რუსთავში მწვრთნელი გიორგი შაშიაშვილი: გამოცდილები წავიდნენ, აქცენტს ახალგაზრდებზე გავაკეთებთ

გუშინ „რუსთავი“ გიორგი შაშიაშვილმა ავარჯიშა - 39 წლის მწვრთნელმა, ვინც უკვე მოასწრო გორის „დილასა“ და ქობულეთის „შუქურაში“ დამოუკიდებლად მუშაობა. ბოლოს შაშიაშვილი გორის „დილაში“ იყო, საიდანაც სეზონის დასრულების შემდეგ წავიდა.

ამ ეტაპზე საქმე ასეა: „რუსთავი“ დატოვა ყველა გამოცდილმა ფეხბურთელმა, რომლებიც გასულ სეზონში კლუბში ირიცხებოდნენ. ფაქტია, ახალ მწვრთნელს წინ დიდი სამუშაო ელის. მოგეხსენებათ, გასული სეზონის მეორე ნახევარში „რუსთავს“ უჩა სოსიაშვილი ხელმძღვანელობდა და მან პროგრამა-მინიმუმი შეასრულა - გუნდი ქართულ საფეხბურთო ელიტაში დატოვა.

მას შემდეგ, რაც კლუბმა ვარლამ კილასონიას ხელმძღვანელობით უმაღლესი ლიგის საგზური მოიპოვა, მას ბედად დაჰყვა მწვრთნელთა ხშირი ცვლა. კარგად გვახსოვს, გუნდში ვლადიმირ გაზაევის მოსვლას დიდი იმედები უკავშირდებოდა. გამოჩნდნენ ახალი ლეგიონერები, მაგრამ მოლოდინი ბოლომდე არ გამართლდა და გაზაევმაც კლუბი მალევე დატოვა. „რუსთავში“ ისევ კილასონია დაბრუნდა, ვინც მალევე ჩაანაცვლა სოსიაშვილმა...

ქართულ საფეხბურთო ბაზარზე „რუსთავიდან“ მასობრივი მიგრაციის პირობებში არაერთი, ძალიან საინტერესო ფიგურა ჩნდება. ჩვენი ინფორმაციით, ოთარ მარცვალაძე ახლოსაა საფეხბურთო კარიერის დასრულებასთან. თუ მან ეს გადაიფიქრა, არაერთი ქართული კლუბისთვის უნდა იყოს ტკბილი ლუკმა, ისევე, როგორც დავით კვირკველია, პაპუნა ფონიავა, ირაკლი კლიმიაშვილი, გიორგი პაპავა და სხვები.
გუშინ „ლელო“ გიორგი შაშიაშვილს დაუკავშირდა და ინტერვიუ ჩამოართვა.

- „რუსთავში“ თქვენი მისვლა გადაწყვეტილია?

- დიახ, უკვე პირველი ვარჯიშიც ჩავატარე. ახალი სეზონისთვის მაქსიმალურად კარგად უნდა მოვემზადოთ.

- როგორც ვიცით, გამოცდილი ფეხბურთელების უმრავლესობა კლუბიდან წავიდა...

- ზუსტი ინფორმაცია გაქვთ - პრაქტიკულად, ყველა გამოცდილმა მოთამაშემ დაგვტოვა. ოთარ მარცვალაძე, დავით კვირკველია და სხვები გუნდში აღარ არიან. ჩვენ აქცენტს ვაკეთებთ ახალგაზრდა ფეხბურთელებზე. პირდაპირ ვიტყვი, რომ ამ ეტაპზე უმაღლეს მიზნებზე ლაპარაკი არ არის. უნდა ჩამოვაყალიბოთ საშუალო დონის გუნდი, რომელიც ყველა შეხვედრაში ბოლომდე იბრძოლებს.

- გამოცდილებიდან ვინ დარჩა?

- უფრო ადგილობრივი მოთამაშეები. რამდენიმე გამოცდილი მოთამაშის დამატება დაგვჭირდება, მაგრამ კიდევ ერთხელ ვამბობ - აქცენტი გაკეთდება ახალგაზრდა მოთამაშეებზე.

- ლეგიონერების დამატებას თუ აპირებთ?

- ამ ეტაპზე ეს საკითხი არ დგას დღის წესრიგში. თუმცა თურქულ შეკრებაზე რომ წავალთ, არ გამოვრიცხავ, იქ დავიმატოთ ლეგიონერები.

- ითქვა, „რუსთავში“ ფინანსური თვალსაზრისით მთლად სახარბიელო მდგომარეობა ვერ არისო...

- რამდენიმე ქართული კლუბის გარდა ფინანსურად არავის ულხინს, ეს ფაქტია. რა მოცემულობაც გვაქვს, იმ პირობებში უნდა შევძლოთ ბრძოლისუნარიანი გუნდის ჩამოყალიბება.

- უცხოური შეკრების გავლა ხერხდება?

- კი, თურქულ შეკრებაზე 10 თებერვალს წავალთ და იქ 12 დღის განმავლობაში გავჩერდებით.

ყოველდღიური სპორტული გაზეთი "ლელო"
1062
მკითხველის კომენტარები / 0 /
მსგავსი ამბები
რუბრიკის სხვა სიახლეები
;