რუსეთის ნაკრების მწვრთნელი ლინ ჯონსი: საქართველოს ნაკრები უნიკალურია

საქართველოს და რუსეთის ნაკრებების 17 მარტს გამართული დაპირისპირება უკვე ისტორიის საკუთრებაა. საინტერესოა, როგორი შეფასებები მოჰყვა ამ შეხვედრას ორივე გუნდის მწვრთნელებისგან და რუსთა მოთამაშეებისგან.

ლინ ჯონსი, რუსეთის ნაკრების მთავარი მწვრთნელი:
„ვფიქრობ, კითხვაზე პასუხი, რატომ ვერ მოვიგეთ, ნათელია. თავიდან კარგად დავიწყეთ, მაგრამ ქულების მოპოვება ვერაფრით შევძელით. ლელოს გაშვებამ ტაიმის ბოლო წუთზე კიდევ უფრო გაგვირთულა ვითარება. ცხადია, ამინდმა ორივე გუნდს შეუშალა ხელი, მაგრამ ქართველები მეორე ტაიმში ბურთს უკეთ აკონტროლებდნენ. თამაში მთლიანად ჩვენი მოედნის ნახევარზე გადმოიტანეს. მატჩის მსვლელობისას თამაშში კორექტივების შეტანა რთული აღმოჩნდა.

მინდა მივულოცო მეტოქეს რაგბი ევროპის ჩემპიონატის მოგება. ისინი ამას რეალურად იმსახურებენ, თუნდაც იმიტომ რომ მთელი ტურნირის განმავლობაში მხოლოდ ორი ლელო მიიღეს. ეს ძალიან კარგი შედეგია. ჩვენს ყველა მეტოქეს აქვს ძლიერი და სუსტი მხარეები. ამ მხრივ საქართველოს ნაკრები უნიკალურია“.

მილტონ ჰეიგი, საქართველოს ნაკრების მთავარი მწვრთნელი:

„ყოველ ჯერზე, როცა რუსეთში ჩამოვდივართ, ვიცით, რომ რთული მატჩი გველის. ჩვენ სრულად გვაქვს გაცნობიერებული, რამდენად მნიშვნელოვანია რუსების დამარცხება, არა მარტო გუნდისთვის, არამედ მთელი ჩვენი ქვეყნისთვის.

პირველი ტაიმით უკმაყოფილო ვარ. მორაგბეები ზედმეტად ნერვიულობდნენ. შესვენებაზე ბიჭებს ვთხოვე ნერვები მოეთოკათ, მშვიდად ეთამაშათ.. ანგარიში 22:6 სავსებით დამაკმაყოფილებელია.“

ვასილი არტემიევი, რუსეთის ნაკრების კაპიტანი:
„ერთადერთი უპირატესობა, რაც დღეს ქართველებს ჰქონდათ, შერკინებაში თამაში იყო. თავს ცუდად არ ვიცავდით და მეტოქეს შეცდომებიც დავაშვებინეთ. შერკინებაში უპირატესობის ხარჯზე, ქართველებმა რუსეთის ნაკრები წნეხში მოაქციეს. მეორე ტაიმში ჩვენს ნახევარს ვიყავით მიჯაჭვულნი. თავისი მონოტონური მუშაობით, საქართველოს ნაკრებმა დააგროვა ქულები და მიიღო შედეგი. სხვა მხრივ, დღეს საკმაოდ თანაბარი გუნდები თამაშობდნენ“.

ყოველდღიური სპორტული გაზეთი "ლელო"
2024
მკითხველის კომენტარები / 1 /
zero
0
როგორი თამშის საშუალებასაც იძლეოდა ამინდი ისე გეთამაშეთ პატივცემულო არტემიევ და დარწმუნებული ბრძანდებოდეთ, რომ უკეთესი ამინდის პირობებში ყველა კომპონენტში (არა მარტო შრკინებაში) ისევ ორი თავით მაღლა იდგებოდა ჩვენი გუნდი.
რაგბი ჩვენი თამაშია, თქვენი თამაშია შაშკი, დომინო და გარადკი.
მსგავსი ამბები
რუბრიკის სხვა სიახლეები
;