კვირის წინ თორნიკეს მეორედ დასჭირდა ქირურგიული ჩარევა. საქმე ისაა, რომ ნაოპერაციებ ადგილზე კისტა განვითარდა. ახლა ყველაფერი კარგადაა. ჭრილობა ბოლომდე შეხორცდა. თორნიკე ახლა კრასნოდარშია და იქ გადის სარეაბილიტაციო კურსს. მას დიდი იმედი აქვს და ექიმების პროგნოზიც ასეთია, რომ სექტემბრისათვის უკვე სრულ მზადყოფნაში უნდა იყოს", - გვითხრა ბატონმა გოჩამ.

ეს უკვე კარგია. ზოგადად კი, ჩვენი ქვეყნის უპირველეს გუნდს განუწყვეტლივ თან სდევს ტრავმების ეპიდემია. სამწუხაროდ, ვლადიმირ ვაისიც იზიარებს წინამორბედთა ბედს და მისი ხელმძღვანელობით საქართველოს ნაკრებს ოპტიმალური შემადგენლობით ერთხელაც არ უთამაშია.

ოქრიაშვილის გარდა, ამ დროისთვის ეროვნულ გუნდს ტრავმების გამო ჯანო ანანიძე, გიორგი ქვილითაია და გიორგი მერებაშვილი გამოაკლდნენ. ლევან მჭედლიძე კი ახლახან გამოჯანმრთელდა ერთწლიანი პაუზის შემდეგ და, ცხადია, ვერ არის ოპტიმალურ ფორმაში.

ყოველდღიური სპორტული გაზეთი "ლელო"
987
მკითხველის კომენტარები / 0 /
მსგავსი ამბები
რუბრიკის სხვა სიახლეები