რუსული მედია: ანანიძე მოედანზე... ვერავინ იპოვა. ჯანო ირლანდიასთან უთამაშებლობის მიზეზს განმარტავს

ნაკრებიდან კლუბში დაბრუნებულმა ჯანო ანანიძემ ჯერ სრული დატვირთვით ივარჯიშა, მერე კი 75 წუთიც ითამაშა


ჯანო ანანიძემ, რომელიც საქართველოს ნაკრებს ირლანდიაში სათამაშოდ არ გაჰყვა, მეორე დღეს ჯერ სრული დატვირთვით ივარჯიშა "კრიალია სოვეტოვში", პარასკევს კი ძირითად შემადგენლობაშიც ვიხილეთ (სამარელები შინ ტულის "არსენალთან" დამარცხდნენ 0:1) ძალიან მძიმე მოედანზე - ფეხბურთელი, რომელსაც რამდენიმე დღის წინ მუხლი ჰქონდა გასიებული...

რა თქმა უნდა, ასეთი ფაქტები ყოველთვის გაღიაზიანებას იწვევს გულშემატკივრებში, მით უფრო მაშინ, როცა არ არსებობს არგუმენტირებული დასაბუთება იმისი, რომ ანანიძეს ტრავმის გამო არ შეეძლო ნაკრებთან ერთად ყოფნა.

ჯანომ ამ დღეებში წაიკითხავდა უარყოფით რეაქციებს და ეტყობა, ამის საპასუხოდ დაწერა სოციალურ ქსელში:

"მოგესალმებით. მინდა მადლობა გადაგიხადოთ ჩემს გულშემატკივრებს და მხარდაჭერებს გვერდში დგომისთვის და ყველა იმ ადამიანს, ვისგანაც ძალიან დადებითი გზავნილები მივიღე, შვეიცარიელი ფეხბურთელისთვის გაწეული იმ მცირე დახმარებისთვის, რომელიც მინდორზე აღმოვუჩინე.

მინდა განვმარტო ირლანდიაში ჩემი არყოფნის მიზეზი, რადგან ამ ვითარებამ არაერთგვაროვანი რეაქცია გამოიწვია. საქმე ისაა, რომ შვეიცარიასთან თამაშის შემდეგ ნაოპერაციები მუხლის ტკივილი ვიგრძენი, რომელიც ოდნავ გასიებულიც იყო. ამის თაობაზე ნაკრების ექიმს ვესაუბრე და ერთობლივად გადავწყვიტეთ, რომ ხანგრძლივი გადაფრენებისგან თავი შემეკავებინა და გადატვირთული გრაფიკიდან გამომდინარე, უმჯობესი იქნებოდა რამდენიმე დღიანი პაუზა ამეღო.

23 მარტის შემდეგ 6 დღე გავიდა და ამიტომაც გადავწყვიტე, დღეს მეთამაშა, თუმცა სრულად მაინც არ ჩავამთავრე შეხვედრა. ძალიან დიდი იმედი მაქვს, რომ ძველი ტრავმები თავს აღარ შემახსენებს, სრულად მოშუშდება და  ყოველთვის ბოლომდე დავიხარჯები ჩემი ნაკრებისთვის და ასევე გუნდისთვის. მადლობა ყველას მხარდაჭერისთვის", - წერს ჯანო.

არის თუ არა ეს დამაჯერებელი პასუხი, მკითხველმა გადაწყვიტოს. ჩვენ კი გვგონია, რომ ფეხბურთელის საქმე არ არის, რამდენს დაისვენებს და როდის ითამაშებს. ამას წყვეტს გუნდის ექიმი თავად ფეხბურთელის მდგომარეობის მიხედვით.

რაც შეეხება ანანიძის თამაშს "არსენალთან" პარასკევის მატჩში. ის 75-ე წუთზე შეცვალეს. როგორც ავტორიტეტული რუსული ინტერნეტგამოცემა "ჩემპიონატი" მატჩის რეცენზიაში წერს, წინა სამი მატჩისგან განსხვავებით ანანიძე მოედანზე... ვერ იპოვეს. ერთადერთი მწვავე გადაცემა მთელი მატჩის განმავლობაში - ეს იყო და ეს. ჯანო საერთოდ ჩანდა მეტოქის საჯარიმოს წინ და მხოლოდ შიგადაშიგ იხსნებოდა მარცხენა ფლანგზე, როცა მისი თანაგუნდელი კანუნიკოვი ცენტრისკენ იწევდა.

1230
მკითხველის კომენტარები / 0 /
მსგავსი ამბები
რუბრიკის სხვა სიახლეები
;