რომა ჭინჭარაული: კატანძარო, გამოცდილება ნაკრებისთვის

საქართველოს ნაკრების მთავარი მწვრთნელი ილიას ზუროსი ევრობასკეტი 2021-ის შესარჩევზე დიდ ყურადღებას უთმობს ახალგაზრდებს. მან სერბეთთან და შვეიცარიასთან მატჩების გაფართოებულ შემადგენლობაში არაერთი 17-18 წლის ყმაწვილი შეიყვანა. როგორც თავად აღნიშნა, ეტაპობრივად გამოსცდის ნაკრების უახლოეს რეზერვს, რომელშიც ბევრია ლეგიონერი.

ნაკრების მწვრთნელი აუცილებლად მიაქცევს ყურადღებას იტალიაში მოთამაშე რომა ჭინჭარაულს, რომელიც 210 სმ სიმაღლის მოძრავი, ღონიერი წინახაზელია. იგი 2002 წელსაა დაბადებული, იტალიურ "კატანძაროში" თბილისური "ორბიდან" მოხვდა.

რომას იტალიაში შევეხმიანეთ, ვესაუბრეთ გუნდისა და საკუთარი თამაშის შესახებ.

- ვთამაშობ "კატანძარო ბასკეტ პლანეტში", რომელსაც წარმომადგენელი ჰყავს იტალიის სერია ჩ-ს როგორც ოქროს, ასევე ვერცხლის ლიგაში. ძირითადად 18-წლამდელთა გუნდში ვვარჯიშობ და ვთამაშობ, ხშირად ვემატერბი სერია C-ს გუნდებს. სათამაშო პრაქტიკა საკმარისად მაქვს, ვარჯიშების პარალელურად კი ინდივიდუალურადაც ვემზადები.

"კატანძაროს" 18-წლამდელთა გუნდი გამოდის რეგიონის პირველობაზე, რომლის წარმატებით ჩატარების შემთხვევაში ნაციონალურ ჩემპიონატზე გავა. იქ შეიკრიბება იტალიის საუკეთესო ჭაბუკთა გუნდები. ეს კი მშვენიერი შესაძლებლობა იქნება შესაძლებლობების სრულად გამოსავლენად და სკაუტების დასაინტერესებლად. სადღეისოდ ქართველი ახალგაზრდის სტატისტიკა შთამბეჭდავია: 18.4 ქულა, 11 მოხსნა.

როგორც რომა ჭინჭარაულმა გვითხრა, მის "კატანძაროს" მარტის დასაწყისში 18-წლამდელთა ტურნირზე უნდა მიეღო მონაწილეობა, სადაც იტალიის გრანდების წინააღმდეგ მოუწევდა ასპარეზობა, თუმცა კორონავირუსის საფრთხის გამო ეს შეჯიბრება გადაიდო. როდის გაიმართება, 14 მარტს გაირკვევა.

ჭინჭარაული "ორბში" წინახაზელად თამაშობდა, თუმცა არც ბურთის ტარება უჭირდა, თავისუფლად გადაჰქონდა მეტოქის ნახევარზე და ხშირად ჩატენვით აგვირგვინებდა. იგი საქართველოს 16-წლამდელთა ნაკრებშიც თამაშობდა. საინტერესოა, იტალიაში რა პოზიციაზეა და რა ფუნქცია აქვს.

- ძირითადად ცენტრის ფუნქციებს ვასრულებ. თუმცა საჭიროებისდა მიხედვით მსუბუქ და მძიმე ფორვარდადაც ვთამასობ. ყველაფერი დამოკიდებულია მეტოქე გუნდზე და მწვრთნელის გადაწყვეტილებაზე. საინტერესო გუნდი გვყავს, იტალიელების გარდა ჩვენთან თამაშობენ სერბი, ბოსნიელი, მონტენეგროელი...

იანვარში რომა კალაბრიაში აღიარეს - რეგიონის სიმბოლურ ხუთეულში შეიყვანეს. ცხადია, მისთვის ამ ეტაპზე მთავარია "კატანძაროსთან" ერთად სეზონის წარმატებით ჩამთავრება, ნაციონალურ ჩემპიონატზე მოხვედრა, თუმცა წინაც იხედება:

- იტალიაში გადასვლაც და "კატანძაროში" თამაშიც ერთ მიზანს ემსახურება - მინდა კარგად მოვემზადო ნაკრებისთვის. ჯერ 18-წლამდელთა ნაკრებზე ვფიქრობ, რომელსაც ამ ზაფხულს B დივიზიონში მნიშვნელოვანი მატჩები ელის. იტალიაში მიღებული გამოცდილება ნაკრებში აუცილებლად გამომადგება, - დასძენს რომა ჭინჭარაული.

2237
მკითხველის კომენტარები / 0 /
მსგავსი ამბები
რუბრიკის სხვა სიახლეები
;