როცა რაგბი ქვეყნის სახეა...

* "ბორჯღალოსნებმა" მესამე მატჩიც მოიგეს, მაგრამ ქულები
პირველად გაუშვეს.
* თბილისში ესპანეთის ნაკრებში 11-მა ნატურალიზებულმა
მოთამაშემ ითამაშა.
* გიორგი მელიქიძემ ნაკრებში პირველი ლელო გაიტანა.
* 10 მარტს საქართველოს ნაკრები რუსეთს კრასნოდარში ესტუმრება.

შვიდი ფრანგი, სამი ინგლისელი, ორი ახალზელანდიელი, ერთი ფიჯელი - ესენი ესპანეთის ნაკრების მორაგბეები არიან. სულ კი, "ლომებს" 25 ნატურალიზებული მორაგბე ჰყავთ და მათ შორის ირლანდიელები და შოტლანდიელებიც არიან.

ძნელი სათქმელია, რამდენად წაადგება ეს ყველაფერი ესპანური რაგბის განვითარებას და რამდენად სწორია, ყოველივეს მიუხედავად, მაინც რომ ამბობენ - ესპანური რაგბი პროგრესს განიცდისო.

ნატურალიზებული ესპანეთი

ჩვენ "სხვის ომში" ბრძენნი ვერ ვიქნებით. ესპანელებმა ამ გზით მიზანს მიაღწიეს: სავარაუდოდ, დარჩენილ ორ მატჩში გერმანიასთან და ბელგიასთან პრობლემა არ შეექმნებათ და მსოფლიოს თასის საგზურს მოიპოვებენ.

მთავარია, რა იქნება მერე. მსოფლიოს თასზე პორტუგალიამაც ითამაშა 2007 წელს, მაგრამ სად არის ახლა ამ ქვეყნის ნაკრები? 2011 წელს რუსებსაც ჰქონდათ "პროგრესი" - ახალ ზელანდიაში იასპარეზეს და მას შემდეგ სტაგნაცია აქვთ.

ერთი სიტყვით, ესპანელებმა თავისი იდარდონ (სხვებმაც), მსოფლიოს თასზე გასვლა პროგრესის მაჩვენებელი არ არის, თუ მას პერმანენტული ხასიათი არ აქვს. თუ ის გამაგრებული არ არის მზარდი, მომავალი თაობის არსებობით, მეტი ინფრასტრუქტურული თუ სხვა პროექტებით, რაც რაგბის განვითარებისთვის უცილობლად საჭიროა.

რა აკლია ქართულ რაგბის

უნდა ითქვას, რომ ამ მიმართულებით ჩვენს ქვეყანაში არაერთი სასარგებლო პროექტი განხორციელდა. თუმცა, დადგა მომენტი, როცა გუნდს მეტის მიღწევის ამბიცია გაუჩნდა, ქართულ რაგბის სხვა, ახალ საფეხურზე ასვლა უნდა და ამისი ნამდვილად საფუძვლიანი ამბიცია აქვს.

საამისოდ კი, კიდევ მეტი ფინანსური ინიექციაა საჭირო, კიდევ მეტი მოედანი და სპეციალისტებია გასაზრდელი, როგორც ბავშვთა რაგბის მიმართულებით ასევე მენეჯმენტის კუთხით. სწორედ ამიტომ თქვა მილტონ ჰეიგმა მატჩისწინა პრესკონფერენციაზე:

"იმისათვის, რომ ჩვენი გეგმები მაქსიმალური სიზუსტით განვახორციელოთ, დღესდღეობით, მხოლოდ რაგბის კავშირის ხელთ არსებული რესურსი საკმარისი არ არის და საჭიროა სრულიად ქვეყნის მხარდაჭერა.

პირველ რიგში კი, სახელმწიფოსა და კერძო სექტორის მხრიდან, რაც გულისხმობს იმ ფინანსების მობილიზებას, რაც ამ პროგრამის შესასრულებლად არის საჭირო.

მიმაჩნია, რომ ქართული რაგბი ქვეყნის სახეა, რომლის მხარდაჭერაც თანაბრად ყველას პასუხისმგებლობაა. საჭირო ოდენობით ფინანსების მობილიზება მოგვცემს შანსს, მყარად დავმკვიდრდეთ ელიტის სიახლოვეს და მომავალში კიდევ უფრო მეტ წარმატებას მივაღწიოთ.

პროგრესის გზაზე გაჩერება კი კრახის დასაწყისი იქნება. მერწმუნეთ, საქართველო თავისი პოტენციალის რეალიზაციის შემთხვევაში ბევრად მაღალ ადგილს დაიმსახურებს სარაგბო ელიტაში".

* * *

ახლა, ცოტა რამ თამაშზეც ვთქვათ. მატჩის დაწყებამდე ვაკის სტადიონზე შეკრებილმა მაყურებელმა წუთიერი დუმილით პატივი მიაგო ცხინვალის რეგიონში ჯერ გატაცებული და მერე წამებით მოკლული არჩილ ტატუნაშვილის ხსოვნას.

3 მარტი დედის დღე იყო, და თამაშის დაწყებამდე ადგილობრივმა ინფორმატორმა გვამცნო, რომ დღევანდელ გამარჯვებას "ბორჯღალოსნები" დედის დღეს მიუძღვნიან.

შეხვედრა, როგორც მოსალოდნელი იყო, ჩვენი გუნდის იერიშებით დაიწყო. მარცხენა ფრთაზე დავით კაჭარავამ და ანზორ სიჭინავამ ლამის მეტოქის ლელომდე ირბინეს, იერიშში მესამეხაზელი ვიქტორ კოლელიშვილიც ჩაერთო, თამაში რაკში გადავიდა.

ჩვენმა მორკინალებმა მოკლე დარტყმებით სცადეს მეტოქის ლელოში შეღწევა, მაგრამ ესპანელებმა თავდადებით იბრძოლეს. ბოლოს დაჯარიმდნენ კიდეც. "ბორჯღალოსნებს" შეეძლოთ ან შერკინება მოეთხოვათ, ან სულაც ბურთი აუტში გადაეტანათ, მაგრამ კარში დარტყმა ამჯობინეს და ფულბეკმა სოსო მათიაშვილმა ანგარიში გახსნა - 3:0.

ანალოგიური ვითარება კიდევ ორჯერ შეიქნა და ორივეჯერ კაპიტნის, გიორგი ნემსაძის გადაწყვეტილებით, საჯარიმოს კარში დარტყმა ვამჯობინეთ. მათიაშვილმა ორივე გაიტანა, რაზეც ესპანელებმა ერთი საჯარიმოთი უპასუხეს, ერთიც ვერ გამოიყენეს და ტაიმი 9:3 დასრულდა საქართველოს ნაკრების სასარგებლოდ.

* * *

შესვენების შემდეგ "ბორჯღალოსნებმა" კიდევ უფრო მეტი მონდომებით შეუტიეს, მეტოქეც კბილებით ცდილობდა საკუთარი ჩათვლის მოედნის დაცვას. თუმცა, 51-ე წუთზე ჩვენი გუნდის შერკინებას ვერაფერი დაუპირისპირეს, თამაშის წესი დაარღვიეს და არბიტრმა საჯარიმო ლელო დააფიქსირა - 16:3.

ამის შემდეგ, ჩვენს გუნდს არაერთი შანსი ჰქონდა, ლელოში შეეღწია, მაგრამ ხან ტექნიკური წუნი, ხანაც მეტოქის დაუძლეველი წინააღმდეგობა ამის საშუალებას არ იძლეოდა. მატჩის ბოლოს ესპანელები საქართველოს ნაკრების ლელოს პირველად მიუახლოვდნენ და საკმაოდ სახიფათო შტურმიც მოაწყვეს.

სანამ ძალები თანაბარი იყო, "ბორჯღალოსნები" მეტოქის მოგერიებას ახერხებდნენ, მაგრამ მას შემდეგ, რაც არბიტრმა დავით კაჭარავა სინბინში გაუშვა, შეცვლაზე შესულმა მესამეხაზელმა, წარმოშობით ახალზელანდიელმა აფაესე ტაულიმ ლელო გაიტანა. გარდასახვა პელიუშონმა ზუსტად დაარტყა - 10:16.

მატჩის ბოლო წუთზე საქართველოს ნაკრებმა ისევ გამოაჩინა თავისი შესაძლებლობები. მეტოქის ლელოდან ათ მეტრში საკუთარი აუტი სუფთად მოვიგეთ, რაც აქამდე არ გამოგვდიოდა, შეტევაში შეცვლაზე შესული შუამარბი გიორგი კოშაძე ჩაერთო, რომელმაც ხაზი გაჭრა. ის ლელოდან ორ მეტრში შეაჩერეს. წარმოქმნილი რაკიდან ბურთი ახალგაზრდა ბურჯმა გიორგი მელიქიძემ აიტაცა და ლელოს ხაზს იქით გადადო. მათიაშვილმა გარდასახა - 23:10.

მატჩის შემდეგ

მილტონ ჰეიგი, საქართველოს ნაკრების მთავარი მწვრთნელი:
"ყველანი დავრწმუნდით, რომ ამჟამად ესპანეთის ნაკრები ძალიან კარგი გუნდია. ჩვენმა მორაგბეებმა მოთმინებით ითამაშეს. შევქმენით ლელოს გატანის შესაძლებლობებიც, რომელთა ნაწილი, სამწუხაროდ, ვერ გამოვიყენეთ.

ვმუშაობთ და გვსურს, რომ უფრო მრავალფეროვნად ვითამაშოთ, მაგრამ ამას დრო სჭირდება. ყველაფერი არ გამოგვდიოდა, თუმცა ეს მეტოქის კარგ თამაშზეც მეტყველებს და სწორედ მათ არ მოგვცეს ჩანაფიქრის განხორციელების შესაძლებლობა. ვიმეორებ, ესპანეთი კარგი გუნდია და, არ არის გამორიცხული, მსოფლიოს თასზეც გავიდნენ.

ახლა ჩემი და მთელი გუნდის ფიქრები მხოლოდ 2019 წლის მსოფლიოს თასს უკავშირდება. არ მჩვევია შორსმიმავალ გეგმებზე ფიქრი. როდესაც დასრულდება იაპონიის მსოფლიოს თასი, რომელიც იმედია ჩვენთვის ყველაზე წარმატებული იქნება, ამის შემდეგ დავსხდებით რაგბის კავშირის პრეზიდენტთან და გაირკვევა, დავრჩები თუ არა საქართველოს ნაკრებში".

გიორგი ნემსაძე, საქართველოს ნაკრების კაპიტანი:
"ჩემი გადაწყვეტილება იყო, რომ ჯარიმები კარში დაგვერტყა, ერთ გარდასახულ ლელოზე მეტი დაგვეგროვებინა და ამის მერე გვეთამაშა ლელოს გატანაზე.

მეტოქემ კარგი დაცვა ითამაშა, სწრაფად სწევდა წინ ხაზს. ჩვენ მიჩვეულები ვართ ესპანელების ადვილად, დიდი სხვაობით დამარცხებას, მაგრამ ახლა ეს ის გუნდი აღარაა. მათ რუმინეთისა და რუსეთის დამარცხება შეძლეს. გვქონდა თამაშის აჩქარების მცდელობები, რაღაც მომენტებში ეს გამოგვდიოდა, თუმცა იყო შეცდომებიც."

სანტიაგო სანტოსი, ესპანეთის ნაკრების მთავარი მწვრთნელი:
"თამაშით და შედეგით კმაყოფილი ვარ. საქართველოში ამაზე მცირე სხვაობით მხოლოდ ერთხელ დავმარცხდით, სხვა შემთხვევებში კი ფაქტობრივად უშანსოდ ვიყავით.

ჩვენ ვეჩვევით მოგებამდე მისვლას. მოვა დრო, როდესაც მოგებაზე ვიფიქრებთ და მხოლოდ მცირე სხვაობით მარცხი აღარ დაგვაკმაყოფილებს.

ესპანეთის ნაკრებში მრავლად არიან ნატურალიზებული მოთამაშეები და მიმაჩნია, რომ დღეისათვის ეს განვითარების სწორი გზაა. გასათვალისწინებელია, რომ ფრანგ მოთამაშეებს ესპანური ფესვები აქვთ და ისინი ესპანელები არიან.

ჩვენ გვყავს მსოფლიოსა და ოლიმპიური ჩემპიონები ფეხბურთში, კალათბურთში, წყალბურთში, ფრენბურთში და იმისთვის, რომ მედიის ყურადღების ცენტრში ვიყოთ, საჭიროა, გვქონდეს შედეგი. სწორედ ამ შედეგს და ხარისხს ემსახურება ნატურალიზებული მოთამაშეების მოწვევა. მნიშვნელოვანია, რომ ახალმა თაობამ სწორედ ხარისხიან რაგბის უყუროს და თვითონ ეცადოს, მსგავსი რაგბი ითამაშოს."

დანიელ სნი, ესპანეთის ნაკრების კაპიტანი:
"შედეგით კმაყოფილი არ ვარ. შესაძლოა, რამდენიმე კვირა რომ გავა და ამ თამაშს გავიხსენებ, სხვაგვარად ვიფიქრო. დღეს ჩვენ გვყავს საუკეთესო გუნდი, რაც კი ესპანეთის ნაკრებს ოდესმე ჰყოლია. თუ კითხვას დავსვამთ ასე - შეგვმატა თუ არა ამ თამაშმა თავდაჯერება, გიპასუხებთ - დიახ, შეგვმატა".

საქართველო-ესპანეთი 23:10

საქართველო (15-9): მათიაშვილი, თოდუა, კაჭარავა, კვესელაძე, სიჭინავა (კოშაძე 76), ხმალაძე (მალაღურაძე 80), ლობჟანიძე (აფრასიძე 59); (1-8): ნარიაშვილი (ჟვანია 55), მამუკაშვილი, (ალხაზაშვილი 60), ჩილაჩავა (მელიქიძე 60), ნემსაძე, სუთიაშვილი (გიორგაძე 65), თხილაიშვილი (გაჩეჩილაძე 65), კოლელიშვილი, ლომიძე.
2ლ: საჯარიმო, მელიქიძე 3ს, გ: მათიაშვილი
სინბინი: კაჭარავა

ესპანეთი (15-9): პელიუშონი, კარიონი, ლოსადა, ალვარესი, კასტელიონი (გოია 52), სნი, ს. რუე (მეიკესი 60); (1-8): ლოპესი (კიუსტოჟა 60), გარსია (ბარნსი 65), მორენო (ბლანკო 49), გონსალესი, (მორა 60) პითერსი (მატო 70), იუსარაგა, ფოულდსი ნგავინდი (ტაული 52)
ლ: ტაული; გ, ს: პელიუშონი
მსაჯი: იენ დევისი (უელსი)
რუმინეთი-რუსეთი 25:15
ბელგია-გერმანია 69:15

თ მ ფ წ ბ ქ(პ)
1. საქართველო 3 3 0 0 +124 14(2)
2. რუმინეთი 3 2 0 1 +77 9(1)
3. ესპანეთი 3 2 0 1 +6 8(0)
4. რუსეთი 3 1 0 2 +24 6(2)
5. ბელგია 3 1 0 2 -34 5(1)
6. გერმანია 3 0 0 3 -197 0(0)

IV ტური
10 მარტი

რუსეთი-საქართველო
რუმინეთი-ბელგია
ესპანეთი-გერმანია

ყოველდღიური სპორტული გაზეთი "ლელო"
3824
მკითხველის კომენტარები / 4 /
ასა
0
რატომ არ ბეჭდავთ ჩემ თვალსაზრისს?! კიდევ ვიმეორებ ესპანელების გალომებას ხელი შეუწყო ჩვენი კაპიტნის და ზოგადად ჩვენი გუნდის მანდრაჟმა რაც გამოიხატება ჯარიმების დარტყმაში და აგრესიული თამაშის იგნორირებით, იქ ნემსაძსემ ჯარიმები აირჩია და შედეგად დაინახეს ესპანელებმა აცახცახებული საქართველოს ნაკრები აკი იძახიან კიდეც მოსაგები მატჩი იყოო, მართლაც ასეა... მახსენდება მართლაც კაცი იაპონელები, რომლებმაც ჯარიმა დამთავრებულ მატში სამხრეთ აფრიკას არ დაურტყეს და ამით უარი თქვეს ანგარიშის გათანაბრებაზე მათ აირჩიეს შერკინება და აფრიკელებს გამარჯვების ლელო დაუდეს... ნემსაძემ კი რა ჰქნა, ამაშია საქმე. მანდრაჟმა გამოწვია ის რომ ესპანელებმა შუა თითი დაგვანახეს და ისე წავდნენ, ამისთვის მადლობა ნემსაძეს...
ფარერა
0
ესპანელებს თავდაჯერება შემატა ქართველი კაპიტნის, თუ მაგას შეიძლება კაპიტანი ვუწოდოთ, თავის თავში დაურწმუნებლობამ, სწორედ მაგის შემდეგ აუშვეს აფრები ესპანელებმა როცა ადამიანის უაზრო ნემსაძემ უარი თქვა აგრესიულ გაგრძელებაზე და ჯარიმები დაარტყმევინა დუხდან დავარდნილ ნაკრების წევრებს, კარგად გემახსოვრებათ იაპონელთა ლელო და გამარჯვება მსოფლიო ჩემპიონატზე სამხრეთ აფრიკასთან. ,აშინ იაპონელებმა დასრულებულ მატჩსი ჯარიმის ანუ ანგარიშის გამათანაბრებელ დარტყმაზე უარი თქვეს და აგრესიული თამაშის შედეგად გამარჯვება მოიპოვეს, ამ მშიშრებმა კი ისეთ დუხზე მოიყვანეს ესპანეთის მეორე ნაკრები რომ კიღამ კატოკივით გადაგვიარეს... გადააყენეთ ნემსაძე კაპიტნობიდან და საერთოდაც ვიტყვი, რომ ქართული რაგბის მზე ეშვება....
მსგავსი ამბები
რუბრიკის სხვა სიახლეები
;