ვის მივცეთ ხმა? ძალოსანი პეტრიაშვილი, მოჭიდავე ფაჩულია და კალათბურთელი ტალახაძე

ძალოსანი პეტრიაშვილი, მოჭიდავე ფაჩულია და კალათბურთელი ტალახაძე

"ლელომ" თავის ტრადიციულ გამოკითხვაში გამოავლინა 2017 წლის საუკეთესო სპორტსმენი, რომელიც ძალოსანი ლაშა ტალახაძე გახდა. ზედიზედ მეორე წელია, იგი "ლელოს" მკითხველთა რჩეულიცაა და გაზეთისაც. მანამდე არაერთხელ გაყოფილა მკითხველთა და ჟურნალისტთა მოსაზრებები.

ლაშამ საუკეთესოობა მართლაც დაიმსახურა. თუმცა როგორც ყველა სფეროში აქაც იყო აზრთა სხვადასხვაობა. მახსენდება მძაფრი დიალოგი, რომელშიც გასული წლის ივნისში აქტიურად ჩავერთე.

12 ივნისს ზაზა ფაჩულია NBA-ს ჩემპიონი გახდა. სწორედ იმ დღეს მითხრა ჩემმა ფეხბურთზე მწერალმა კოლეგამ - "ლელოს" გამოკითხვა ახლავე ჩავატაროთ, წლის საუკეთესოდ ზაზა ფაჩულია დავასახელოთ, თორემ ინდივიდუალურ სახეობაში ვინმე მოიგებს ევროპას ან მსოფლიოს და გამოკითხვაში NBA-ს ჩემპიონობა გაფერმკრთალდებაო.

ამის თქმას ისტორიულ-გლობალური დავის წარმოშობა მოჰყვა:

- ზაზამ მოიგო NBA? - იკითხა ინდივიდუალურ სპორტზე მწერალმა ჟურნალისტმა.

- აბა, ლებრონმა?

- "გოლდენ სტეიტმა" მოიგო კარისა და დურანტის თაოსნობით. ფაჩულია, უბრალოდ ამ გუნდის წევრი იყო.

- უბრალოდ არა, ყველა მატჩში, რომელშიც ითამაშა სასტარტო იყო!

- უნდა დასახელდეს საქართველოს საუკეთესო სპორტსმენი, როგორ უნდა დავაყენოთ ფაჩულია, ვთქვათ იმ სპორტსმენზე წინ, რომელმაც ევროპა ან მსოფლიო მოიგო. NBA ხომ მხოლოდ ამერიკის ჩემპიონატია?

- სხვათა შორის, კანადური გუნდიც თამაშობს, მაგრამ მთავარი ის არის, რომ NBA-ს ჩემპიონს დიდი ხანია, მსოფლიოს ჩემპიონად მოიხსენიებენ.

- რატომ?

- იმიტომ, რომ NBA მსოფლიოს ყველაზე მაღალი დონის შეჯიბრებაა, მსოფლიოს ჩემპიონატიცაა და ჩვენი თანავარსკვლავედისაც. ირმის ნახტომში ვართ ხომ? ასეთ ლიგაში ზაზას გუნდი პირველი იყო, ფაჩულია - პირველ ხუთეულში! არის კიდევ პრეტენზია?!

- კი მაგრამ, მან მედალი ოკლენდს მოუტანა, ხოლო მოჭადრაკეებს, მოჭიდავეებსა და ძალოსნებს საქართველოსთვის მოაქვთ. მოეგო ფაჩულიას ევროპის ჩემპიონატი საქართველოს ნაკრებთან ერთად და სიამოვნებით დავასახელებდი წლის საუკეთესოდ. ახლა რაღას იტყვი?!

- სპორტის ინდივიდუალური სახეობის მოტრფიალეებს ისეთი კრიტერიუმები გაქვთ, ზაზას ევრობასკეტი თავის წილად რომ მოეგო, გამოკითხვაში, ვთავათ რომელიმე მოჭადრაკეს მაინც მასზე წინ დააყენებდით - მსოფლიოს ჩემპიონი გახდაო!

- ევროპაზე წინ მსოფლიო კი დგას...

- მაგ ლოგიკით გუნდური სპორტის სახეობებიდან წლის სპორტსმენად აღიარების შანსი არავის აქვს. საქართველოს ნაკრებში ჩაგდებულ 100 ქულას ევროპის ჩემპიონის ერთი მედალი წონის. მაგრამ თუ გიფიქრიათ, სად უფრო რთულია წარმატების მიღწევა სპორტის სახეობაში, რომლითაც 825 მილიონი ადამიანია დაკავებული თუ 8 მილიონი? ზაზა 825 მილიონს შორის საუკეთესო ხუთეულში იყო!

- არგუმენტები არ დაგელევა, მაგრამ მაინც ვერ დამარწმუნებ - მთავარია მედალი და ვისთვისაა ის მოპოვებული.

- ხომ შეიძლება, ერთ რამეში მაინც დამეთანხმო? ერთ რამეზე მაინც შევთანხმდეთ?

- რაზე?

- მაგალითად იმაზე, რომ გუნდური სპორტის მოყვარული გამოკითხვისას ყოველთვის წინ დააყენებს ფეხბურთელს, მორაგბეს ან კალათბურთელს. ხოლო ინდივიდუალური სპორტის მიმდევარი - მედლების თვლას შეუდგება.

- იცი, რომ მე-19 საუკუნეში ინგლისში ფეხბურთის წესების შემუშავებისას დავა ორ ძირითად საკითხზე იყო. ერთი - ვერ თანხმდებოდნენ წესებში დაეტოვებინათ თუ არა ბურთისთვის ხელის შეხება. ჰოდა, რომ ვერ შეთანხმდნენ, ამიტომ გაიყო ორად - ფეხბურთი თავისი გზით წავიდა, რაგბი - თავისი გზით.

- მთავაზობ, რომ გამოკითხვაც ორად გავყოთ?

- რატომაც არა! გამოვავლინოთ ორი საუკეთესო სპორტსმენი ერთი გუნდურ, მეორე ინდივიდუალურ სახეობაში.

- ცუდი აზრი არ არის, იმის გათვალისწინებით, რომ საერთო აზრამდე ვერასოდეს მივალთ. შევთავაზოთ "ლელოს" რედაქტორს, მომავალი წლისთვის...

- მანამ ის მითხარი, მე-19 საუკუნის ინგლისში წესების მიღებისას მეორე რა წესმა გამოიწვია დიდი ვნებათაღელვა?

- გაგეცინება.

- იმდენად დავიტვირთე, განტვირთვა ნამდვილად მჭირდება. მითხარი.

- ერთი მხარე აპროტესტებდა წესებიდან წვივში ჩარტყმის უფლების ამოღებას. წვივში თუ არ ვუთავაზეთ, ამ სპორტს ვაჟკაცურობა დაეკარგებაო. მაინც ამოიღეს!

2087
მკითხველის კომენტარები / 2 /
მიხო არევაძე
1
ტალახაძე დღეს ფიცარნაგის მეფეა და ამში ახალი არაფერია მაგრამ წარმოგიდგენიათ რამხელა სხვაობაა NBA-სა და შტანგას შორის პრესტიჟულობით?ზაზამ კი თექვსმეტი სეზონი ჩაატარა და ორჯერ მოიგო რაც ბევრ ამერიკელ ვარსკვლავსაც არ ღირსებია, ხოლო ევროპიდან თითებზე ჩამოთვლი იმ კალათბურთელებს ვინც ზაზას დონეს მიაღწია.ასე რომ ძალიან ძნელია დღეს ზაზაზე წინ ვინმე დააყენო თუნდაც მსოფლიოს საუკეთესო შტანგისტი.
N
0
პირველ რიგში, მინდა ზაზას უდიდესი პატივისცემა დავუდასტურო: დიდი სპორტსმენია და სამაგალითო პიროვნება, რომელიც საქართველოსათვის მაქსიმუმზე ცოტა მეტსაც კი აკეთებს. მაგრამ რაც შეეხება საუკეთესო ქართველ სპორტსმენს, ლაშაზე უკეთესი, სადღეისოდ, მსოფლიოში არავინ არსებობს, რასაც ზაზაზე, სამწუხაროდ, ვერ ვიტყვით. ნურავინ მიწყენთ ამას!
მსგავსი ამბები
რუბრიკის სხვა სიახლეები
;