რუსების საჩივარი და რაგბი ევროპის თავსატეხი

რაგბი ევროპის შტაბბინაში დირექტორთა საბჭოს სხდომა გაიმართა, რომელიც ბელგია-ესპანეთის მატჩის განხილვას დაეთმო. სხდომაზე "რაგბი ევროპის" გენერალურმა მდივანმა საბჭოს წევრებს იმ სპეციალისტების დასკვნები გააცნო, ვისაც კონსულტაციისთვის მიმართეს.

საბჭომ საბოლოო გადაწყვეტილების მიღებამდე დამატებითი ინფორმაცია მოითხოვა, რომელიც რაგბის საერთაშორისო კავშირს წარუდგინეს. საბოლოო გადაწყვეტილებას რაგბი ევროპა, სავარაუდოდ, ხვალ განმეორებით სხდომაზე მიიღებს.

ამასობაში კი, რუსეთის რაგბის კავშირმა რაგბი ევროპასა და მსოფლიო რაგბის მიმართა თხოვნით, გადამოწმდეს რუმინეთის ნაკრების წარმოშობით ტონგელი მორაგბის სიონე ფაკაოსილეას ნატურალიზების კანონიერება.

გამორიცხული არ არის, რომ ამას მოჰყვეს სხვა ქვეყნების, ესპანეთისა და ბელგიის ნაკრებების ნატურალიზებული მორაგბეების კანონიერების გადამოწმება.

ერთი სიტყვით, მოვლენები შესაძლოა, ისე განვითარდეს, რომ მსოფლიოს თასზე არა რუმინეთი ან ესპანეთი, არამედ რუსეთი მოხვდეს.

შეგახსენებთ, რომ მსგავს სკანდალს ადგილი 2002 წელს ჰქონდა. ავსტრალიაში გასამართი მსოფლიოს თასის შესარჩევ ეტაპზე ესპანეთის ნაკრების წინააღმდეგ რუსეთის ნაკრებში რამდენიმე სამხრეთაფრიკელმა მორაგბემ ითამაშა. ესპანელებმა მატჩი წააგეს, მაგრამ მერე რუსებს ზემდგომ ორგანოებში უჩივლეს და "დათვები" გათამაშებიდან მოხსნეს.

აღსანიშნავია, რომ იქამდე, რუსებმა ეს სამხერეთაფრიკელი მორაგბეები საქართველოს ნაკრების წინააღმდეგაც ათამაშეს ჩვენთვის ისტორიულ მატჩში 2002 წლის 13 ოქტომბერს, როცა პირველად მოვიპოვეთ მსოფლიოს თასზე თამაშის უფლება. მაშინ, საქართველოს რაგბის კავშირს რუსებისთვის არ უჩივლია.

ყოველდღიური სპორტული გაზეთი "ლელო"
2098
მკითხველის კომენტარები / 0 /
მსგავსი ამბები
რუბრიკის სხვა სიახლეები
;