NBA-ს კლუბმა "იუტა ჯაზმა" ქართულ "რუსთავს" წერილი გამოუგზავნა... გიორგიოს კეცელიდისი შთაბეჭდილებას გვიზიარებს

საკალათბურთო კლუბ "რუსთავის" მთავარი მწვრთნელი, გიორგიოს კეცელიდისი მივლინებით NBA-ს კლუბ "იუტა ჯაზში" იყო. იქ უშუალოდ აკვირდებოდა მუშაობის პროცესს. ცხადია, ეს ნებისმიერი მწვრთნელისთვის დიდი გამოცდილებაა. ამერიკიდან დაბრუნებულმა ბერძენმა სპეციალსიტმა თანამემემულე ჟურნალისტებს საინტერესო ინტერვიუ მისცა, რომლის თარგმანსაც აქ შემოგთავაზებთ. მანამდე კი გაგაცნობთ წერილის შინაარსს, რომელიც "იუტა ჯაზმა" საკალათბურთო კლუბ "რუსთავს" გამოუგზავნა:

"კლუბის სახელით გვინდა მადლობა გადაგიხადოთ, რომ თქვენი გუნდის მთავარ მწვრთნელ გიორგიოს კეცელიდისს ნება დართეთ მონაწილეობა მიეღო "იუტას" წინასასეზონო მომზადების პროცესში.
მწვრთნელი თავიდან ბოლომდე ჩართული იყო ვარჯიშებსა და საკონტროლო მატჩებში. აღფრთოვანებულები ვართ მისი პროფესიონალიზმითა და დეტალებისადმი ყურადღებით, კალათბურთისადმი გამოჩენილი ენთუზიაზმით.
ჩვენთვის პატივი იყო მისი სტუმრობა და საინტერესო იყო ურთიერთგამოცდილების გაზიარება."



ახლა ბერძნულ გამოცემა SEPK.GR-ზე გამოქვეყნებული პუბლიკაცია ვთარგმნოთ:

"პირველ რიგში, მინდა მადლობა ვუთხრა პანაიოტის იანაკისსა და სტავროს ნიარხოსს, რომელთა დახმარებითაც გავემგზავრე იუტაში. ასევე მწვრთნელ ფოტის კაციკარისს, რომელიც გასულ წელს "ჯაზში" მოღვაწეობდა და სწორედ მისი შეწევნით გაიღო ჩვენთვის "იუტას" კარი. ბერძნები სტუმრის პატივისცემით განთქმულები ვართ, თუმცა ძალიან მომხიბლა "იუტა ჯაზის" თითოეული წევრის სტუმართმოყვარეობამ," - გვითხრა გიორგიოს კეცელიდისმა და საუბარი "იუტას" საწვრთნელი პროცესით განაგრძო:

"სავარჯიშო დარბაზში ორი მოედანია, რომელთა გვერდით კიდევ ორია. მწვრთნელებს საშუალება აქვთ კალათბურთელები სამ-ოთხ ჯგუფად გაყონ და ცალ-ცალკე ამუშავონ. ორი მოედნიდან ტრენაჟორების დარბაზში გასვლა შეიძლება. იქვეა დიდი ტელევიზორი, რომლის მეშვეობითაც მთავარი მწვრთნელი ქუინ სნაიდერი შეგირდებს შეცდომებზე მიუთითებს.

ვარჯიშებობს 20 კალათბურთელი, რომლებთანაც მუშაობს 18 მწვრთნელი, ზოგი ფიზმომზადებაზეა პასუხისმგებელი, ზოგი შეტევაზე, ზოგი დაცვაზე, განვითარებაზე, ზოგს ვიდეო აბარია... მოკლედ, რომელ კალათბურთელს რა კომპონენტის დახვეწაც სჭირდება, მთავარი მწვრთნელის მითითებით შესაბამის მწვრთნელთან გადადის.

მოთამაშეები რესტორანშიც გუნდის მიერ შედგენილი მენიუთი იკვებებიან.

"იუტა ჯაზს" ასევე დაქირავებული ჰყავს ყოფილი მსაჯი, რომელიც კალათბურთელებს წესებსა და მასში განხორციელებულ ცვლილებებზე ესაუბრება."

გიორგიოს კეცელიდისმა "იუტას" მთავარი მწვრთნელის, ქუინ სნაიდერის ფილოსოფიაზეც მოგვითხრო:

"როგორც მწვრთნელი, ძალიან ახლოსაა ევროპულ სტილთან. ეს მან ჩვენთან საუბრისასაც აღნიშნა. იგი ცდილობს ევროპიდან საჭირო საკალათბურთო ნიუანსები დაამუშავოს და "ჯაზის" საწვრთნელ პროცესში შეიტანოს. მასში მინიმალურადაც არ შეინიშნებოდა ქედმაღლობა, რასაც ვერ ვიტყვი ზოგიერთ ბერძენ მწვრთნელზე. კიდევ ერთხელ დავრწმუნდი, რომ დიდი მწვრთნელი რომ გახდე, საჭიროა იყო დიდი ადამიანი.

ქუინ სნაიდერის გუნდში კალათბურთელები პოზიციებზე მიმაგრებულნი არ არიან (გარდა მეხუთე ნომრისა, რუდი გობერისა), ეს თამაშის ტემპს საგრძნობლად ამაღლებს. ჩვენთვის ახალი იყო, რომ მოხსნისას ცენტრი ბურთს უკენ კი არ უბრუნებს გამთამაშებელს, არამედ შეტევაში მყოფ უახლოეს პარტნიორს აძლევს. ესეც სისწრაფის მომატებისთვის კეთდება. ვფიქრობ, კალათბურთი, რომელსაც ამ სეზონში "იუტა" ითამაშებს, ევროპელი მწვრთნელებისთვის ყურადსაღები უნდა იყოს.

რაც შეეხება დაცვას, ქუინ სნეიდერსს სწრაფი იერიშის შესაჩერებლადაც უამრავი ხერხი აქვს, პიკ-ენდ-როლის წინააღმდეგაც და პოზიციური შეტევისასაც. ალბათ, ამიტომაცაა, "იუტა ჯაზის" დაცვა ერთ-ერთი ყველაზე გამორჩეული.

ჩემთვის დიდი გამოცდილება იყო ასეთ ორგანიზაციაში სტუმრობა, ასეთი დონის მწვრთნელებისგან ძალიან ბევრი ვისწავლე."

"იუტა ჯაზის" წერილი "რუსთავს":

ყოველდღიური სპორტული გაზეთი "ლელო"
1557
მკითხველის კომენტარები / 0 /
მსგავსი ამბები
რუბრიკის სხვა სიახლეები
;