როინ კვასხვაძე: ფეხბურთში ასეთი ბედნიერი დღე არასოდეს მქონია!

ეროვნული საფეხბურთო ლიგის 2017 წლის გამარჯვებული ქუთაისის "ტორპედო" გახდა და 15-წლიანი პაუზის შემდეგ ქვეყნის ჩემპიონის წოდება დაიბრუნა. "დინამო არენაზე" გამართული სეზონის გადამწყვეტი შეხვედრის გმირი კი ქუთაისელთა კაპიტანი როინ კვასხვაძეა.

"ტორპედოსა" და საქართველოს ნაკრების 29 წლის კიპერმა გუნდი მსაჯის მიერ დამატებულ წუთებზე ორჯერ გადაარჩინა: ჯერ აკაკი შულაიას უძლიერესი დარტყმისას, ბოლოს კი ოთარ კიტეიშვილის პენალტზე. ასე რომ, ქუთაისის "ტორპედოს" ჩემპიონობაში მან ლომის წვლილი შეიტანა.

- დინამო (თბ)-ტორპედო 0:1 - ქუთაისი ჩემპიონია! [VIDEO]

კვასხვაძე ინტერვიუების დიდი მოყვარული არაა, მაგრამ "ოქროს მატჩის" შემდეგ უზომოდ გახარებული იყო და "ლელოსთან" ემოციები არ დაუმალავს.

- ჩემპიონობას გილოცავ! ასეთი თამაში ეროვნულ ლიგაში ძნელი გასახსენებელია და ამ ოქროს მედალსაც სულ სხვა ელფერი აქვს, ვიდრე 5 ტურით ადრე განაღდებულს.
- არც ვიცი, რა ვთქვა, ისეთი ბედნიერი ვარ. როგორც უნდა განვითარდეს ჩემი კარიერა, ეს დღე, ეს თამაში და ეს მოვლენები არასოდეს დამავიწყდება. ასეთი ბედნიერი დღე ფეხბურთშია არასოდეს მქონია.

- რეალურად, დღევანდელი "ოქროს მატჩის" ბედი თქვენ გადაწყვიტეთ - მსგავს შეხვედრაში ბოლო წამზე მოგერიებულ პენალტზე ნებისმიერი მეკარე იოცნებებდა...
- ეს საოცნებო დღე იყო. შესაძლოა, ასეთი რამ ცხოვრებაში ერთხელ მოხდეს. თუმცა, იმედი მაინც მაქვს, რომ ჩემს კარიერაში მსგავს ბედნიერ წუთებს კიდევ განვიცდი. უბედნიერესი კაცი ვარ, რომ ბოლო წუთზე პენალტი ავიღე და ჩემი "ტორპედოს" წარმატებაში დიდი წვლილი შევიტანე.

- ქართული ფეხბურთის გულშემატკივარი ჩემპიონატის ასეთ დამაინტრიგებელ და მოულოდნელ ფინიშზე ვერც იოცნებებდა.
- პირადად ჩემი კარიერიდან მსგავსი თამაში არ მახსენდება. ალბათ, ასეთივე დაძაბული თამაში იყო 15 წლის წინ, როდესაც პატარა ბიჭი ვიყავი და ბოლო ტურში ქუთაისში "ტორპედომ" "დინამო" 1:0 დაამარცხა. ეს სიხარული მთელი ქუთაისის წარმატება და სიხარულია და ამიტომ ყველას ვულოცავ - ჩვენ ჩემპიონები ვართ!

ყოველდღიური სპორტული გაზეთი "ლელო"
895
მკითხველის კომენტარები / 0 /
მსგავსი ამბები
რუბრიკის სხვა სიახლეები