როცა ცენტრს ვერ აჩერებ, ცხვარივით განწირული ხარ! - ბითაძის 25 ქულა და 11 მოხსნა

სერბეთის პირველობის მესამე ტურში გოგა ბითაძის "მეგა ბიმაქსმა" სტუმრად "დინამიკთან" ითამაშა და დინამიკური თამაშით გაიმარჯვა - 102:85.

მოლოდინისამებრ შეუჩერებელი იყო გოგა ბითაძე. ხოლო, როდესაც ცენტრალური თავდამსხმელის შემჩერებელი არავინაა, გუნდი განწირულია. ბითაძემ ეფექტური ორმაგი დუბლი შეასრულა - 27 წუთში 25 ქულა და 11 მოხსნა. თუმცა ეს არ იკმარა: ჩაროზად 4 პასი და თითო ჩაჭრა-დაფარება მიაყოლა.

რაც ყველაზე სასიამოვნოა, გოგამ კიდევ ერთხელ დაგვანახა, რომ პატარაობაში, ნიკო ჩერქეზიშვილის ხელში სამქულიანებზე ტყუილად არ უვარჯიშია - 4-დან 3 სამიანი ჩააგდო, რაც ცენტრისთვის მეტად ფასეული მაჩვენებელია. მარგი ქმედების კოეფიციენტით ქართველი საუკეთესო იყო - 33 და რა თქმა უნდა, მატჩის საუკეთესო კალათბურთელადაც დასახელდა.

რაც შეეხება "მეგა ბიმაქსს", მან მატჩი თავიდანვე კარგად დაიწყო, პირველ მეოთხედში 29:25 დაწინაურდა, დიდ შესვენებამდე უპირატესობა 14-მდე გაზარდა, რის შემდეგაც მასპინძლებისთვის დაწევისა და გამარჯვების შანსი არ მიუცია.

გოგას შემდეგ ყველაზე მეტი ქულა მის თანაგუნდელ ოგნიენ ჩარაპიჩს ჰქონდა - 17.

"მეგას" 3 მოგება, 1 წაგება აქვს და B ჯგუფში "პარტიზანის" შემდეგ მეორეა. მომდევნო მატჩს "ტამიშთან" 12 მაისს გამართავს.

1742
მკითხველის კომენტარები / 1 /
harumafuji
0
კიდევ ბევრი უნდა ივარჯიშოს რომ ნბაშიც წარმატებით ითამაშოს და ნაკრებსაც ულიდეროს. გერმანიისნაირ გუნდებთან არ უნდა ვაგებდეთ კალათბურთში.
მსგავსი ამბები
რუბრიკის სხვა სიახლეები
;