რომას პრეზიდენტი: თუ ჩემპიონთა ლიგაში ვიდეორეფერის არ შემოიღებენ, ეს უბრალოდ სასაცილო იქნება

ჩემპიონთა ლიგის ზედრამატულ ნახევარფინალში "რომამ" საშინაო ასპარეზზე 4:2 მოუგო "ლივერპულს", მაგრამ ევროპის ყველაზე პრესტიჟული ტურნირის ფინალში მაინც ვერ გავიდა, რადგან პირველი შეხვედრა "ენფილდზე" 2:5 ჰქონდა წაგებული.

მატჩში იყო საკამათო მომენტები, განსაკუთრებით - არდანიშნული 11-მეტრიანი ინგლისური კლუბის კარში, როცა ბურთი ხელზე მოხვდა "ლივერპულის" მცველ ტრენტ ალექსანდერ-არნოლდს.

"ჩვენ შეუძლებელი გავაკეთეთ. "რომასთვის" თითქმის იდეალური მატჩი იყო, თუ გამოვრიცხავთ დაცვაში დაშვებულ შეცდომებს. ვაგებდით, მაგრამ მაინც შევძელით გამარჯვება.

ჩვენ დავრწმუნდით, რომ ასეთ დონეზეც შეგვიძლია ბევრს მივაღწიოთ. არ მინდა, "ლივერპულის" მიღწევა დავაკნინო, ამ გუნდის თამაში უბრალოდ დიდებული იყო, ჩვენ კი უნდა ვიაროთ წინ და ვიფიქროთ პროგრესზე. "ლივერპულს", შესაძლოა, რაღაც პატარა დეტალებში ჩამოვრჩით", - თქვა "რომას" მწვრთნელმა ეუსებიო დი ფრანჩესკომ.

"ეს იყო ნამდვილი სიგიჟე!. ჩვენი ფეხბურთელების აბსოლუტურმა უმრავლესობამ დღეს პირველად ითამაშა ჩემპიონთა ლიგის ნახევარფინალში და ეს გასათვალისწინებელია. ამ დონეზე, გამოცდილების ფაქტორი უმნიშვნელოვანესია... ძნელია, ასეთ შემთხვევებში ბოლომდე გააკონტროლო ემოციები.

დღეს ჩვენ წავაგეთ, მაგრამ საერთო ჯამში ფინალი დავიმსახურეთ. ჩვენი მიზანია, კიევში საუკეთესო თამაში ვაჩვენოთ. 7:6 საერთო ანგარიში - ეს უბრალოდ დაუჯერებელია", - ეს უკვე "ლივერპულის მწვრთნელ იურგენ კლოპის სიტყვებია.

"არ ვიცი, "რეალი" და "ლივერპული" შეხვდებოდნენ თუ არა ერთმანეთს ჩემპიონთა ლიგის ფინალში, ვიდეორეფერი რომ არსებობდეს", - თქვა "რომას" უკანახაზელმა ალესანდრო ფლორენციმ.

"ვამაყობ, რომ ამ გუნდის ნაწილი ვარ. ბოდიში უნდა მოვიხადო ჩემი შეცდომისთვის, რომელმაც პირდაპირი გავლენა იქონია შედეგზე", - თქვა "ჯალოროსის" ნახევარმცველმა რაჯა ნაინგოლანმა, რომლის უადგილო და უზუსტო პასის შემდეგ "ლივერპული" მატჩში მეორედ დაწინაურდა...

"თუ ჩემპიონთა ლიგაში ვიდეორეფერის არ შემოიღებენ, ეს უბრალოდ სასაცილო იქნება", - თქვა "რომას" პრეზიდენტმა ჯეიმს პალოტამ.

"ჩვენ ასეთი ზნე გვჭირს: წარმატებას ვერასოდეს ვაღწევთ ისე, თუ საკუთარი თავი საფრთხეში არ ჩავიგდეთ. ბედნიერები ვართ, რომ საბოლოოდ ყველაფერი კარგად დასრულდა", - ეს შეფასება "ლივერპულის" ნახევარმცველ ჯორდან ჰენდერსონს ეკუთვნის.

"ჩვენ რაღაც ახალი შევქმენით. ვფიქრობ, "რომას" ისტორიაში ეს თამაში აუცილებლად ჩაიწერება", - თქვა რომაელთა კაპიტანმა დანიელე დე როსიმ.
"რომას" ასეთმა თამაშმა იტალიურ ფეხბურთს სალაპარაკო დაუბრუნა. ასე უნდა გავაგრძელოთ", - აღნიშნა "რომას" სპორტულმა დირექტორმა მონჩიმ.

ყოველდღიური სპორტული გაზეთი "ლელო"
1267
მკითხველის კომენტარები / 0 /
მსგავსი ამბები
რუბრიკის სხვა სიახლეები
;