რუმინეთი VS საქართველო. ლევან მაისაშვილი: რუმინელები ეცდებიან პროვოკაციაზე წამოგვაგონ

საქართველოს ნაკრები 9 თებერვალს, კლუჟში რაგბი ევროპის ჩემპიონატის პირველ მატჩს რუმინეთის ნაკრების წინააღმდეგ გამართავს.

საქართველოს ნაკრებმა პირველი ვარჯიში რუსთავის რაგბის სტადიონზე გამართა, სადაც მოედნის საფარი კარგ მდგომარეობაშია. ვარჯიშმა თითქმის ორ საათს გასტანა.

ლევან მაისაშვილი, საქართველოს ნაკრების დაცვის მწვრთნელი:

„მზადება საკმაოდ კარგად მიდის. ჩვენ ყოველთვის გვქონდა ბიჭების შეკრების პრობლემა. ორშაბათს საფრანგეთიდან ლეგიონერები ჩამოსვლას ვერ ასწრებდნენ და მხოლოდ სამშაბათის მეორე ვარჯიშზე ვიკრიბებოდით სრული შემადგენლობით. ახლა, წინა კვირაში თბილისში გამართული 3-დღიანი შეკრების შემდეგ, ისინი აქ დარჩნენ და ორშაბათს სრული შემადგენლობით, მომზადებულები და მობილიზებულები შევხვდით.

იმ სამ დღეში ბევრი რამ მოვასწარით, საქმე წინ წავიგდეთ და ზუსტად ამის შედეგია დღეს მოცულობითი სამუშაო რომ გავწიეთ და ორი საათი ნაყოფიერად ვიმუშავეთ. ახალგაზრდა მორაგბეები მოტივირებულები არიან და დარწმუნებული ვარ, ამ ტემპს შევინარჩუნებთ. მთავარია, ჩვენი დაცვისა და შეტევის სისტემებმა კარგად იმუშაოს, ინდივიდუალურად ყველაფერი ხარისხიანად შევასრულოთ და ნაკლებად საინტერესოა რას შემოგვთავაზებს რუმინეთი. ეს იმას არ ნიშნავს, რომ ანალიზს არ ვაკეთებთ, თუმცა კონცენტრაცია ჩვენს თამაშზე გვაქვს და არა მეტოქეზე“.
მერაბ შარიქაძე, საქართველოს ნაკრების კაპიტანი:

„ცოტა უჩვეულოა, პირველივე თამაში რუმინეთთან რომ გვაქვს და მზადებაც წინა წლებისგან განსხვავებულია. რაც უფრო რთულ მეტოქესთან გიწევს თამაში, მით უფრო რთულია მზადება. მთავარია, შედეგს მივაღწიოთ და ამისთვის არავინ არაფერს დავიშურებთ. ორი საათი კი არა, მზად ვართ ორი ამდენიც ვივარჯიშოთ.

ყველას კარგად გვესმის, რომ პირველი თამაში რთულ მეტოქესთან გვიწევს. რუმინეთისა და პორტუგალიის ნაკრებების მატჩის ვიდეოები ვნახეთ. პორტუგალია მოწოდების სიმაღლეზე ნამდვილად არ იყო და რუმინეთმა მას მარტივად მოუგო. მათ ახალი არაფერი შემოუთავაზებიათ და, ალბათ, ეცდებიან ფიზიკურად გვაჯობონ, პროვოკაციებზე წამოგვაგონ. თუმცა, რამდენად გამოუვათ, ეს სხვა საკითხია. მე მწარედ მახსოვს რუმინეთში ჩატარებული ბოლო თამაში და ძალიან მინდა, რომ დიდი სხვაობით მოვიგოთ. ამისთვის ძალ-ღონეს არავინ დავიშურებთ.“

ლევან ჩილაჩავა, საქართველოს ნაკრების შერკინების ბურჯი:

„ერთი კვირაა ვემზადებით. რადგან საფრანგეთში ტური არ იყო, სამდღიანი შეკრების შემდეგ ლეგიონერები საქართველოში დავრჩით და პირველად მოხდა ისე, რომ ორშაბათიდან მთელი გუნდით შევუდექით საქმეს. სერიოზული განწყობა გვაქვს, რადგან ყველას ცუდად გვახსოვს რუმინეთში წინა სტუმრობა და რევანში გვწყურია. მაშინ მეტოქე სათანადოდ ვერ შევაფასეთ, ახლა კი შესაბამისი განწყობა გვაქვს.

პირველი თამაში ასეთ სერიოზულ მოწინააღმდეგესთან არასდროს გვქონია. განწყობაც შესაბამისია, მით უმეტეს, რომ გუნდში ახალგაზრდები მრავლად არიან და მათ დამატებითი ენერგია შემოაქვთ“.

ამასობაში რუმინეთის ნაკრებმა, რომელიც მთლიანად ადგილობრივ ჩემპიონატში მოასპარეზე მორაგბეებით იყო დაკომპლექტებული, საწვთნელი შეკრება პორტუგალიაში გამართა და ამ ქვეყნის ნაკრებს 54:0 მოუგო.

შინ დაბრუნებულ „სტეჟარის“ შერკინებაში რამდენიმე ლეგიონერი დაემატა.

რუმინეთის ნაკრები

პირველი ხაზი: მიჰაიტა ლაზარი (გრენობლი), იონელ ბადიუა (ვალანსი), ანდრეი ურსაკე (კარკასონი), კონსტანტინ პრისტავიტა (ბაია მარე), ალექს გორდასი (ბუქარესტი), ოთარ ტურაშვილი (კოლომიე), ევგენ კაპატანა (ტიმიშოარა), ოვიდიუ კოჟოკარუ (ბაია მარე).
მეორე ხაზი: მარიან დრენკეანუ (ბუქარესტი), მარიუს ანტონესკუ (კოლომიე), იოჰან ფან ჰერდენი (პერპინიანი)
მესამე ხაზი: მიჰაი მაკოვეი (კოლომიე), ანდრე გორინი (მასი), ადრიან იონი (ბუქარესტი), კრისტიან ჩირიცა (ბაია მარე), ვიორელ ლუკაჩი (სტიაუა), დორინ ლაზარი (სარასენზი)
№9: ფლორინ სურუჯუ (სტიაუა), ვალენტინ კალაფეტეანუ (ბუქარესტი)
№10: დანიელ პლაი (სტიაუა), ფლორინ ვლაიკუ (ბუქარესტი)
№12-13: ალექსანდრუ ბუკური (ბაია მარე), ვლადუც პოპა (სტიაუა), კატალინ ფერკუ (ტიმიშოარა), კოზმინ ლიუტა (ბუქარესტი)
№11-14: იონუც დუმიტრუ (სტიაუა), ნიკოლას ონუტუ (ბუქარესტი), ვლადუც ზაჰარია (ტიმიშოარა)
№15: მარიუს სიმონესკუ (ტიმიშოარა), იონელ მელინტე (სტიაუა)

საქართველოს ნაკრები

პირველი ხაზი: თორნიკე მატარაძე (ნევერი), გურამ გოგიჩაშვილი (რასინგი), შალვა მამუკაშვილი (ენისეი), გიორგი ჭყოიძე (ლელო), გოგა ხუროშვილი (არმაზი), ლევან ჩილაჩავა (მონპელიე), გიორგი მელიქიძე (სტად ფრანსე), ბექა გიგაშვილი (გრენობლი)
მეორე ხაზი: გიორგი ნემსაძე (ოსფრიზი), ნოდარ ჭეიშვილი (კორნიშ პირატსი), დავით გიგაური (ბუქარესტი), გრიგორ ქერდიყოშვილი (ლელო)
მესამე ხაზი: გიორგი თხილაიშვილი (ბათუმი), ბექა გორგაძე (ბორდო), გიორგი ცუცქირიძე, გიორგი ჯავახია, ბექა საღინაძე (სამივე-ორიაკი)
№9: ვასილ ლობჟანიძე (ბრივი), გელა აფრასიძე (მონპელიე), გიორგი ბეგაძე (ლოკომოტივი)
№10: თედო აბჟანდაძე (აია), ლაშა მალაღურაძე (ვვა)
№12-13: მერაბ შარიქაძე (ორიაკი), გიორგი კვესელაძე (არმაზი), გიორგი კოშაძე (ხარები)
№11-14: ზურაბ ძნელაძე, გიორგი აფციაური (ორივე-ლოკომოტივი), მირიან მოდებაძე (აია), ალექსანდრე თოდუა (ბათუმი)
№15: ლაშა ხმალაძე (ბათუმი)

ყოველდღიური სპორტული გაზეთი "ლელო"
1682
მკითხველის კომენტარები / 0 /
მსგავსი ამბები
რუბრიკის სხვა სიახლეები
;