რჩება თუ არა ჭიაბრიშვილი?

მესამე სეზონია, რაც "საბურთალო"ეროვნულ ლიგაში თამაშობს და 2017 წლის გათამაშებაში საუკეთესო შედეგიც აჩვენა - დედაქალაქურმა კლუბმა ტურნირი მე-4 ადგილზე დაასრულა და ცოტა დააკლდა, რომ მომავალ წელს ევროპის ლიგის საკვალიფიკაციო ეტაზე ეთამაშა...

დასრულებულ პირველობასა და სამომავალ გეგმებზე "საბურთალოს" მთავარმა მწვრთნელმა გიორგი ჭიაბრიშვილმა ილაპარაკა:

"ძალიან დიდი სამუშაო გასწია ფეხბურთის ფედერაციამ, სპორტის სამინისტრომ, ფეხბურთის განვითარების ფონდმა, ეროვნული ლიგა მაღალ დონეზე რომ ჩატარებულიყო. ბოლო წლებში გამართული პირველობებიდან, წლეულს გამორჩეული ჩემპიონატი გვქონდა. იყო დრამატული და გამოსაყოფი მატჩები, ასევე მთელი პირველობა.

ლიდერებსა და აუტსაიდერებში თამაშები დაძაბულად მიმდინარეობდა. გულშემატკივარსა თუ ნებისმიერ ადამიანს, ყველა მატჩის პირდაპირ ეთერში ნახვის საშუალება ჰქონდა, რაც წინგადადგმული ნაბიჯია. მჯერა, მომავალში კიდევ გვექნება გარკვეული სიახლეები და ჩემპიონატის დონე ნელ-ნელა მოიმატებს. მომავალში ვისურვებდი, რომ კლუბებს გამართული ინფრასტრუქტურა ჰქონდეთ - რაც შეიძლება მეტ ბუნებრივსაფრიან მინდვრებზე ვითამაშოთ.

ასევე მეტი ხიბლი აქვს განათებაზე მატჩების ჩატარებას. რაც ჩვენს ჩემპიონატს ძალიან აკლია, ეს გულშემატკივარია და იმედია, ხალხი სტადიონზე ნელ-ნელა დაბრუნდება", - ამბობს გიორგი ჭიაბრიშვილი.

მან განვლილ სეზონში "საბურთალოს" ნაჩვენებ შედეგზეც ილაპარაკა: "დავინახე, რომ "საბურთალო" საგრძნობლად გაზრდილია. აქამდე არასტაბილურობა გვახასიათებდა, ახლა კი სტაბილურობა შევიძინეთ, ყველა მეტოქისთვის უხერხულ მოწინააღმდეგედ ვიქეცით და ერთ-ერთ ლიდერ კლუბად ჩამოვყალიბდით.

მიუხედავად იმისა, რომ ბევრ თამაშს დიდი დანაკლისით შევხვდით, მეოთხე ადგილზე გასვლა მაინც მოვახერხეთ, რაც, ვფიქრობ, ამ დროისთვის მისაღები შედეგია. სადაც დავმარცხდით, ეს მხოლოდ ბრძოლაში მოხდა. აქამდე ყველაფერი ასე არ იყო".

პირველ-ორ წრეში "საბურთალომ" 25 ქულა დააგროვა, მესამე-მეოთხეში კი - 35. ჭიაბრიშვილმა ამის მიზეზებიც ახსნა: "პირველ წრეში ბევრი ტრავმირებული გვყავდა, ფაქტობრივად, დაცვითი ხაზის მთლიანი რგოლი - იაშვილი, ნადარაია, ჩაბრაძე, გრიგალაშვილი.

დიდი ხნით დაგვაკლდნენ ალთუნაშვილი და ბიძინაშვილი, აღარაფერს ვამბობ გოშთელიანზე. რამდენიმე თვის შემდეგ ფეხბურთელების ნაწილი შემოგვიერთდა, ამავდროულად რამდენიმე ტრანსფერი განვახორციელეთ და გავძლიერდით - თარხნიშვილის, ვოლკოვისა და მუიეცის სახით. თურქეთში კარგ პირობებში მოვემზადეთ და გუნდი სეზონს კარგ ფიზიკურ კონდიციებში შეხვდა. ამიტომაც იყო, რომ ამ მხრივაც არანაირი პრობლემები არ შეგვქმნია".

"საბურთალო" წლეულს ევროპის ლიგის საგზურისთვის იბრძოდა და მიზანთან ახლოსაც იყო. გუნდის მთავარი მწვრთნელი ლაპარაკობს, მიზნის მისაღწევად კლუბს რა დააკლდა: "წეღან ტრავმებსა და ფეხბურთელების დიდ დანაკლისზე ვისაუბრე. მიუხედავად ამისა, "საბურთალომ" ყველაფერი გააკეთა, რისი შესაძლებლობებიც ჰქონდა. რა დაგვაკლდა?

უბრალოდ, სხვა გუნდების შედეგებზე დამოკიდებული არ უნდა იყო. ყველას დიდი მოლოდინი გვაქვს და ვმუშაობთ, რომ სამომავლოდ შედეგი გავაუმჯობესოთ".
მან "საბურთალოსთან" დაკავშირებით სამომავლო გეგმებზე ლაპარაკისას გუნდთა ურთიერთობა ახსენა: "რა თქმა უნდა, "საბურთალო" მომავალ წელს მეტის მიღწევასა და სამეულში მოხვედრას შეეცდება.

ეს ჩემთან ერთად იქნება თუ სხვასთან ერთად, დრო გვიჩვენებს. სეზონის დასრულების შემდეგ, კონტრაქტი თბილისურ კლუბთან დამიმთავრდა. რა თქმა უნდა, "საბურთალოსთან" მოლაპარაკება მაქვს. როდესაც ეროვნული ლიგის გათამაშება დასრულდა, კლუბის ხელმძღვანელობას შევხვდი და ვისაუბრეთ. ამ კვირის ბოლოს გადაწყდება, "საბურთალოში" დავრჩები თუ არა".

ყოველდღიური სპორტული გაზეთი "ლელო"
1940
მკითხველის კომენტარები / 0 /
მსგავსი ამბები
რუბრიკის სხვა სიახლეები
;