რუსი კომენტატორი: აი, ვინ არის შენგელია - ლიდერი, ემოცია, დუბლი... [VIDEO]

მას მერე, რაც სტამბოლურ მატჩებში "ფენერბაჰჩე" "ბასკონიასთან" 2:0 დაწინაურდა, თორნიკე შეგელიასა და მისი თანაგუნდელებისთვის საშინაო შეხვედრები სამკვდრო-სასიცოცხლო ბრძოლებად იქცა.

ასეთ სიტუაციაში კი მხოლოდ სათამაშო კლასი და ტაქტიკა არაფერს წყვეტს, საჭიროა თავგანწირვა და დიდი ემოცია. ჰოდა, ბოლო წუთზე, როცა იან ვესელი თორნიკე შენგელიაზე დაჯარიმდა, რუსმა კომენტატორმა მოკლედ თქვა:

"თორნიკე ლიდერია, "ბასკონიას" წინ მიუძღვის და თავისი ემოციით საბრძოლოდ განაწყობს თანაგუნდელებს. ასე იყო მთელი მატჩის მანძილზე".
საფინალო სირენამდე 18 წამით ადრე შენგელიამ ორივე საჯარიმო ჩააგდო, "ბასკნია" 88:80 დააწინაურა, რაც უკვე გამარჯვებას ნიშნავდა, თუმცა საფინალო ანგარიში კოსტას სკლუკასის სამქულიანის შემდეგ დაფიქსირდა - 88:83 ბასკების სასარგებლოდ.

საინტერესოა, რომ მთელი მატჩის განმავლობაში თორნიკეს მიმართ განსაკუთრებულ ყურადღებას იჩენდნენ "ფენერის" დამცველები. როდესაც ჩვენიანი ბურთს მიიღებდა და თავის მეურვეს ჩამოიშორებდა, ფარქვეშიდან ერთი ხვდებოდა, ხოლო მესამე პერიმეტრიდან გამორბოდა ბურთის წასართმევად...

შედეგად, თოკოს ქულების მოგროვება ჩვეულებრივზე მეტად უჭირდა, სამაგიეროდ თავისუფალ პარტნიორებს პასებით ამარაგებდა და 4 შედეგიანი გადაცემაც მოუგროვდა. "ბასკონიამ" კი 14 სამქულიანი ჩააგდო.

დავუბრუნდეთ შენგელიას საჯარიმოებს. მატჩის დამთავრებამდე 18 წამით ადრე მის ანგარიშზე 8 ქულა და 10 მოხსნა იყო, ორივე ტყორცნა გამოიყენა და მრგვალი ორმაგი დუბლიც მიითვალა - 10 ქულა, 10 მოხსნა, 4 პასი, 1 ჩაჭრა. ეს ყველაფერი 26 წუთში.

6-დან 4 სამქულიანი ჩააგდო და 21 ქულამდე ავიდა როდრიგ ბობუა. "ფენერბაჰჩეში" 17 ქულითა და 10 მოხსნით იან ვესელი გამოირჩა.
ასე და ამგვარად მეოთხედფინალურ სერიაში ანგარიშში სხვაობა შემცირდა - "ფენერბაჰჩე" 2:1-ს იგებს. მეოთხე მატჩი 26 აპრილს ისევ ვიტორიაშია.

6220
მკითხველის კომენტარები / 0 /
მსგავსი ამბები
რუბრიკის სხვა სიახლეები
;