რუსი ჟურნალისტის სერიოზული ანალიზი საქართველოზე: რეკორდსმენი ბითაძიდან ვითიბი ლიგის ჩემპიონ მარკოიშვილამდე

საკალათბურთო რუკა - საქართველო

ვითიბი ლიგის ოფიციალურ საიტზე საინტერესო რუბრიკაა - "საკალათბურთო რუკა", რომელშიც ჟურნალისტი დმიტრი კოლინოვი სხვადასხვა ქვეყნებზე ამომწურავად წერს. ამჯერად რუბრიკის სტუმარია საქართველო. გთავაზობთ პუბლიკაციის სრულ თარგმანს.

[სერბეთი-საქართველო 94:90] ილიას ზუროსი: იცით, რა გამეხარდა მოგებაზე მეტად?

მოთამაშეები ვითიბი ლიგის ისტორიაში: 14

მათი სია: მიხეილ ბერიშვილი, იოსებ ბიბილური, გოგა ბითაძე, მერაბ ბოქოლიშვილი, ლუკა გიორგაძე, დავით მაისურაძე, მანუჩარ მარკოიშვილი, ლევან ფაცაცია, მაიზერ რევაზაშვილი, ვიქტორ სანიკიძე, ბექა წივწივაძე, გიორგი ცინცაძე, ირაკლი ჩლაიძე, ლევან შენგელია.

14 ქართველი კალათბურთელიდან ათი თბილისის "ვითას" წარმოადგენდა, რომელიც ვითიბი ლიგაში 2015-16 წლების სეზონში გამოდიოდა. მათ შორისაა გოგა ბითაძე - ნაციონალური საკალათბურთო ასოციაციის ერთადერთი ქართველი წარმომადგენელი. ბითაძეს ლიგაში დებიუტი 16 წლისა და 78 დღისას ჰქონდა, რაც ჩემპიონატის რეკორდია. იგი საშუალოდ 2.8 ქულასა და 1.7 მოხსნას აგროვებდა 6 მატჩში.

2014-15 წლების სეზონში ქართველი კალათბურთელები გამოდიოდნენ ცსკა-ში, "უნიქსსა" და "ნიჟნი ნოვგოროდში". ცსკა-სთან ერთად ვითიბი ლიგა მოიგო მანუჩარ მარკოიშვილმა, ყაზანში ვიქტორ სანიკიძე თამაშობდა, ხოლო "ნიჟნი ნოვგოროდის" ღირსებას ლევან ფაცაცია იცავდა.

ვითიბი ლიგის ისტორიაში პირველი ქართველი კალათბურთელი გიორგი ცინცაძე იყო. იგი 2013-14 წლების სეზონში უკრაინულ "დონეცკში" თამაშობდა, საშუალოდ 5.8 ქულასა და 3.4 პასს აგროვებდა.

სამ გაქართველებულ ამერიკელსაც უთამაშია: მეტ ჯენინგს ("ყუბანი", 2015-2017), მაიკლ დიქსონს ("ნიმბურკი", 2015-16), ჯეიკობ პულენს ("ხიმკი", 2016-17).



კალათბურთი საქართველოში

მოსახლეობა: 3.7 მილიონი

ლიგა: ქართული სუპერლიგა

დაარსდა: 1990 წელს

გუნდების რაოდენობა: 11

საიტი: superleague.ge

საქართველოს ჩემპიონატში მოასპარეზე 11 გუნდიდან პლეი ოფში 8 გადის. საპლეიოფო სერიები 3 მოგებამდეა. მეათე გუნდი თამაშობს გადათამაშებას მეორე ლიგის მეორე გუნდთან. სუპერლიგის ბოლოადგილოსანი ადგილს "ა" ლიგის გამარჯვებულს უთმობს.

8 კლუბი თბილისურია და "ოლიმპიურ სასახლეში" თამაშობს.

ქართული სუპერლიგის 29-წლიან ისტორიაში ჩემპიონი 10 სხვადასხვა გუნდი გამხდარა. ყველაზე მეტჯერ "ვითა" (შვიდჯერ) და "დინამო" (ექვსჯერ), ხუთი საჩემპიონო ტიტული აქვს "ბათუმს".

ქართულმა გუნდმა ევროტურნირებზე ბოლოს 2018-19 წლების სეზონში ითამაშა. მაშინ თბილისის "დინამომ" ჩემპიონთა ლიგის საკვალიფიკაციო ეტაპის ბარიერი ვერ გადალახა - ბერძნულ "არისთან" 64:90, 54:92 დამარცხდა.



საინტერესო ფაქტი

NBA-ის 2002 წლის დრაფტზე "დენვერ ნაგეტსმა" მეხუთე ნომრად ქართველი ნიკოლოზ ცქიტიშვილი აირჩია. თბილისელი ახალგაზრდა მესამე ევროპელი გახდა, რომელიც დრაფტზე ხუთეულში აირჩიეს - შონ ბრედლისა და პაუ გასოლის შემდეგ.

ნიკოლოზი ნაციონალურ ლიგაში ოთხი სეზონი თამაშობდა. გამოდიოდა "დენვერში", "გოლდენ სტეიტში", "მინესოტასა" და "ფინიქსში".



საქართველოს ნაკრები

ფიბა-ს რეიტინგში: 36

ფიბა-ს წევრი: 1992 წლიდან

მიღწევები: 4 ევრობასკეტის მონაწილე (2011, 2013, 2015, 2017)

საქართველოს ნაკრებმა პირველი ოფიციალური მატჩი 1995 წელს გამართა. ეს იყო ევრობასკეტი 1997-ის კვალიფიკაცია. სადებიუტო შეხვედრაში ქართველებმა პოლონელებთან 68:91 დათმეს.

საქართველოსთვის პირველი ევრობასკეტი 2011 იყო. მას მერე "ჯვაროსნებს" ერთი ევროპის ჩემპიონატიც არ გამოუტოვებიათ.

თავის ისტორიაში საქართველოს 237 მატჩი აქვს გამართული (119 მოგება, 118 წაგება) 46 ქვეყნის წინააღმდეგ. მნიშვნელოვან გამარჯვებებს შორისაა ევრობასკეტი 2015-ის მასპინძლის, ხორვატიის დამარცხება 71:58; გამარჯვება ლიეტუვასთან ევრო 2017-ზე (79:77) და წლევანდელი მოგება ბელგრადში - ევრობასკეტი 2021-ის შესარჩევზე ქართველებმა სერბებს 94:90 აჯობეს. საინტერესოა, რომ "ჯვაროსნები" სერბეთის ნაკრებს ხუთჯერ შეხვდნენ და სამჯერ დაამარცხეს.

2001 წლიდან საქართველოს ეროვნულ გუნდს უცხოელი სპეციალისტები წვრთნიან:

2004 - დრაჟენ ბრაიკოვიჩი (ხორვატია)

2005-06 - გორდონ ჰერბერტი (კანადა)

2007 - კენ შილდსი (კანადა)

2008-2015 - იგორ კოკოშკოვი (სერბეთი)

2016 წლიდან ილიას ზუროსი (საბერძნეთი)



ცნობილი კალათბურთელები

ზაზა ფაჩულია. ქართველი ცენტრის აქტივში NBA-ში გატარებული 16 სეზონია. ზაზა ორჯერ, 2017 და 2018 წლებში, "გოლდენ სტეიტთან" ერთად, ნაციონალური საკალათბურთო ასოციაციის ჩემპიონი გახდა. კარიერის დასრულების შემდეგ ფაჩულია "უორიორსში" საკალათბურთო ოპერაციების კონსულტანტის პოსტზე დაინიშნა.

თორნიკე შენგელია. ევროთასისა (2010) ესპანეთის (2020) ჩემპიონი. 2018 წელს ქართველი ფორვარდი ევროლიგის პირველ სიმბოლურ ხუთეულში მოხვდა. თორნიკეს ანგარიშზე NBA-ში გატარებული ორი წელია - ასპარეზობდა "ბრუკლინსა" და "ჩიკაგოში".

გოგა ბითაძე. 2019 წლის NBA-ის დრაფტის მე-18 ნომერი. ქართველი ცენტრი ამერიკაში "ინდიანა პეისერსის" ღირსებას იცავს. 2019 წელს ბითაძე ევროლიგის ამომავალ ვარსკვლავად, ადრიატიკის ლიგისა და სერბეთის ჩემპიონატის საუკეთესო კალათბურთელად დასახელდა.

გიორგი შერმადინი. ევროლიგის ორგზის გამარჯვებული, საბერძნეთის ჩემპიონი, ფიბა-ს საკონტინენტთასორისო თასის მფლობელი. 2017 და 2020 წლებში ქართველი ცენტრი მოხვდა ესპანეთის ჩემპიონატის პირველ სიმბოლურ ხუთეულში.

მანუჩარ მარკოიშვილი. საქართველოს (ორგზის), სლოვენიის (ორგზის), იტალიის, თურქეთის, ვითიბი ლიგისა და ფიბა-ს თასის გამარჯვებული. 2019 წლიდან მანუჩარი საქართველოს ნაკრების მთავარი მწვრთნელის ასისტენტია, 2020 წლიდან კლუბ "ტიტების" მთავარი მწვრთნელი.

ასევე მაღალი კლასის ქართველი მოთამაშეები: ნიკოლოზ ცქიტიშვილი, ვლადიმერ ბოისა, გიორგი ცინცაძე, ვიქტორ სანიკიძე.

7526
მკითხველის კომენტარები / 0 /
მსგავსი ამბები
რუბრიკის სხვა სიახლეები
;