საბა კვირკველია: საქართველოს თუ რუსეთის ნაკრები? ამაზე არასდროს მიყოყმანია

დღეს, 19 ოქტომბერს, ევროპა ლიგის ჯგუფური ეტაპის მესამე ტურის შეხვედრაში მოსკოვის "ლოკომოტივი", რომლის ღირსებას საბა კვირკველია იცავს, სტუმრად ტირასპოლში "შერიფს" დაუპირისპირდება. საქართველოს ნაკრების მცველს რუსულმა გამოცემა "სპორტ ექსპრესმა" ინტერვიუ ჩამოართვა, სადაც მომავალ დაპირისპირებასთან ერთად, სხვა საინტერესო საკითხებზეც ელაპარაკა.

- ბოლო ტურში "უფასთან" წაგება უკვე დაივიწყეთ?
- ასეთია ფეხბურთი, აქ ყველაფერი ხდება. ყოველთვის გამარჯვებას რომ ვახერხებდეთ, დამეთანხმებით, უინტერესო იქნებოდა. რა თქმა უნდა, იმ თამაშის დასრულებისთანავე მომხდარი განვიხილეთ. გავიდე რამდენიმე დღე და მე, როგორც პროფესიონალი, ვალდებული ვარ, მომავალ დაპირისპირებაზე გადავერთო. წინ გვაქვს ევროპა ლიგის მატჩი "შერიფთან".

- რას იტყვით მოლდავურ გუნდზე?
- მეტოქეს ახლო მომავალში გავარჩევთ. ახლა კი ვერაფერს მოგახსენებთ.

- როგორ მოხდა, რომ "ლოკომოტივმა" მიმდინარე სეზონში "სპარტაკსაც" მოუგო და ცსკა-საც, მაგრამ "ტოსნოსა" და "უფასთან" წააგო?
- ეჰ, ეგ რომ ვიცოდე...

- მეტოქის დაუფასებლობა?
- არა მგონია. უბრალოდ, ასე წარიმართა ის თამაშები. უკვე რამდენი ქულა დავკარგეთ... ვუშვებთ შეცდომებს და კარში გოლებს ვიღებთ.

- აგვისტოში თქვით, რომ მიზანი ჩემპიონობაა. როგორ ატყობთ, შეძლებთ მისიის შესრულებას?
- რა თქმა უნდა, და რატომაც არა? გვაქვს შანსი. ჩვენ ხომ ცხრილში მეორე ადგილზე ვართ.

- ბევრი ფიქრობს, რომ "ზენიტთან" ჭიდილი, როცა პიტერელები მწყობრში არიან, უბრალოდ არარეალურია.
- ტურნირის ბოლოს ვნახავთ, ვინაა მწყობრში და ვის რა უნდა.

- ანუ, "ზენიტს" არ უფრთხით?
- ჩვენ ისეთი გუნდი გვყავს, ყველასთან შეუძლია ტოლ-სწორად თამაში. ეს უკვე არაერთხელ დავამტკიცეთ. რატომ უნდა გვეშინოდეს პიტერისა თუ სხვისი?! საკუთარ ძალებში დარწმუნებული ვართ.

- რომელ სქემაში უფრო მოხერხებულად გრძნობთ თავს - ორი თუ სამი ცენტრალური მცველის შემთხვევაში?
- სულერთია. როგორც მწვრთნელი იტყვის, ისე ვითამაშებ. სრულებით ვენდობი იური სიომინის არჩევანს.

- რუსეთში თქვენი ამპლუის მცველების პრობლემა მძაფრად დგას. ფაბიო კაპელოს დროს თქვენ ხომ რუსეთის ნაკრებში თამაში შემოგთავაზეს?
- დიახ, რა დასამალია და იყო მსგავსი რამ.

- ვერ მოილაპარაკეთ?
- თავიდანვე გააზრებული მქონდა, რომ საქართველოს ნაკრებში უნდა მეთამაშა. იქ დავიბადე და ვალდებული ვარ, დავიცვა ჩემი ნაკრების ღირსება. ამ საკითხთან დაკავშირებით არც არასდროს მიყოყმანია.

- რუსეთის პრემიერლიგაში ვის მიიჩნევთ საუკეთესო ცენტრალურ მცველად?
- ჩემს მეგობარ გიორგი ჯიქიას.

- სუბიექტური არჩევანია.
- კიდევ დავასახელებდი ჩემ თანაგუნდელ ჩორლუკას. მართალია, ის ტრავმირებულია, მაგრამ როცა მომჯობინდება, ძალიან დაეხმარება "ლოკომოტივს". ამაში ეჭვიც არ მეპარება.

- მართალია, რომ გასულ ზაფხულს თქვენით ინგლისური კლუბები ინტერესდებოდნენ?
- არ ვიცი. ხმები ბევრი დადიოდა, მაგრამ ჩემთან ინგლისის პრემიერლიგიდან არავის მოუმართავს.

- რუსეთის ჩემპიონატში ყველაზე მეტად ვის წინააღმდეგ გიჭირთ თამაში?
- ყოველთვის რთულია ძიუბას წინააღმდეგ გარჯა. "სპარტაკის" შემტევთა ჯგუფი საჩუქარი არავისთვისაა. ზე ლუიში, პრომესი, ლუიზ ადრიანუ... ამათ გამოვყოფდი.

1947
მკითხველის კომენტარები / 0 /
მსგავსი ამბები
რუბრიკის სხვა სიახლეები
;