როცა კარი მართლა ღიაა - ვრცელი ანალიზი

საქართველოს ნაკრების შემადგენლობა, რომელიც ვლადიმირ ვაისმა უახლოესი ორი ამხანაგური მატჩისთვის დაასახელა, იმდენად საინტერესოა, აუცილებლად იმსახურებს ცალკე წერილს, ცალკე ანალიზს და ამის გაკეთება ვარჩიეთ ახლა, როცა ემოციები გაცივდა და საღ აზრს მეტი გასაქანი მიეცა...

ეძიებდე და ჰპოვებდე...

აქამდე, ვლადიმირ ვაისი ცოტა ზედმეტად კონსერვატიული მწვრთნელი მეგონა საკადრო ამბებში და უცებ... ერთა ლიგის დაწყებამდე სულ ცოტა ხნით ადრე გამოქვეყნებულ სანაკრებო სიაში ერთბაშად 4 დებიუტანტი აღმოჩნდა.

ყველაზე სასიხარულო საქართველოს პირველ გუნდში დონეცკის "ოლიმპიკის" მეკარე ზაურ მახარაძის გამოძახებაა. მახარაძის თამაში არაერთხელ მინახავს და ასე მგონია - ჩვენი ქვეყნის უმთავრეს გუნდს წლების განმავლობაში მოეხსნა მეკარის პრობლემა.

გასაგებია, რომ ჩვენ გვყავს გიორგი ლორია, გვყავს გიორგი მაკარიძე, როინ კვასხვაძე, მაგრამ ახალგაზრდა ქართველი მეკარეების მიმართ ჩემი დიდი პატივისცემის მიუხედავად, ვერცერთ მათგანზე ვერ ვიტყვი ხელაღებით, რომ გავა რამდენიმე წელი და ისინი შესაშური სტაბილურობით დაიცავენ ეროვნული გუნდის ღირსებას.

მახარაძის ჩაყენება საქართველოს სამსახურში გამართლებულია როგორც ამჟამინდელ ვითარებაში, ისე სამომავლო პერსპექტივის პრიზმაშიც. ყველაფერს რომ თავი დავანებოთ, უკრაინის ყველა ასაკობრივ ნაკრებში სუსტ მეკარეს არავინ მიიწვევდა.

მახარაძესთან ერთად, მადლობა საქართველოს ფეხბურთის ფედერაციასაც ეკუთვნის. ისე ჩანს, რომ ამ საკითხზე ქართული ფეხბურთის სახლის ბინადრებმაც ძალიან ბევრი იმუშავეს. სხვანაირად, ალბათ, მხოლოდ ფეხბურთელის სურვილი საკმარისი არ იქნებოდა.

მეორე დებიუტანტი ბექა ვაჩიბერაძეა. ის სულ ცოტა ხნის წინ იყო უკრაინის ახალგაზრდული ნაკრების ლიდერი და ამაში თავად დავრწმუნდი, როცა ზესტაფონში თვალი ვადევნე ჩვენი ქვეყნისა და უკრაინის 21-წლამდელთა მატჩს. მაშინ ვაჩიბერაძე აშკარად საუკეთესო იყო მინდორზე.

მე მინახავს მისი ოფიციალური შეხვედრები უკრაინის ახალგაზრდულში. ბექა იმდენად კარგი იყო, რომ მეგონა, მალე მის წინ ამ ქვეყნის მთავარი გუნდის კარიც გაიღებოდა.

მჯერა, ასეც რომ მომხდარიყო, ის მაინც საქართველოს ნაკრების ღირსების დაცვას გადაწყვეტდა, მაგრამ, რაც არ მომხდარა, იმაზე ნუ ვიმსჯელებთ. დღეს ბექა ვაჩიბერაძე საქართველოს მოქალაქე და ჩვენი ქვეყნის ნაკრების სრულფასოვანი წევრია.

ერთადერთი, რაც ოდნავ ხინჯად რჩება, ის არის, რომ ბექა ამ დროისთვის ლატვიის ჩემპიონატში თამაშობს. თითქმის ბოლომდე დარწმუნებული ვარ, რომ ის ამ პირველობას ტრამპლინად გამოიყენებს და მალე უკეთეს გუნდში ვიხილავთ, მით უმეტეს, მან უკვე იცის, რა არის ნაღდი ევროპული ფეხბურთი. ვაჩიბერაძე იყო "ბეტისში", სადაც ფეხი ვერ მოიკიდა, მაგრამ ეს სულაც არ ნიშნავს იმას, რომ სუსტი ფეხბურთელია.

უკრაინული საფეხბურთო სკოლა ძლიერი რომაა, ამაზე ორი აზრი არ არსებობს. აგერ ვაკო გვილია და მისი მაგალითი. ამ დროისთვის შვეიცარიაში მოთამაშე გვილია, ვინც უკრაინული კლუბებისა და იქაური ახალგაზრდული ნაკრების სკოლა გამოიარა, შეუცვლელი ფეხბურთელია ვაისის გუნდისთვის.

სანამ კიდევ ორ დებიუტანტზე ვიტყოდეთ, ბარემ მოვრჩეთ უკრაინულ "დესანტზე". საქართველოს ფეხბურთის ფედერაციამ მის ხელთ არსებული ყველა საშუალება უნდა გამოიყენოს, რათა როგორმე ქართულ ფერხულში ჩააბას კიევის "დინამოს" ახალგაზრდა ტალანტი გიორგი წიტაიშვილი.

ამ სტრიქონების ავტორი არცთუ დიდი ხნის წინ თავად ელაპარაკა წიტაიშვილს. ასე მგონია: ის ახლა გზაგასაყარზე დგას და საბოლოო არჩევანი არ გაუკეთებია. მას ძალიან ახალგაზრდას ჰქონდა დებიუტი კიევის "დინამოს" მთავარ გუნდში. ჩემი მოკრძალებული აზრით და მის თამაშებზე დაკვირვებით შემიძლია ვთქვა - ის იმ დონის ტალანტია, წლების განმავლობაში შეუძლია, საქართველოს ეროვნული ნაკრების ერთ-ერთი ლიდერი იყოს!

რა თქმა უნდა, მთავარია ფეხბურთელის სურვილი და თუ მას არ უნდა, ძალით ვერავინ აიძულებს ნაკრებში თამაშს. ეგაა, ჩვენ ყველაფერი უნდა გავაკეთოთ იმისთვის, რომ ის საქართველოს სამსახურში ჩავაყენოთ.

ვაისმა "ტრენჩინის" ერთ-ერთ ლიდერ გიორგი ბერიძესაც უხმო. გაგახსენებთ - "ტრენჩინი" წინა ევროსეზონის დასაწყისში ჩამოვიდა საქართველოში და უშანსოდ მოუგო ქუთაისის "ტორპედოს". იმ შეხვედრებში ბერიძემ ძალიან კარგად ითამაშა.

ზოგადად, "ბორჯომამ" თავისი განსაკუთრებული ტექნიკისა და, მეტადრე, ძალიან მაღალი სისწრაფის გამო, იმთავითვე მიიქცია ქართველი გულშემატკივრების ყურადღება. ის ისეთი ფეხბურთელია, თანამედროვეობას რომ უხდება - სწრაფ და ტექნიკურ "ვინგერს" უდავოდ სჭირდებოდა შანსი ეროვნულ ნაკრებში და მან ეს შანსი მიიღო.

ცოტა ხნის წინ, საქართველოს ეროვნული ლიგის ერთ-ერთ მთავარ აღმოჩენაზე, ლევან ხარაბაძეზე წერილი რომ დავწერე და ეროვნული ნაკრები ვახსენე, გულში გამკენწლა - ცოტა ნაადრევი ხომ არ არის-მეთქი.

ეჭვის ჭია რომ შემიჩნდა, ვეღარაფერს შევცვლიდი, რადგან ის სტრიქონები "ლელოს" მკითხველებამდე უკვე მისული იყო. რა თქმა უნდა, ვაისმა ჩემზე ბევრად უკეთ იცის ფეხბურთი და მან ჩათვალა, რომ დიახაც, არ არის ადრე. ზოგადად, ხარაბაძე იმ მოთამაშეთა რიცხვს მიეკუთვნება, რომლებზეც კარგა ხნის განმავლობაში უნდა იდგეს ქართული ფეხბურთი.

ჟურნალისტს არ უხდება სიმპათიების საჯაროდ გამოხატვა, მაგრამ გულზე ხელი უნდა დავიდო და დავწერო: დიდი ხანია, ახალგაზრდა ქართველი ფეხბურთელი ასე არ მომწონებია. ღმერთია მოწმე, ლევანს პირადად საერთოდ არ ვიცნობ, ერთადერთხელ მისაუბრია მასთან და ისიც - ტელეფონით...

თითქოს, ჩვენს გულში იჯდაო...

ვაისი დიდი ხალისით არ იძლევა ინტერვიუებს და ქართულზე მეტად უცხოურ მედიას წყალობს ხოლმე. არ ვიცით, ასე თავად წყვეტს, თუ ეს საკითხი "სადღაც" გვარდება, მაგრამ ამას კიდევ ეშველება, მეორე მხრივ კი, რატომღაც, არ მტოვებს შეგრძნება, რომ ვაისი ეცნობა ქართულ საფეხბურთო მედიას. ვინ ოხერი იტყვის, სლოვაკი ჩვენს დაკრულზე ცეკვავსო, მაგრამ რაღაცას ითვალისწინებს...

ეს უკვე კარგია. უშეცდომო ვინ არის, მაგრამ ვაისის არ იყოს, ჩვენც კარგი გვინდა საქართველოს ნაკრებისთვის, რადგან როცა ის თამაშობს, სულ გვავიწყდება ყველაფერი, რისთვისაც ქართული ფეხბურთის ზედა ეშელონების კრიტიკა გვიწევს. თითქოს, ჩვენს გულში იჯდაო, მან ყველა იმ ფეხბურთელს მისცა თავის გამოჩენის შანსი, რომელთა შესახებაც ოდესმე დაგვიწერია...

ხუთი? ლოგიკურია...

როინ კვასხვაძე, ლევან გეგეჭკორი, ლევან ხარაბაძე, ოთარ კიტეიშვილი და ბუდუ ზივზივაძე - საქართველოს ეროვნული ჩემპიონატიდან ნაკრებში ახლა ეს ხუთი ფეხბურთელია გამოძახებული.

სხვადასხვა დროს, შესაძლოა, ჩვენს ჩემპიონატში მოთამაშე სხვა რომელიმე მოთამაშეც იმსახურებდა ყურადღებას ნაკრების დონეზე, მაგრამ ამ ეტაპზე ვერაფერს იტყვი - ლოგიკური არჩევანია.

ჩემი პირადი აზრით, ვინც საუკეთესოა ეროვნულ ლიგაში, ის ნაკრებშიცაა, თუმცა ამ თემაზე აზრთა სხვადასხვაობა შეიძლება არსებობდეს და, ალბათ, ის არსებობს კიდეც. ესეც ლოგიკურია...

ყოველდღიური სპორტული გაზეთი "ლელო"
1126
მკითხველის კომენტარები / 0 /
მსგავსი ამბები
რუბრიკის სხვა სიახლეები
;