საბას მისია. ეჭვგარეშეა, მას ბევრი რამ ექნება სათქმელი...

ადამიანი გვარიანად სუბიექტური არსებაა. ჩვენ ძალიან ხშირად ვწერთ შემტევებზე, გოლები რომ გააქვთ. ძალიან ხშირად ვწერთ ნახევარმცველებზე, კარგ პასებს რომ აკეთებენ... ისე გამოდის, იშვიათად ვწერთ მცველებზე, მეკარეებზე, საყრდენებზე... არადა, ვცდებით, ძალიან ვცდებით: დღევანდელ ფეხბურთში, როცა ლამის ოქროს ფასი დაედო კარის "მშრალად" შენახვას, დიდზე დიდია იმ ფეხბურთელების ფასი, რომლებიც იმდენს ვერ ქმნიან, რამდენსაც შლიან...

საქართველოს ნაკრებშიც ასეა - ხშირად დაუფასებლები არიან ასეთი ფეხბურთელები და სადაც სამართალია, აქ პირველი კენჭი ჩემს ბოსტანში უნდა ვისროლო. როგორღაც ისე ხდება, რომ კაცი იოლად აჰყვება ხოლმე თანამედროვეობის ცდუნებებს.

საქართველოს ნაკრებს კარს მოადგა ორი მატჩი. ერთი - ოფიციალური, შვეიცარიასთან, მეორე - ამხანაგური, ხორვატიასთან. და აქედანვე 100-პროცენტიანი ალბათობით შეიძლება იმის თქმა, რომ ორივე შეხვედრაში და კიდევ ერთა ლიგის პლეი ოფებში ჩვენს ეროვნულ გუნდს ძალიან, ძალიან დასჭირდება საბა კვირკველია - ბედისწერასთან მუდმივად მებრძოლი ფეხბურთელი, ვინც ისე გადაჯდა "ლოკომოტივის" სათადარიგოთა სკამზე, პრაქტიკულად, ერთი თამაშიც არ ჩაუგდია.

იური სიომინი ბოლომდე არ გვეუბნება, რატომ არ ათამაშებს ჩვენებურს. ზოგი რას ამბობს და ზოგი - რას. ახსენებენ "ლოკომოტივში" მიმდინარე შიდა გარჩევებს, კვირკველიას სურვილს, რომ წავიდეს გუნდიდან და ასე შემდეგ...

მე ერთი რამ ვიცი: მაშინაც, როცა ხავი გრასიამ კვირკველია "რუბინში" სათადარიგოთა სკამზე დასვა, და ახლაც, უსამართლოდ იჩაგრება. ეჭვგარეშეა, მას ბევრი რამ ექნება სათქმელი, მაგრამ ის არ არის ისეთი ადამიანი, რომ ყველაფერი თქვას, რაც არის სათქმელი და რაც - არა.

ეს კია, რომ საბა კვირკველიას კიდევ ერთი ბრძოლა აქვს მოსაგები საფეხბურთო ფორტუნასთან და იმისაც მჯერა, რომ ის ამ ბრძოლას აუცილებლად მოიგებს. სხვანაირად არ შეიძლება, ასე სჭირდება ქართულ ფეხბურთს, ასე სჭირდება საქართველოს ნაკრებს და ასე სჭირდება თავად მას!

ბოლოს და ბოლოს, ბელარუსის ნაკრების არაერთი ფეხბურთელი თამაშობს რუსეთში და ვინ, თუ არა მათ, რეალურად იციან კვირკველიას ძალა. არ დამავიწყდება: ყაზახეთში ჩასულმა ასტანის (ახლანდელი ნურ-სულთანის) მთავარი სპორტული არენის ზეკომფორტული სტადიონის მედიაოთახში რომ მოვკალათდი, მუშაობა არ მაცალეს ყაზახმა ჟურნალისტებმა - კვირკველიაზე დამაყარეს კითხვები. სწორედ საბა იყო მათთვის საქართველოს ნაკრების უპირველესი ვარსკვლავი...

1189
მკითხველის კომენტარები / 0 /
მსგავსი ამბები
რუბრიკის სხვა სიახლეები
;