რონალდ კუმანმა მარცხით დაიწყო

ჰოლანდია-ინგლისი 0:1
გოლი: 0:1 ლინგარდი (59)

ჰოლანდია (3-4-3): ზუტი - დე ლიგტი, დე ვრეი (89. ვეგჰორსტი), ვან დაიკი - ჰატებური, ვეინალდუმი, სტროოტმანი (90. ვან დე ბეეკი), ვან აანჰოლტი - პრომესი (66. პროპერი), დეპაი, დოსტი (66. ბაბელი).

ინგლისი (3-4-3): პიკფორდი - უოლკერი, სტოუნზი, გომესი (10. მეგუაირი/89. დაიერი) - ტრიპიერი, ოქსლეიდ-ჩემბერლენი, ჰენდერსონი, როუზი (71. იანგი) - სტერლინგი (68. უელბეკი), ლინგარდი (68. ალი), რაშფორდი (68. ვარდი).

ამსტერდამის "იოჰან კრუიფ არენაზე" გამართულ სპარინგს ორივე გუნდისთვის კონკრეტული დანიშნულება ჰქონდა. ინგლისის ნაკრები რუსული მუნდიალისთვის ემზადება, ჰოლანდიის ეროვნულ გუნდში კი მთავარი მწვრთნელის პოსტზე დებიუტი ჰქონდა რონალდ კუმანს, რომელიც ახალი გუნდის შენებას შეუდგა.

"ტიტები" ვერ მოხვდნენ მსოფლიოს ჩემპიონატზე და ერთა ლიგის დაწყებამდე ახალ მწვრთნელს უფრო მეტი დრო აქვს ექსპერიმენტებისთვის.

თუმცა ექსპერიმენტებზე არც გარეთ საუთგეიტს უთქვამს უარი. მან სამკაციან დაცვაში დააყენა კაილი უოლკერი, ვინც ტრადიციულად მარჯვენა ფლანგის მოთამაშეა და სწორედ ამ პოზიციაზე ფასობდა. თუმცა უოლკერმა ახალ როლშიც კარგად ითამაშა და BBჩ-ის ექსპერტთაგან მატჩის საუკეთესო მოთამაშის ტიტულიც ირგუნა.

ჰარი კეინის ტრავმის გამო, იძულებითი ექსპერტიმენტი იყო ცენტრფორვარდად ჯესი ლინგარდის გამწესება. საუთგეიტს აქაც გაუმართლა - სწორედ "მანჩესტერ იუნაიტედის" შემტევი იყო, ვინც გამარჯვების გოლი გაიტანა: შეტევა ბოლო ფაზაში თავადვე განავითარა და დენი როუზის ფლანგური პასის შემდეგ მცველის მიერ უხერხულად მოგერიებულ ბურთს დაახლოებით საჯარიმოს ხაზიდან დაბალ კუთხეში მიუჩინა ადგილი.

ჰოლანდია წვალობდა, ინგლისის ნაკრები კი გაცილებით სოლიდური იყო - უტევდა, როცა საჭირო იყო, თავსაც კარგად იცავდა, ბურთსაც აკონტროლებდა, თუმცა ჯერ ადრეა იმის თქმა, რეალურად რისი მიღწევა შეუძლია ზაფხულის მსოფლიო საფეხბურთო ფორუმზე.

ფაქტები

* ევრო 96-ის შემდეგ ინგლისმა პირველად დაამარცხა ჰოლანდია, დაასრულა რა 7-მატჩიანი მოუგებელი სერია.

* ინგლისის ნაკრები დაუმარცხებელია ბოლო 7 მატჩში (5 მოგება, 2 ფრე). ეს "სამი ლომის" ყველაზე გრძელი სერიაა 2014 წლის ივნისსა და 2015 წლის

ოქტომბერს შორის პერიოდის შემდეგ, როცა როი ჰოჯსონის თავკაცობით ზედიზედ 15 მატჩში არ დამარცხებულა.

* ინგლისის ნაკრები არ დამარცხებულა ჰოლანდიასთან ამსტერდამში ჩატარებულ 7 მატჩში (3 მოგება, 4 ფრე). ჰოლანდიასთან ინგლისელთა ერთადერთი მარცხი მოდის როტერდამზე (1993 წლის ოქტომბერი).

* 2014 წლის ოქტომბრის შემდეგ ინგლისის ნაკრებმა პირველად შეძლო ზედიზედ 5 მატჩში კარის "მშრალად" შენახვა. წინა სერიაც როი ჰოჯსონის მწვრთნელობის პერიოდს უკავშირდება.

ყოველდღიური სპორტული გაზეთი "ლელო"
1051
მკითხველის კომენტარები / 0 /
მსგავსი ამბები
რუბრიკის სხვა სიახლეები
;