რუსული გამოცემა მომატებულ ტრავმებში სპარტაკის ექიმებს ადანაშაულებს

უკვე ცნობილია - ჯანო ანანიძეს ოპერაციას ოთხშაბათს, 28 მარტს გაუკეთებენ. საქართველოს ნაკრების ერთ-ერთი ლიდერი ამისთვის ხვალ თბილისიდან რომში გადაფრინდება.

კლინიკა "ვილა სტიუარტს" "სპარტაკთან" ხელშეკრულება აკავშირებს. შარშან ანანიძემ მარცხენა ფეხის ტერფზე ოპერაცია სწორედ რომში გაიკეთა და "სპარტაკში" თანაგუნდელებთან ერთად ვარჯიშს მარტის დასაწყისში შეუდგა.

იტალიაში გაემგზავრებიან "სპარტაკის" სამედიცინო დეპარტამენტის ხელმძღვანელი მიხაილ ვართაპეტოვი და რუსეთის ნაკრებისა და "სპარტაკის" მცველი გიორგი ჯიქიაც, რომელსაც ზუსტად იგივე ტრავმა აქვს და რეაბილიტაციას გადის.

მძიმე ტრავმები

ახლა მთავარი კითხვა ისაა, რა ელის ჯანო ანანიძეს? ცხადია, ეს კითხვა ყველა ქართველ და მოსკოვის "სპარტაკის" გულშემატკივარს ებადება. ამის თაობაზე "სპორტ-ექსპრესმა" სტატია გამოაქვეყნა - მკვეთრი და დაუნდობელი.

"ანანიძის დიაგნოზი დადასტურდა და ეს ნიშნავს იმას, რომ ქართველი "სპარტაკს" სეზონის ბოლომდე ვერ დაეხმარება. 25 წლის შემტევი ნახევარმცველი "სპარტაკში" 2007 წელს ჩაირიცხა.

პირველად, საქართველოს ეროვნულ ნაკრებში 2009 წლის სექტემბერში იტალიელებთან ითამაშა. ერთ თვეში კი მოსკოვის "ლოკომოტივს" გაუტანა და რუსეთის პრემიერლიგის ისტორიაში ყველაზე ახალგაზრდა ფეხბურთელი გახდა, რომელმაც ამ დონეზე შეაგდო გოლი - მაშინ ჯანო 17 წლის და 8 დღის იყო.

ანანიძე სასტარტო შემადგენლობის სტაბილური მოთამაშე ვერ გახდა - ქართველისთვის ყველაზე ინტენსიური 2010 წლის სეზონი გამოდგა, როცა რუსულ პრემიერლიგაში 23 მატჩი ჩაატარა. მიზეზი რამდენიმეა - ფიზიკური მომზადების პრობლემა, მწვრთნელის შეხედულება... მაგრამ მთავარი, რა თქმა უნდა, ტრავმები იყო", - წერს "სპორტ-ექსპრესი".

იმავე გამოცემამ დაითვალა, რამდენჯერ დაშავდა ქართველი ნახევარმცველი მძიმედ. გაითვალისწინეთ, რომ აქ შედარებით მსუბუქ ტრავმებზეა ლაპარაკი.

2011, აპრილი - ტერფის პრობლემები
2011, მაისი - კვლავ ტერფის პრობლემები
2012, დეკემბერი - მუხლის დაზიანება
2013, აპრილი - წვივის ძვლის ანთება
2013, ნოემბერი - კუნთების პრობლემა
2014, აპრილი - კუნთის გაწყვეტა
2015, სექტემბერი - ტერფის დაზიანება
2016, აგვისტო - ბარძაყის ტრავმა
2017, სექტემბერი - ტერფის დაზიანება, რის გამოც მოედანს მხოლოდ მიმდინარე წლის მარტში დაუბრუნდა.

ამ სტატისტიკის შემდეგ "სპორტ-ექსპრესი" ანანიძის მომავალზე ბჭობს: "მას ექვს თვეზე მეტი არასდროს გაუცდენია. ახლა კი, როგორც ჩანს, სწორედ ასე მოხდება - დაახლოებით ამდენი დრო დასჭირდება ჯვარედინი მყესების აღდგენას, რეაბილიტაციას და მოედანზე დაბრუნებას.

"სპარტაკისთვის" ჯანოს დაკარგვა ტრაგედია არ იქნება. სხვა საკითხია, თუ რა ელის ანანიძეს კარიერაში. მან ხელშეკრულება 2016 წლის ოქტომბერში გააგრძელა და "სპარტაკს" თავისი მომავალი 2021 წლის 30 ივნისამდე დაუკავშირა. ანუ, ჯანო მოსკოვური კლუბის მოთამაშე კიდევ 3 წლის განმავლობაში უნდა იყოს.

მაგრამ სჭირდება თუ არა ის "სპარტაკს" - პრობლემური ტერფის მქონე და ახლა უკვე იოგებგაწყვეტილი? ვითარებიდან ისე ჩანს, რომ უფრო არა, ვიდრე - კი. სამწუხაროდ, XXI საუკუნის "სპარტაკის" დუბლების ყველაზე ნიჭიერი ფეხბურთელი ამ გუნდში რომ გაიხსნება, ამის აღარავის სჯერა".

ჯანო და უილიშირი

"სოვეტსკი სპორტმა" ჯანო "არსენალის" ნახევარმცველ ჯეკ უილშირს შეადარა. გამოცემის ცნობით, უილშირმა ტერფის ტრავმის გამო 357 დღე იუქმა, ხოლო ჯანომ - 212.

"25 წლის ნახევარმცველმა კარიერაში მუხლი მერვედ დაიზიანა. ეს ძალიან ბევრია და ორიდან ერთზე მიუთითებს, ანუ შესაძლოა, ორივეზეც: მისი მუხლი სუსტად განვითარებულია, პრემიერლიგის დატვირთვებისთვის მოუმზადებელია და აღდგენა ნელა მიმდინარეობს. ან "სპარტაკში" ფიზმომზადებისა და ფიზიოთერაპევტების სერიოზული პრობლემებია.

მაგალითად, 2013/14 წლების სეზონში "როსტოვში" ანანიძემ 25 მატჩი ჩაატარა, გუნდის ერთ-ერთ საკვანძო მოთამაშედ ჩამოყალიბდა და ერთხელაც არ დაშავებულა.

ამას იმიტომ ვამბობთ, რომ ჯანოს საქართველოს ნაკრებში როსტოველთა შემადგენლობაში თამაშის დროსაც იწვევდნენ, მაგრამ ის კლუბში სხვა ექიმების მეთვალყურეობის ქვეშ იმყოფებოდა და არა - სპარტაკელთა.

ამ ეტაპზე, ცხადია, რომ ჯანო მოედანზე სექტემბრის ბოლო რიცხვებზე ადრე ვერ დაბრუნდება - ეს კი 180 დღეზე მეტია. ანუ, გუნდს მხოლოდ შემდეგ წრეში დაეხმარება. ეს ნამდვილი ჯოჯოხეთია".

გამოცემამ ქართველის პრობლემებში მოსკოვის "სპარტაკის" სამედიცინო შტაბი დაადანაშაულა: "მოსკოვის "სპარტაკისა" და "არსენალის" მაგალითები შევადაროთ.

რამდენიმე წლის წინ, ლონდონური კლუბი ფეხბურთელთა ტრავმიანობით დაზარალდა. ამ მაჩვენებლით გუნდი ინგლისის პრემიერლიგაში ლიდერობდა. მაგრამ 3 წლის წინ "მეთოფეებმა" ფიზიოთერაპევტების შემადგენლობა განაახლეს და დაზიანებულ მოთამაშეთა რაოდენობა მკვეთრად შემცირდა.

"სპარტაკში" კი მარტო წელს ჯვარედინი იოგები ოთხმა ფეხბურთელმა დაიზიანა (მათ შორის, გიორგი ჯიქიამაც). სხვათა შორის, აქ არ აქვს მნიშვნელობა, ფეხბურთელი ნაკრებში დაშავდა თუ გუნდში. ძირითადად, მოთამაშე კლუბში იტვირთება, სადაც ექიმები აკვირდებიან. ნაკრებში კი მოთამაშეები მომზადებულები (ან მოუმზადებლები) და დატვირთულები (ან დაუტვირთავები) მიდიან.

სულ, "სპარტაკს" ბოლო ერთ წელიწადში 24 ტრავმირებული ფეხბურთელი ჰყავდა. ეს ბევრია თუ ცოტა, თავად შეაფასეთ, მაგრამ ანალოგიურ პერიოდში მოსკოვის ცსკა-ში მსგავსი პრობლემა 3,5-ჯერ ნაკლებ ფეხბურთელს შეექმნა".

ყოველდღიური სპორტული გაზეთი "ლელო"
1242
მკითხველის კომენტარები / 1 /
სოსო
0
ზოგჯერ სტატისტიკა,გატლეკილ ენაზეც მჭევრმეტყველია.
მსგავსი ამბები
რუბრიკის სხვა სიახლეები
;