საამაყო სანახავი: თორნიკე შენგელიამ "რეალს" მადრიდში სძლია!

საქართველოს ნაკრების ფორვარდმა თორნიკე შენგელიამ ესპანეთის ჩემპიონატის ფინალური სერია 12 ქულითა და მადრიდში ეფექტური გამარჯვებით გახსნა. "ბასკონიამ" "რეალი" მისსავე მოედანზე 94:90 დაამარცხა.

ამ გამარჯვებაში ქართველმა ფორვარდმა სოლიდური წვლილი შეიტანა, იგი განსაკუთრებით შედეგიანი ბოლო წუთებზე იყო. საბოლოოდ 30 წუთში 12 ქულა, 7 მოხსნა, 3 პასი და 1 ჩაჭრა მოაგროვა. ბასკების სნაიპერი 16 ქულით ლუკა ვილდოსა გახდა. "რეალს" კი ჯეისი კეროლმა ულიდერა - 20 ქულა (7-დან 5 სამქულიანი).

საოცარი და ამავე დროს საამაყო სანახავი იყო მატჩის ბოლო წუთები, როცა თორნიკე შენგელიამ მადრიდში, სავსე ტრიბუნების წინაშე "ბასკონიას" სასარგებლოდ თამაში შემოატრიალა:

საფინალო სირენამდე 2:39 წუთით ადრე "რეალი" 82:79-ს იგებდა, თორნიკემ ჯარიმა მოიპოვა, ორიდან ერთი ჩააგდო და 82:80.

2:16 წუთით ადრე ცივსისხლიანმა გერმანელმა იოჰან ვოიტმანმა ჯარიმებით ანგარიში გაათანაბრა - 82:82.

1:35 - შენგელია "რეალის" ფარქვეშ შეიჭრა, გუსტავო აიონი მოისროლა (მასპინძები შეტევაში ჯარიმას ითხოვდნენ), ორქულიანი ჩააგდო და "ბასკონია" წინ გაიყვანა - 84:82.

ლულმა და ვილდოსამ 2-2 ქულა გაცვალეს და კვლავ შენგელიას ჯერი დადგა: საფინალო სირენამდე 22 წამით ადრე თორნიკემ კიდევ მოიპოვა საჯარიმოს ხაზზე დადგომის უფლება, ორივე ტყორცნა გამოიყენა და სწორედ ეს იყო წამი, როცა მატჩის ბედი გადაწყდა - 88:84.

მატჩის დასრულებამდე 22 წამით ადრე 4-ქულიანი უპირატესობა უკვე გამარჯვებაა, თუმცა "რეალმა" ბოლომდე იბრძოლა, განზრახ ფოლებითა და სამქულიანებით თამაშის გადარჩენა სცადა, მაგრამ სტუმრად მოგების შანსი ბასკებმა ხელიდან აღარ გაუშვეს და სწორედ 4-ქულიანი სხვაობით გაიმარჯვეს - 94:90.

ისღა დაგვრჩენია, თორნიკეს ეფექტური მოგება მივულოცოთ და მოგახსენოთ, რომ მომდევნო შეხვედრა 15 ივნისს ისევ მადრიდშია. სერია სამ მოგებამდეა.

   ⇒VIDEO - როგორ დაამარცხა თორნიკე შენგელიამ \"რეალი\" ესპანეთის ჩემპიონატის ფინალში

2073
მკითხველის კომენტარები / 0 /
მსგავსი ამბები
რუბრიკის სხვა სიახლეები