როდის შეიცვლება საფარი სამტრედიის სტადიონზე?

ახალი სეზონის დაწყებამდე, სამტრედიის ეროსი მანჯგალაძის სახელობის ცენტრალურ სტადიონზე საფარს შეცვლიან და მონაწილე ფეხბურთელთა და მსაჯების უსაფრთხოების პირობებსაც გააუმჯობესებენ. სიახლეების თაობაზე "სამტრედიას" აღმასრულებელმა დირექტორმა პაატა შალამბერიძემ გვაცნობა.

"ფეხბურთის ფედერაციისა და ადგილობრივი მუნიციპალიტეტების ერთობლივი ძალებით, 2018 წლის სეზონში ეროვნული ლიგის გუნდებს ხელოვნურ საფარზე თამაში აეკრძალებათ - შეხვედრები მხოლოდ ბუნებრივ მოედანზე უნდა გაიმართოს. ცხადია, გამონაკლისები ჩვენც არ ვიქნებით.

არსებულ ხელოვნურ საფარს სათადარიგო სტადიონზე გადავიტანთ, მთავარ არენაზე კი ბუნებრივ მოედანს დააგებენ. მოესწრება თუ არა საფარის დაგება, ეს დამოკიდებულია იმაზე, რამდენად სწრაფად ააძრობენ ძველ საფარს.

თუმცა ამ სამუშაოებით ისეთი დაინტერესებაა, წესით, დროულად უნდა გაკეთდეს", - ამბობს შალამბერიძე.

გუნდის ერთ-ერთი ხელმძღვანელის თქმით, სამუშაოები მხოლოდ ამით არ შემოიფარგლება: "გარდა ამისა, ვაპირებთ ახალი გასახდელების, საშხაპეების, მსაჯთა და დამკვირვებელთა ახალი ოთახების მოწყობას.

საგანგებოდ ტრიბუნების საპირისპირო მხარეს აშენდება შენობა, საიდანაც მოედანზე გასასვლელი მოეწყობა, რათა მატჩის მონაწილეები და მსაჯები გულშემატკივრებისგან იზოლირებულები იყვნენ და თავს უფრო დაცულად გრძნობდნენ".

ყოველდღიური სპორტული გაზეთი "ლელო"
1250
მკითხველის კომენტარები / 0 /
მსგავსი ამბები
რუბრიკის სხვა სიახლეები